14/06/2026
လူငယ်များ၏ ဒစ်ဂျစ်တယ်စွမ်းရည် ဖွံ့ဖြိုးတိုးတက်ရေး ရည်ရွယ်၍ ဖွင့်လှစ်သည့် ကွန်ပျူတာသင်တန်း အပတ်စဉ် (၁) သင်တန်းဆင်းပွဲ ကျင်းပ
ရွှေပြည်သာမြို့နယ်၊ ၂၀၂၆ ခုနှစ် ဇွန်လ ၁၄ ရက်
လူငယ်များ၏ ဒစ်ဂျစ်တယ်နည်းပညာ အသုံးချနိုင်စွမ်းနှင့် အလုပ်အကိုင်အခွင့်အလမ်းများ တိုးတက်စေရန် ရည်ရွယ်၍ ပြည်သူ့ပါတီမှ ဖွင့်လှစ်သင်ကြားပေးခဲ့သည့် ကွန်ပျူတာသင်တန်း အပတ်စဉ် (၁) သင်တန်းဆင်းပွဲ အခမ်းအနားကို ၂၀၂၆ ခုနှစ် ဇွန်လ ၁၄ ရက်နေ့ ညနေ ၅ နာရီတွင် ကျင်းပပြုလုပ်ခဲ့သည်။
အဆိုပါ ကွန်ပျူတာသင်တန်းကို ၂၀၂၆ ခုနှစ် ဧပြီလ ၁၄ ရက်နေ့မှ ဇွန်လ ၁၄ ရက်နေ့အထိ နှစ်လတာ ဖွင့်လှစ်သင်ကြားပေးခဲ့ခြင်းဖြစ်ပြီး လူငယ်များ၏ အခြေခံကွန်ပျူတာ အသုံးပြုနိုင်စွမ်း၊ ရုံးလုပ်ငန်းဆိုင်ရာ ဆော့ဖ်ဝဲအသုံးပြုနိုင်မှုနှင့် သတင်းအချက်အလက် နည်းပညာဆိုင်ရာ အခြေခံဗဟုသုတများ တိုးတက်စေရန် ရည်ရွယ်၍ သင်ကြားပို့ချပေးခဲ့ခြင်းဖြစ်သည်။
သင်တန်းဆင်းပွဲ အခမ်းအနားတွင် ပြည်သူ့ပါတီ၊ ရွှေပြည်သာမြို့နယ်ဥက္ကဋ္ဌ ဦးသက်မင်းဦး (သင်တန်းနည်းပြ) နှင့် မြို့နယ်အလုပ်အမှုဆောင်အဖွဲ့ဝင်များ၊ ပြည်သူ့ပါတီဗဟိုမှ တာဝန်ရှိပုဂ္ဂိုလ်များ၊ ဖိတ်ကြားထားသော ဧည့်သည်တော်များ တက်ရောက်ခဲ့ကြပြီး သင်တန်းကို အောင်မြင်စွာ ပြီးဆုံးခဲ့သော သင်တန်းသား၊ သင်တန်းသူများအား ဂုဏ်ပြုချီးမြှင့်ခဲ့ကြသည်။
ထို့ပြင် အခမ်းအနားသို့ ရွှေပြည်သာမြို့နယ် ဒုတိယမြို့နယ်ပညာရေးမှူး၊ တိုင်းရင်းသားစည်းလုံးညီညွတ်ရေးပါတီ (တစည) မြို့နယ်ဥက္ကဋ္ဌ၊ တောင်သူလယ်သမားပါတီ မြို့နယ်ဥက္ကဋ္ဌ၊ ပြည်သူ့ရှေ့ဆောင်ပါတီမှ ခရိုင်ဥက္ကဋ္ဌနှင့် မြို့နယ်အလုပ်အမှုဆောင်များ တက်ရောက်၍ သင်တန်းဆင်းသူများအား ဂုဏ်ပြုအားပေးခဲ့ကြသည်။
