19/05/2026
АРЬС ШИРНИЙ САЛБАРЫН ТУЛГАМДСАН АСУУДАЛ, ХӨГЖЛИЙН ГАРЦЫГ ХЭЛЭЛЦСЭН УУЛЗАЛТ ХЭНТИЙ АЙМАГТ АМЖИЛТТАЙ ЗОХИОН БАЙГУУЛАГДЛАА
Монголын арьс ширний үйлдвэрлэлийн холбоо, Хэнтий аймгийн Хөдөө аж ахуйн хоршоологчдын холбоо -той хамтран арьс ширний салбарын өнөөгийн нөхцөл байдал, тулгамдаж буй асуудлыг тодорхойлох, шийдвэрлэх гарц боломжийг хэлэлцэх уулзалт, сургалтыг амжилттай зохион байгууллаа.
Тус уулзалтаар орон нутгийн хоршоод, малчид болон боловсруулах үйлдвэрлэлийн төлөөллүүдтэй хамтран арьс ширний үнэгүйдэл, түүхий эдийн чанар, хадгалалт, тээвэрлэлтийн хүндрэл, эдийн засгийн эргэлтэд оруулах боломжийн талаар дэлгэрэнгүй санал солилцов. Мөн малчдын орлогыг нэмэгдүүлэх, түүхий эдийн үнэ цэнийг өсгөх, боловсруулах үйлдвэрлэлийн уялдаа холбоог сайжруулах чиглэлээр цаашид хэрэгжүүлэх ажлуудыг тодорхойллоо.
Уулзалтад MON IREEDUI CO.,LTD, Булигаар ХК, Их Эргэлт болон арьс ширний салбарын үйлдвэрүүдийн төлөөлөл оролцож, Монгол Улсын арьс ширний салбарыг олон улсын стандартад нийцүүлэн хөгжүүлэх, үйлдвэрүүдийг LWG олон улсын гэрчилгээтэй болгох, тогтвортой гарал үүслийн бүсийг бий болгох, “Бэлчээрээс бүтээгдэхүүн хүртэл” нэмүү өртгийн цогц сүлжээг бүрдүүлэх асуудлыг онцлон хэлэлцэв.
Түүнчлэн Засгийн газрын “Цагаан алт” үндэсний хөтөлбөрийн хүрээнд арьс ширний экспортын зорилтыг хэрэгжүүлэх, малчдын бэлтгэж буй түүхий эдийн чанар, үнэ цэнийг нэмэгдүүлэх зорилгоор улсын хэмжээнд сонгогдсон 5 суманд дараах чиглэлээр үе шаттай ажил хэрэгжүүлж байна. Үүнд:
📌Малын гаралтай өвчлөл, паразитын асуудлыг бууруулах
📌Арьс ширийг стандартын дагуу бэлтгэх, ангилах, хадгалах, тээвэрлэх тогтолцоог бүрдүүлэх
📌Түүхий эдийн анхан болон ахисан шатны боловсруулалтыг хөгжүүлэх
📌Эдийн засгийн эргэлтээс гарсан арьс ширийг дахин эргэлтэд оруулах нөхцөлийг бүрдүүлэх
Мөн хуучны худалдаа бэлтгэлийн ангийн тогтолцоог орчин үеийн хэрэгцээ, шаардлагад нийцүүлэн шинэчлэх, нядалгааны үеийн гэмтэл, исгэлт, тээвэрлэлтийн хүндрэл зэрэг арьс ширний чанарт сөргөөр нөлөөлдөг суурь асуудлуудыг шийдвэрлэхэд онцгойлон анхаарч ажиллаж байна.
Энэхүү хамтын ажиллагаа нь малчдын орлогыг нэмэгдүүлэх, үндэсний үйлдвэрлэлийн өрсөлдөх чадварыг сайжруулах, экспортын боломжийг өргөжүүлэх, арьс ширний салбарын тогтвортой хөгжлийг дэмжихэд чухал ач холбогдолтой юм.
