Depeyin People Defense Force

05/01/2026

(၇၈)နှစ်မြောက် လွတ်လပ်ရေးနေ့အထိမ်းအမှတ် အားကစားပြိုင်ပွဲကျင်းပခြင်း

၂၀၂၆ ခုနှစ်၊ ဇန္နဝါရီလ( ၅) ရက်

၂၀၂၆ ခုနှစ်၊ ဇန်နဝါရီလ (၄) ရက်နေ့တွင် (၇၈) နှစ်မြောက် လွတ်လပ်ရေးနေ့အထိမ်းအမှတ် အားကစားပြိုင်ပွဲကို ရွှေဘိုခရိုင်အမှတ် (၁၂) တပ်ရင်းအတွင်း ရဲဘော်များ လွတ်လပ်ရေးနှင့် တော်လှန်ရေးအား တန်ဖိုးထားတတ်စေရန်၊ စည်းလုံးညီညွှတ်မှုပိုမိုရရှိစေရန်နှင့် စိတ်ပင်ပန်း ၊ လူပင်ပန်းမှုအား ပြေ‌လျော့စေရန်ရည်ရွယ်၍ ကျင်းပပြုလုပ်ခဲ့ပါသည်။

ရဲဘော်များ၏ ပျော်ရွှင်ဖွယ်ပုံရိပ်များကို ကျွန်ုပ်တို့ ရိုကျိုးလေးစားအပ်ပါသော ပြည်သူလူထုအားရွှင်လန်းအားတက်စေရန်အတွက် ထုတ်ပြန်တင်ပြအပ်ပါသည်။

တော်လှန်ရေးသစ္စာဖြင့်
ရွှေဘိုခရိုင် အမှတ်(၁၂)တပ်ရင်း

31/12/2025

၁ နှစ်တာ ဓာတ်ပုံသတင်းထုတ်ပြန်ချက်

၂၀၂၅ ခုနှစ်၊ ဒီဇင်ဘာလ ၃၁ ရက်

ရွှေဘိုခရိုင် အမှတ် (၁၂) တပ်ရင်းသည် ပြည်သူများ၏ စာနာထောက်ထားမှု၊ ချစ်ခင်ကြည်ဖြူမှုဖြင့် တိုက်ပွဲဝင်နေသည့် တပ်ရင်းဖြစ်သည်။

၂၀၂၅ ခုနှစ်တွင်း ရွှေဘိုခရိုင် အမှတ် (၁၂) တပ်ရင်း၏ လုပ်ဆောင်ချက်များအတွင်းမှ အချို့ကို ကျွန်ုပ်တို့ ရိုကျိုးလေးစားဦးညွတ်ရသော ပြည်သူများ သိရှိစေရန်နှင့် ရွှင်လန်းအားတက်စေရန် တင်ပြအပ်ပါသည်။

မှတ်တမ်းဓာတ်ပုံများအနက် စစ်ဆင်ရေးမှတ်တမ်းများကိုမူ ချန်လှပ်ထားခဲ့ပါသည်။

တော်လှန်ရေးသစ္စာဖြင့်

ရွှေဘိုခရိုင် အမှတ် (၁၂) တပ်ရင်း




(ဓာတ်ပုံ တပုံချင်းစီ၏ အောက်တွင် Caption များ ပါဝင်ပါသည်။)

26/12/2025

ရွှေဘိုခရိုင် အမှတ် (၁၂) တပ်ရင်းမှ ရဲဘော် 4Two0 ရေး၊ ဆိုပြီး မော်ကွန်းဌာန ရဲဘော်များရဲ့ ရိုက်ကူးရေးလက်ရာများနဲ့ ပေါင်းစပ်ထားတဲ့ ဖန်တီးမှုတခု

https://www.facebook.com/share/v/1ZrDz36nUb/

20/10/2025

ယခုအချိန်ကာလအပိုင်းအခြားအတွင်း၌ အကြမ်းဖက်စကစသည် ပြည်သူလူထု အစုအဝေးများရှိသောနေရာများကို ပစ်မှတ်ထား၍ paramotor စက်တပ်လေထီးများနှင့်၎င်း၊ဂျက်ဖိုက်တာများဖြင့်၎င်း ဗုံးသီးချခြင်း၊လေကြောင်းတိုက်ခိုက်မှုများပြုလုပ်ခြင်းများ အဆက်မပျက်လုပ်ဆောင်နေသည့်အတွက်၊ပြည်သူများအနေဖြင့် ဘာသာရေး၊အလှူပွဲ၊မင်္ဂလာဆောင်ပွဲများပြုလုပ်ကျင်းပရာတွင် ဆိုင်းဝိုင်း၊အငြိမ့်၊ဇာတ်ပွဲစသည်တို့ဖြင့် ထည့်သွင်းဧည့်ခံဖျော်ဖြေခြင်းများ မပြုလုပ်ကြရန် ဒီပဲယင်းမြို့နယ် ပအဖ၊ပကဖ၊ပလဖ တို့နှင့် သက်ဆိုင်ရာတာဝန်ရှိသူများအားလုံး မျက်နှာစုံညီအစည်းအဝေးပြုလုပ်၍ ၂၀၂၅/အောက်တိုဘာ(၄)ရက်နေ့ရက်စွဲဖြင့် ကြေငြာချက် အား ထုတ်ပြန်ကြေငြာခဲ့ပြီးဖြစ်ပါသည်။၎င်းကြေငြာချက်အား မလိုက်နာပဲ ဖောက်ဖျက်ကျူးလွန်ပါက ကျူးလွန်သူ၏တာဝန်ဖြစ်ပြီး ထိရောက်စွာ အရေးယူဆောင်ရွက်သွားမည်ဖြစ်ကြောင်း အသိပေးကြေငြာအပ်ပါသည်ခင်ဗျ။
ပြည်သူများ လေကြောင်းအန္တရာယ်အထူးဂရုစိုက်ကြပီး၊အသိ၊သတိ အမြဲရှိကြရန်လည်းတိုက်တွန်းနှိုးဆော်အပ်ပါသည်ခင်ဗျ🙏🙏🙏
#ဒီပဲယင်းမြို့နယ်ပြည်သူ့အုပ်ချုပ်ရေးအဖွဲ့

06/10/2025

တော်လှန်ရေးရဲဘော် အပေါင်းကို မွေးထုတ်ပေးခဲ့ကြတဲ့ နိုင်ငံတဝန်းက မိဘအပေါင်းတို့ကို ဒီနေ့ သီတင်းကျွတ် လပြည့်နေ့မှာ မိဘရင်းနဲ့မခြား ရိုသေ လေးမြတ်စွာဖြင့် ရှိခိုး ဦးတင် ကန်တော့ပန်း ဆင်လိုက်ပါတယ်။

08/09/2025

ပြည်သူ့ကာကွယ်ရေးတပ်မတော်ရဲ့ ရဲဘော်များအနေနဲ့ တော်လှန်ရေးသက်လုံကောင်းအောင် တည်ဆောက်ကြဖို့ ရွှေဘိုခရိုင် အမှတ် (၁၂) တပ်ရင်းကနေ တိုက်တွန်းနှိုးဆော်ချင်ပါတယ်။

တော်လှန်ရေးသက်လုံဆိုရာမှာ
၁။ ကာလရှည် စစ်ဆင်ရေးကြောင့် ကိုယ်စိတ် ၂ ပါးပင်ပန်းနွမ်းနယ်မှုဒဏ်တွေကို ခံနိုင်ရည်ရှိဖို့
၂။ တော်လှန်ရေးကအဝန်းအဝိုင်းအတွင်းမှာ တွေ့ရ ကြုံရတဲ့ စိတ်ပျက်စိတ်ကုန်စရာ၊ လက်လျော့ပစ်ချင်စရာ၊ ဝမ်းနည်းအားငယ်စရာတွေကို ခိုင်ကျည်တဲ့စိတ်နဲ့ ကျော်ဖြတ်ဖို့
၃။ မိသားစုအခက်အခဲအမျိုးမျိုးကို နည်းလမ်းတွေ ရှာဖွေပြီး တတ်စွမ်းသမျှ ကျော်လွှားကြဖို့ပါ။

ဒီသက်လုံကို တည်ဆောက်ဖို့ဆို ကိုယ့်ကိုယ်ကို တည်ဆောက်၊ ကိုယ့်အစုအဖွဲ့ကိုတည်ဆောက်၊ တခွင်တပြင်လုံး တည်ဆောက်ရာမှာပါဝင်ကြရမှာ ဖြစ်ပါတယ်။ ပါဝင်ရာမှာ ဝတ်ကျေတန်းကျေ ပါဝင်ရမှာမဟုတ်ဘဲ ရွပ်ရွပ်ချွံချွံ တာဝန်ထမ်းဆောင်ပြီး ပါဝင်ရမှာ ဖြစ်ပါတယ်။

တည်ဆောက်ရာမှာ စစ်ရေးဝမ်းစာ၊ နိုင်ငံရေး (တော်လှန်ရေးနိုင်ငံရေး) ဝမ်းစာတွေ တိုးတက်လာအောင် ဖြည့်တင်းပြီး တည်ဆောက်ကြဖို့ပါ။

ရွှေဘိုခရိုင် အမှတ် (၁၂) တပ်ရင်းအနေနဲ့လည်း ပြည်သူလူထုလိုလားတဲ့ စစ်မှန်သောတော်လှန်ရေးဖြစ်ဖို့နဲ့ ကိုယ့်မိဘပြည်သူတွေကို လုံခြုံရေးအာမခံချက်တွေပေးနိုင်ဖို့ တက်တက်ကြွကြွ ကြိုးကြိုးစားစား အမှုထမ်းလျက်ရှိကြောင်းကိုလည်း ပြည်သူလူထုနဲ့ ရဲဘော်ရဲဘက်များကို တပါတည်း အသိပေးလိုက်ပါတယ်။

တော်လှန်ရေးသစ္စာဖြင့်

ရွှေဘိုခရိုင် အမှတ် (၁၂) တပ်ရင်း

03/09/2025

ဒီလ ရွှေဘိုခရိုင် အမှတ် (၁၂) တပ်ရင်းက ရောင်းချတဲ့ ထောက်ပို့ထီထဲကနေ ဒုတိယဆု သိန်း ၂၀၀ ဆုကို ပြည်သူတဦးက ပေါက်သွားပါတယ်။

သိန်း ၂၀၀ ဆုကို တပ်ရင်းက ရောင်းချတဲ့အထဲမှာ ပါတယ် ဆိုတာနဲ့ ကိုယ်ပေါက်တာ မဟုတ်ပေမယ့် တပ်ရင်းတရင်းလုံး ဆူညံပွက်လောရိုက်အောင် ပျော်ကြတာ။ အခါတိုင်း လေယာဥ်ဝဲရင် ဗုံးခိုကျင်းထဲ ခိုကြ၊ ဆင်းကြ၊ လုပ်ကြရာကနေ မနေ့က အဲဒီအချိန်မှာ လေယာဥ်ဝဲလာတာတောင် ဂရုမစိုက်မိကြတော့ပါဘူး။ ဘယ်သူရောင်းတာထဲက ပေါက်တာလဲစစ်ကြ ဆေးကြ၊ အကြောင်းကြားကြနဲ့။ တကယ့်စိတ်လှုပ်ရှားစရာပါပဲ။

😁😁

09/08/2025

08/08/2025

ရွှေဘိုခရိုင်အမှတ် (၉) တပ်ရင်း တည်ထောင်ခြင်း (၄) နှစ်ပြည့်အခမ်းအနားသို့ ပေးပို့သော သဝဏ်လွှာ

08/08/2025

ရှစ်လေးလုံးအရေးတော်ပုံ (၃၇) ပြည့်အထိမ်းအမှတ် အခမ်းအနားကျင်းပပြုလုပ်ခြင်း
၈.၈.၂၀၂၅

ရွှေဘိုခရိုင်အမှတ် (၁၂) တပ်ရင်းသည် ရှစ်လေး​လုံး အရေးတော်ပုံ (၃၇) နှစ်ပြည့်အထိမ်းအမှတ်အခမ်းအနားကို မဟာမိတ်အဖွဲ့အစည်းများဖြစ်သည့် ရွှေဘိုခရိုင် အမှတ် (၂၀၊ ၂၁၊ ၂၂) တပ်ရင်းများ၊ Depeyin Local Mobile Team၊ အနောက်မြောက်လွင်ပြင်တော်လှန်ရေးအင်အားစု၊ ဂဠုန်တပ်တော်တို့နှင့်အတူ ပူးပေါင်းကျင်းပခဲ့ပါသည်။

အဆိုပါ အခမ်းအနားတွင် တော်လှန်ရေးအဖွဲ့အစည်းအသီးသီးမှ ခေါင်းဆောင်များနှင့် ဒေသတွင်းမှ ပအဖနှင့် ပကဖအဖွဲ့ဝင်များလည်း တက်ရောက်ခဲ့ကြသည်။

အခမ်းအနားတွင် ပြည်သူ့ကာကွယ်ရေးတပ်မတော်အလံတော်အား အလေးပြုခြင်း၊ ခေတ်အဆက်ဆက် ဒီမိုကရေစီအရေးတော်ပုံများတွင် ကျဆုံးခဲ့ရသော အာဇာနည်သူရဲကောင်းများအား အလေးပြုခြင်း၊ ပြည်သူ့ကာကွယ်ရေးတပ်မတော်၏ သစ္စာအဓိဌာန် (၄) ချက်အား တိုင်တည်သစ္စာပြုခြင်းတို့ ပြုလုပ်ခဲ့ကြသည်။

အခမ်းအနားတွင် တာဝန်ရှိသူများမှ "ယခု နွေဦးတော်လှန်ရေးသည် ရှစ်လေးလုံးလူထုအရေးတော်ပုံအပါအဝင် ခေတ်အဆက်ဆက်လူထုလှုပ်ရှားမှုများမှတဆင့် ဖြစ်ပေါ်တိုးတက်မှုဖြစ်ကြောင်း၊ ယခင်သမိုင်းအဆက်ဆက် နောင်တော်မျိုးဆက်များ၏ မပြီးပြတ်သေးသော တာဝန်ကို ဆက်လက်ပုခုံးထမ်း လက်ဆင့်ကမ်း တာဝန်ထမ်းဆောင်ရခြင်းဖြစ်ကြောင်းနှင့် ယခုကဲ့သို့ စစ်အာဏာရှင်စနစ်ဆိုးကို မိမိတို့၏ တူသားနောင်မယ် နောက်မျိုးဆက် မခံစားရစေရန် ယခု နွေဦးတော်လှန်ရေးဖြင့် အဆုံးသတ်ရန် တိုက်တွန်းအားပေးစကား ပြောကြားခဲ့ပါသည်။

ထို့အပြင် တော်လှန်ရေးသည် တဦးချင်းစီ၏ ရွေးချယ်မှုမဟုတ်ဘဲ ခေတ်တခေတ် မျိုးဆက်တဆက်မှ ခေါင်းခံထမ်းဆောင်ရမည့် တာဝန်တရပ်သာဖြစ်ကြောင်း၊ အဆိုပါတာဝန်ကို မိမိတို့ အသက်၊ ဘဝ၊ ကိုယ်လက်အင်္ဂါအစိတ်အပိုင်းများစွန့်လွှတ်၍ ထမ်းဆောင်ကြသည့် ရဲဘော်များအတွက် ဂုဏ်ယူကြောင်း၊ လူတဦးတယောက်ချင်းစီ၏ ဘဝတိုးတက်ရေးအတွက် တဦးတယောက်တည်းဖြင့် ကြိုးစားအားထုတ်၍ ရနိုင်သော်လည်း လူ့အဖွဲ့အစည်းတခုလုံးကောင်းစားရေးအတွက် တော်လှန်ရေးတရပ်ဆင်နွှဲရာတွင် အစုအဖွဲ့အားလုံး ညီညွတ်စွာဖြင့် ကြိုးစားတာဝန်ထမ်းဆောင်မှသာ အောင်မြင်နိုင်ကြောင်း တိုက်တွန်းစကား ပြောကြားခဲ့ပါသည်။

"​မိမိရှင်သန်နေထိုင်ရာ လူ့အဖွဲ့အစည်းတခုလုံး၏ ဒီမိုကရေစီအရေး၊ တရားသဖြင့် ရှင်သန်နေထိုင်နိုင်ရေး၊ ပိုမိုကောင်းမွန်သော အနာဂါတ်တည်ဆောက်ရေး မျှော်လင့်ချက်များဖြင့် တော်လှန်ရေးတာဝန်ထမ်းဆောင်နေသည့် ရဲဘော်များ၏ အလုပ်ထက် ကြီးကျယ်သော အလုပ်ဟူ၍ မရှိ"

တော်လှန်ရေးသစ္စာဖြင့်

ရွှေဘိုခရိုင်အမှတ် (၁၂) တပ်ရင်း






#ဗျူဟာ၅၃

04/07/2025

တော်လှန်ရေးမီးလျှံ (Flames of Rebellion)

ရွှေဘိုခရိုင် အမှတ် (၁၂) တပ်ရင်း ရဲဘော်များရဲ့ တော်လှန်ရေးအပေါ် အလုပ်အကျွေးပြုမှု မှတ်တမ်းများကို ဓာတ်ပုံသတင်းတောက် သူမြေ့က တင်ဆက်ခဲ့ပါတယ်။

သူမြေ့ဟာ ဒီဓာတ်ပုံတွေ ရိုက်ကူးဖို့အတွက် ရဲဘော်တွေနဲ့အတူ လနဲ့ချီ တသားတည်းနေထိုင်ဖြတ်သန်းခဲ့ပါတယ်။

ရဲဘော်များရဲ့ ရုန်းကန်မှု ကြိုးပမ်းမှုများကို အခုလို မှတ်တမ်းတင်ပေးတဲ့ ဓာတ်ပုံသတင်းထောက် သူမြေ့ကို ရွှေဘိုခရိုင် အမှတ် (၁၂) တပ်ရင်းမှ ကျေးဇူးမှတ်တမ်းတင်အပ်ပါတယ်။

တော်လှန်ရေးသစ္စာဖြင့်
ရွှေဘိုခရိုင် အမှတ် (၁၂) တပ်ရင်း

Photo - Thu Myae
https://www.facebook.com/share/p/1C8q5yxioW/

13/05/2025

သတင်းထုတ်ပြန်ချက်
၂၀၂၅ ခုနှစ်၊ မေလ ၁၂ ရက်

၁။ ၂၀၂၅ ခုနှစ်၊ မေလ ၁၂ ရက်နေ့ နံနက် ၀၉း၃၅ ခန့်မှာ အကြမ်းဖက်စစ်ကောင်စီဟာ အိုးတိမ်တွင်းကျေးရွာ ပြည်သူ့အခြေပြုကျောင်းကို ကျောင်းသားလူငယ်တွေ စာသင်နေတုန်းအချိန်မှာပဲ လေကြောင်းတိုက်ခိုက်မှု ပြုလုပ်ခဲ့ပါတယ်။

၂။ အဆိုပါ စာသင်ကျောင်းအတွင်းနဲ့ အနီးအနားပတ်ဝန်းကျင်မှာ မည်သည့် လက်နက်ကိုင်တပ်၊ အဖွဲ့မျှ အခြေချနေထိုင်ခြင်းမရှိသလို တိုက်ပွဲလည်း ဖြစ်ပွားခြင်းမရှိပါ။ စာသင်ကြားနေတဲ့ ကလေးငယ်များကို ရည်ရွယ်ချက်ရှိရှိ ဦးတည်တိုက်ခိုက်ခြင်းသာဖြစ်ပါတယ်။

၃။ လေကြောင်းတိုက်ခိုက်မှုကြောင့် ကျောင်းသားကလေးငယ်ပေါင်း ၂၀ ဦးနှင့် ကျောင်းဆရာမ ၂ ဦး၊ စုစုပေါင်း ၂၂ ဦး အသက်ဆုံးရှုံးခဲ့ရပြီး ကျောင်းသားကလေးငယ်ပေါင်း အနည်းဆုံး ၅၀ ကျော် ဒဏ်ရာရရှိခဲ့ပါတယ်။

၃။ ရွှေဘိုခရိုင်အမှတ် (၁၂) တပ်ရင်းအနေနဲ့ စစ်ကောင်စီရဲ့ ဒီလူမဆန်တဲ့ လုပ်ရပ်ကို လူမျိုးတုန်းသတ်ဖြတ်မှု၊ စစ်ရာဇဝတ်မှုအဖြစ် မှတ်တမ်းတင်ပြီး ကျူးလွန်သူများကို ထိရောက်စွာအရေးယူနိုင်ရေးနဲ့ ထိခိုက်ခံစားရသူကလေးငယ်များအတွက် တရားမျှတမှု ပြန်လည်ရရှိရေးတို့အတွက် နည်းလမ်းပေါင်းစုံနဲ့ ​မဆုတ်မနစ်ကြိုးစားသွားမှာဖြစ်ပါတယ်။

၄။ ဒီရာဇဝတ်မှုများကို ကျူးလွန်သူ၊ စေခိုင်းသူ၊ အားပေးသူ၊ ပုံဖျက်သူ မည်သူကိုမဆို ရွှေဘိုခရိုင် အမှတ် (၁၂) တပ်ရင်းရဲ့ ရန်သူအဖြစ် ပြတ်ပြတ်သားသား သတ်မှတ်သွားမှာဖြစ်ပါတယ်။

၅။ ပြည်သူများအနေနဲ့လည်း ယခုကဲ့သို့ တိုင်းပြည်ရဲ့ အနာဂါတ်မျိုးဆက်ကလေးငယ်များကိုပါ ဦးတည်တိုက်ခိုက်တဲ့ စစ်ကောင်စီကို ကိုယ်တတ်နိုင်တဲ့ဖက်ကနေ တက်ကြွစွာ တွန်းလှန်တိုက်ခိုက်ပေးကြဖို့ တိုက်တွန်းနှိုးဆော်လိုက်ပါတယ်။

တော်လှန်ရေးသစ္စာဖြင့်

ရွှေဘိုခရိုင်အမှတ် (၁၂) တပ်ရင်း

ဓာတ်ပုံ - မော်ကွန်းဌာန၊ ရွှေဘိုခရိုင်အမှတ် (၁၂) တပ်ရင်း