18/04/2026
ဗီယက်နမ်နိုင်ငံ၏ စတော်ဘယ်ရီသီး တင်ပို့မှု စံချိန်တင်မြင့်တက်လာ
-----------------------------------------------------------------
၂၀၂၆ ခုနှစ်၏ ပထမနှစ်လအတွင်း ဗီယက်နမ်နိုင်ငံ၏ စတော်ဘယ်ရီသီး ပြည်ပတင်ပို့မှုသည် အမေရိကန်ဒေါ်လာ ၃.၄ သန်းအထိ ရှိလာခဲ့ပြီး ယခင်နှစ်ကာလတူထက် အဆပေါင်း ၂,၀၀၀ ခန့် အထိ ထူးထူးခြားခြား မြင့်တက်လာကြောင်း အကောက်ခွန်ဆိုင်ရာ အချက်အလက်များအရ သိရှိရသည်။
ပြီးခဲ့သည့် ၂၀၂၁ ခုနှစ်တွင် စတော်ဘယ်ရီတင်ပို့မှုမှ ဒေါ်လာ ၆,၀၀၀ ခန့်သာ ရရှိခဲ့ရာမှ ၂၀၂၅ ခုနှစ်တွင် ဒေါ်လာ ၁.၇၄ သန်းအထိ တိုးတက်လာခဲ့ပြီး ယခု ၂၀၂၆ ခုနှစ် နှစ်စပိုင်းတွင်မူ စံချိန်တင်ပမာဏသို့ ရောက်ရှိလာခြင်းဖြစ်သည်။
ဗီယက်နမ် သစ်သီးဝလံနှင့်ဟင်းသီးဟင်းရွက်အသင်း၏ အထွေထွေအတွင်းရေးမှူး Mr. Dang P**c Nguyen ၏ ပြောကြားချက်အရ ဗီယက်နမ် စတော်ဘယ်ရီများကို တရုတ်၊ တောင်ကိုရီးယား၊ ဂျပန်၊ ထိုင်းနှင့် အီးယူဈေးကွက်များသို့ တင်ပို့လျက်ရှိကြောင်း သိရသည်။ လတ်ဆတ်သောအသီးများသည် သယ်ယူပို့ဆောင်ရန် ခက်ခဲသောကြောင့် တင်ပို့မှုအများစုမှာ အေးခဲထားသော စတော်ဘယ်ရီများ၊ အခြောက်ခံထားသော ထုတ်ကုန်များနှင့် ပြုပြင်မွမ်းမံထားသော ပစ္စည်းများဖြစ်သည်။
Son La ပြည်နယ်၌ စတော်ဘယ်ရီစိုက်ဧက ဟက်တာ ၆၀၀ ကျော်ရှိပြီး တစ်နှစ်လျှင် တန်ချိန် ၁၀,၀၀၀ ခန့် ထွက်ရှိပြီး Lam D**g ပြည်နယ်တွင်လည်း ဟက်တာ ၁၇၀ ကျော် စိုက်ပျိုးထားသည်။ ထို့အပြင် ဟနွိုင်းကဲ့သို့သော မြို့ကြီးများတွင်လည်း နည်းပညာမြင့် စမတ်စိုက်ပျိုးရေးစနစ်များဖြင့် စတင်စိုက်ပျိုးနေပြီဖြစ်သည်။
ယခုနှစ်တွင် အထွက်နှုန်းကောင်းမွန်သော်လည်း ပြည်တွင်းစားသုံးမှုနှင့် တင်ပို့မှုအပိုင်းတွင် နှေးကွေးနေခြင်းကြောင့် စိုက်ပျိုးသူအချို့ အရှုံးနှင့် ရင်ဆိုင်နေရကြောင်း သိရသည်။ Xuan Que စတော်ဘယ်ရီ သမဝါယမအသင်းမှ တာဝန်ရှိသူတစ်ဦးက ပို့ကုန်ကဏ္ဍ ပိုမိုခိုင်မာစေရန်အတွက် သိုလှောင်ထိန်းသိမ်းမှုနည်းပညာ (Preservation Technology) မြှင့်တင်ပေးမည့် မူဝါဒများ လိုအပ်နေကြောင်း ထောက်ပြထားသည်။
အကယ်၍ သိုလှောင်မှုနှင့် သယ်ယူပို့ဆောင်ရေး (Logistics) အခက်အခဲများကို ဖြေရှင်းနိုင်ပါက စတော်ဘယ်ရီသည် ဒူးရင်းနှင့် နဂါးမောက်သီးတို့ကဲ့သို့ ဗီယက်နမ်၏ အဓိက ပို့ကုန်သစ်တစ်ခု ဖြစ်လာနိုင်ကြောင်း စီးပွားရေးလေ့လာသူများက သုံးသပ်ထားကြောင်း သိရှိရပါသည်။
Source : VN Express
Source: https://www.doca.gov.mm
#ထွန်ယက်
#စုဗူး
#စိုက်ပျိုးရေးအခြေပြု
#မိုဘိုင်းအပီလီကေးရှင်း
