Монгол Улсын Батлан хамгаалах яам ᠮᠣᠩᠭᠣᠯ ᠤᠯᠤᠰ ᠤᠨ ᠪᠠᠲᠤᠯᠠᠨ ᠬᠠᠮᠠᠭᠠᠯᠠᠬᠤ ᠶᠠᠮᠤ

06/08/2026

5500 ОРЧИМ БАРИЛГА БАЙГУУЛАМЖ, 6500 ГАРУЙ ОРОН СУУЦЫГ БИЕ ДААН БАРЬЖ БАЙГУУЛСАН ТҮҮХТЭЙ
📌Монгол Улсад барилгын салбар үүсэж хөгжсөний 100, Зэвсэгт хүчинд Барилгын цэрэг үүсэж хөгжсөний 90 жилийн ой энэ онд тохиож буй билээ. Тэгвэл тус түүхэн ойн онцлог, ач холбогдлын талаар Зэвсэгт хүчний БИЦУГ-ын даргын орлогч, штабын дарга хурандаа Б.ДОРЖДЭРЭМЭЭС тодрууллаа.

📌Энэ онд тохиож буй Монгол Улсын барилгын салбарын 100, Зэвсэгт хүчинд Барилгын цэрэг үүсэж хөгжсөний 90 жилийн ой ямар онцлог, ач холбогдолтой вэ?

-Энэхүү ой нь өнгөрсөн зуун жилийн бүтээн байгуулалтын түүх, барилгачид болон Барилга-Инженерийн цэргийн үе үеийн алба хаагчдын хөдөлмөр, зүтгэлийг үнэлж дүгнэхийн зэрэгцээ ирээдүйн хөгжлийн зорилт, чиг хандлагыг тодорхойлох чухал ач холбогдолтой юм. Барилга-Инженерийн цэргийн үе үеийн хамт олон улс эх орондоо үйлдвэр комбинат, завод, элеватор, дулааны цахилгаан станц, өндөр хүчдэл, орон сууцны хороолол, авто зам, төмөр зам, усан замын цогц төсөл, төрийн байгууллагуудын барилга байгууламж, тусгай зориулалтын объект, эмнэлэг, сургууль, амралт сувилал, спортын цогцолбор зэрэг олон мянган бүтээн байгуулалтыг гүйцэтгэж, Улаанбаатар хот болон орон нутгийн хөгжилд үнэтэй хувь нэмэр оруулсаар ирсэн түүхтэй. Өнөөдөр Барилга Инженерийн цэрэг нь үндсэн чиг үүргээ амжилттай хэрэгжүүлэхийн зэрэгцээ орчин үеийн техник, технологийг нэвтрүүлэх, мэргэжлийн боловсон хүчнийг бэлтгэх чиглэлээр үйл ажиллагаагаа тасралтгүй өргөжүүлэн хөгжүүлж байна. Тиймээс энэхүү түүхэн ой нь зөвхөн өнгөрсөн хугацааны ололт амжилтыг тэмдэглэх бус, үе үеийн Барилга-Инженерийн цэргийн алба хаагчдын залгамж халаа, эх оронч үзэл, бүтээн байгуулалтын уламжлалыг түгээн дэлгэрүүлэх, залуу үед өвлүүлэн үлдээх чухал ач холбогдолтой гэж харж байна.

📌Барилга-Инженерийн цэрэг өнөөдөр улс эх орон, төр засаг, ард иргэд, Батлан хамгаалах, Зэвсэгт хүчний өмнө хүлээсэн үндсэн үүргээ хэрхэн хэрэгжүүлж байна вэ? Эх орны дайны он жилүүд болон энх цагийн бүтээн байгуулалтаас дурдвал...

-Барилга-Инженерийн үе үеийн дайчид 90 жилийн түүхэн цаг хугацаандаа 1939 оны Халхын голын байлдаан, 1945 оны Чөлөөлөх дайнд улс эх орны батлан хамгаалах чадавхыг бэхжүүлэх, гамшгийн хор уршгийг арилгах болон гамшгийн дараах сэргээн босголтод манлайлан оролцож, үүргээ нэр төртэй биелүүлснийг түүхийн шаргал хуудас бэлхнээ гэрчилдэг.
Тухайлбал, Халхын голын байлдаан эхлэхээс өмнө гурван жилийн дотор Улаанхуарангийн Цэргийн байр, Халуун ус, Цэргийн яамны нэгдсэн барилга, Цэргийн клуб, Цэргийн ерөнхий сургууль, Цэргийн эмнэлэг, Нисэх бригадын барилга, Сонгинын морин заводын барилга, Сонгинын амралт зэргийг барьж, Байшинт, Матад, Тамсагбулаг, Баянтүмэн дэх цэргийн ангиудад барилга угсралт, засварын ажлуудыг хийж, төлөвлөгөөт зорилтоо давуулан биелүүлсэн.

Харин дэлхийн II дайны дараагаас Барилга Инженерийн цэргийн гүйцэтгэх үүрэг, барилга угсралтын төлөвлөгөө жилээс жилд ихээхэн нэмэгдсэн тул түүний бүтэц, зохион байгуулалтыг өргөтгөн, үйлдвэрлэлийн хүчин чадлыг нэмэгдүүлэх арга хэмжээг тухайн үеийн төр засгаас авч хэрэгжүүлсэн байдаг. Үүний үр дүнд энх цагт Барилга-Инженерийн цэргийн үе үеийн инженер, барилгачин дайчид 1990 оноос өмнөх үйлдвэр аж ахуйн газруудын 85 хувь буюу Улаанбаатар, Дархан, Эрдэнэт, Чойбалсан, Баянцогт, Угтаал, Залуучууд, Жаргалант зэрэг гурван хот, 16 аймаг, 160 гаруй суманд сургууль, цэцэрлэг, эмнэлэг, соёлын төв, спортын ордон, автозам зэрэг 17 тэрбум гаруй төгрөгийн 5500 орчим барилга байгууламж, 6500 гаруй орон сууцыг ашиглалтад оруулан, 11 тэрбум гаруй төгрөгийн барилгын материал-хийц үйлдвэрлэж, зургаан сая орчим тонн ачаа тээврийн үүрэг гүйцэтгэсэн нь түүхэнд мөнхрөн үлдсэн.

Зэвсэгт хүчний Барилга-Инженерийн цэргийн удирдах газар байгуулагдсан цагаас хойших бүтээн байгуулалтаас онцлон дурдвал, “Тавантолгой Зүүнбаян чиглэлийн 416,1 км төмөр зам, Зүүнбаян-Ханги чиглэлийн 226,3 км төмөр зам, Өмнөговь аймгийн Ханбогд сум дахь Автомат удирдлагатай чингэлэг тээврийн терминал зэрэг томоохон 10 гаруй төсөл, “Darkhan United” спорт цогцолбор, Хуурай замын цэргийн командлалын байр, “Бурхан Халдун” хүндэтгэлийн цогцолбор зэрэг улсын болон орон нутгийн төсвийн санхүүжилт, Зэвсэгт хүчний хөгжлийн сангийн хөрөнгө оруулалтаар 280 гаруй барилга байгууламж барьж Зэвсэгт хүчний хөгжлийн санд 44.67 тэрбум төгрөг төвлөрүүлж, улсын төсөвт 25.21 тэрбум төгрөгийн бодит хэмнэлтийг бий болгосон нь улс орны эдийн засгийн тогтвортой байдлыг хангахад чухал ач холбогдолтойгоос гадна Зэвсэгт хүчний Барилга-Инженерийн цэргийн чадавх, мэргэжлийн ур чадварыг бодитоор илтгэн харуулсан бахдам амжилт болсон билээ.

📌Үндэсний их баяр наадмын өмнөхөн Зэвсэгт хүчний Барилга-Инженерийн цэргийн удирдах газар “Хөдөлмөрийн гавьяаны улаан тугийн одон”-г өвлөн авсан бахархалт үйл явдал боллоо. Энэхүү шагналын түүх, ач холбогдлын талаар манай уншигчдад мэдээлэл өгнө үү?

-БНМАУ-ын Ардын Их Хурлын Тэргүүлэгчдийн 1971 оны 77 дугаар зарлигаар Монголын Ардын Армийн 50 жилийн ойг тохиолдуулан эх орныхоо энх цагийн бүтээн байгуулалт, хөгжил цэцэглэлт, нийгэм, эдийн засгийн хөгжилд үнэтэй хувь нэмэр оруулсан Барилгын цэргийн Ерөнхий газрыг “Хөдөлмөрийн гавьяаны улаан тугийн одон”-гоор шагнасан түүхтэй. Барилга-Инженерийн цэргийн хөгжлийг түүхэн цаг хугацаанд нь Барилгын цэргийн хөгжлийн гарааны үе 1936-1947 он, Барилгын цэргийн үүсэл хөгжлийн эхэн үе 1947-1964 он, Барилгын цэргийн эрчимтэй хөгжлийн суурь тавигдсан үе 1964-1973 он, Барилгын цэргийн хөгжлийн оргил үе 1973-1990 он, Барилгын цэргийн хөгжлийн зогсонги үе 1990-2010 он, харин 2010 оноос хойших хугацааг Улс орныг хөгжүүлэх их бүтээн байгуулалтын шинэ үе хэмээн авч үзэх боломжтой юм.

Дээрх төрийн дээд одон нь Барилгын цэргийн хөгжлийн зогсонги үед улс орны эдийн засаг, нийгмийн өөрчлөлттэй холбогдуулан Батлан хамгаалахын сайдын 2005 оны тушаалаар Барилгын цэргийн Ерөнхий газрыг татан буулгасантай холбоотойгоор Батлан хамгаалахын төв архивын сан хөмрөгт хадгалагдах болсон. Харин энэхүү түүхэн одонг Барилга-Инженерийн цэргийн ахмад үеийнхний санаачилга, Монгол Улсын Их Хурлын гишүүн, Засгийн газрын гишүүн, Батлан хамгаалахын сайд Д.Батлутын дэмжлэгтэйгээр үе үеийн инженер, барилгачин дайчдынхаа үйл хэргийг нэр төртэйгөөр үргэлжлүүлж яваа Зэвсэгт хүчний Барилга Инженерийн цэргийн удирдах газарт өвлүүлэх тушаал гарсан юм. Ийнхүү “Хөдөлмөрийн гавьяаны улаан тугийн одон” нь Барилгын цэргийн түүхэн замнал, үе үеийн инженер, барилгачин дайчдын хөдөлмөр зүтгэлийн үнэт өв болон бидэнд өвлөгдөн ирсэнд бид бүхэн баяртай байгаа.

📌Үнэтэй мэдээлэл хуваалцсан танд баярлалаа. Сүүлчийн асуултыг танд үлдээе.

-Монгол Улсын батлан хамгаалах, Зэвсэгт хүчний хөгжил, улс орны бүтээн байгуулалтын төлөө сэтгэл, зүтгэл, хүч хөдөлмөрөө зориулсан үе үеийн ахмад дайчид, өнөөдөр энэхүү алдар гавьяаг үргэлжлүүлэн түүчээлж яваа нийт бие бүрэлдэхүүндээ удахгүй тохиох түүхт ойн баярын мэндийг өргөн дэвшүүлж, аз жаргал, сайн сайхан бүхнийг хүсэн ерөөе. Баярлалаа.
Ахлах дэслэгч Ө.НАСАНТОГТОХ

06/08/2026

Ч.ГАНДИРВАА: МЭДЭХГҮЙ , ЧАДАХГҮЙ ГЭЖ ХОЙШ СУУЛГҮЙ, ЧАДДАГ, МЭДДЭГ БОЛОХЫН ТӨЛӨӨ БАЙГААРАЙ
📌Дотоодын болон гадаадын цэргийн их, дээд сургуулийг дүүргэж шинээр томилогдсон шинэхэн офицеруудаа Зэвсэгт хүчний Барилга-Инженерийн цэргийн удирдах газар хүлээн авч, салааны захирагчийн албан тушаалын үүргийг гүйцэтгэхэд нэн шаардлагатай мэдлэг, ур чадвар, дадлага эзэмшүүлэх зорилготой сургалтыг зохион байгууллаа.
📌Сургалтын үеэр БИЦУГ-ын дарга бригадын генерал Ч.Гандирваа Барилга-Инженерийн цэргийн түүхэн замнал, хөгжлийн чиг хандлагыг танилцуулж, албаны туршлага, сургамжаасаа залуу алба хаагчидтай хуваалцсан юм.
📌Энэ үеэр БИЦУГ-ын дарга хэлсэн үгэндээ “Аливаа зүйлийг чадахгүй, мэдэхгүй гэж хойш суухын оронд чаддаг болохын төлөө суралцаж, мэрийдэг байх хэрэгтэй. Ажил, үүргийн хүрээнд хязгаарлагдалгүй цаг үеийн хөгжилтэй хөл нийлүүлэн алхаж, өөрийгөө тасралтгүй хөгжүүлж явахыг эрхэмлээрэй. Байлдагчийн халаасанд генералын мөрдэс байдаг юм шүү. Иймд том итгэл, мөрөөдөлтэй байх хэрэгтэй. Та бүхний ирээдүйд хэн байх нь гагцхүү өөрсдийн тань хичээл, зүтгэлээс шалтгаална. Залхуурч, хойш суухад амьдрал хэтэрхий богино. Мөн хугацаат цэргийн алба хаагчдадаа аавынх нь оронд аав, ахынх нь оронд ах нь байж, хүнлэг, зарчимч хандан цэргийн албаны үнэ цэн, сайн сайхныг мэдрүүлдэг хамгийн ойр дарга нь байгаарай. Ингээд Барилга-Инженерийн цэргээр овоглох эрхэм алдрын эзэд болсон шинэхэн дэслэгч нартаа цаашдынх нь ажил, албанд өндөр амжилт, амьдралд нь сайн сайхан бүхнийг хүсэн ерөөе” хэмээлээ.
📌Энэхүү сургалт нь цэргийн сургуулийн хөтөлбөрт төдийлөн тусгагдаагүй ажлын байрны бодит мэдлэг, удирдах арга барил, практик ур чадварыг эзэмшүүлэхэд чиглэж байгаагаараа онцлог бөгөөд шинэ офицеруудыг албан үүргээ мэргэжлийн түвшинд үр дүнтэй гүйцэтгэхэд бэлтгэх чухал ач холбогдолтой юм.

05/08/2026

"СЭЛЭНГЭ"-ИЙНХЭН "СЭЛЭНГЭ" МӨРНИЙГ ТҮШИГЛЭН УСАН СААДЫГ ГАТЛАХ АЖИЛЛАГААГ ЯВУУЛАВ

🇲🇳🇷🇺 Монгол Улс, ОХУ-ын Зэвсэгт хүчний хамтарсан “Сэлэнгэ-2026” байлдааны буудлагатай хээрийн сургуулийн хоёрдугаар шатанд Зэвсэгт хүчний 234 дүгээр ангийг түшиглэн усан саадыг байлдаантайгаар гатлах ажиллагааг амжилттай зохион байгууллаа.
Хоёр орны инженерийн цэрэг, усчин дайчид "Сэлэнгэ" мөрөнд төлөвлөгөөний дагуу үүргээ амжилттай гүйцэтгэж, хамтын ажиллагаа, тактикийн ур чадвараа бодит нөхцөлд бататгалаа. Энэхүү сургалтын төгсөлд тус ажиллагаанд үүрэг гүйцэтгэсэн зэвсэглэл техникийн ёслолын жагсаал зохион байгуулагдсан юм.

02/08/2026

01/08/2026

🇲🇳 ХӨВСГӨЛ АЙМГИЙН АХМАД ДАЙЧДЫН ГЭР БҮЛ, ҮР ХҮҮХДЭД МОНГОЛ УЛСЫН ЕРӨНХИЙЛӨГЧ ИЛГЭЭЛТ ХҮРГҮҮЛЛЭЭ

🇲🇳 Монгол улсын ерөнхийлөгч, Зэвсэгт хүчний ерөнхий командлагч Khurelsukh Ukhnaa хоймор нутаг, Хөвсгөл аймгаас Чөлөөлөх дайнд оролцож явсан дайчдын үр хүүхдэд түүнийг нотлох архивын баримт бичгийг өвлүүлэн алдаршуулсныг “Бид ялав” медалийн хамт гардууллаа.

🇲🇳 Энэ дайны ялалтаар 1945 онд Төв, Зүүн, Зүүн өмнөд Азийн 5 орон тусгаар тогтнолоо зарлаж байлаа.

🇲🇳 Монгол, Зөвлөлтийн морьт механикжуулсан бүлэг нь аагим халуун, аадар бороо, Цахарын өргөн цөл, урсгал догшин гол мөрнүүдийг туулан, асар богино хугацаанд 1000 гаруй км давшиж, монгол цэргийн тэсвэр тэвчээр, монгол морины шандас хатуужлын гайхамшгийг үзүүлэн байлдааны үүргийг амжилттай биелүүлсэн юм.

🇲🇳 Баатруудын алдар гавьяа үеийн үед, үүрд мөнх дурсагдах болтугай!
#ЕрөнхийлөгчийнИлгээлт
#ЧөлөөлөхДайн
#АхмадДайчдааАлдаршуулъя

01/08/2026

ИХ БҮТЭЭН БАЙГУУЛАЛТ–БИДНИЙ БАХАРХАЛ
📌Монгол Улсын Зэвсэгт хүчний Барилга-Инженерийн цэргийн бие бүрэлдэхүүн улс эх орныг хөгжүүлэх энх цагийн бүтээн байгуулалтад манлайлан оролцсоор байна. Тухайлбал, тэд Баянхонгор аймгийн Шинэжинст сумын “Хотгор”-ын уурхайгаас Өмнөговь аймгийн Нарийнсухайт–Шивээхүрэн боомт хүртэлх 311.6 км хүнд даацын хатуу хучилттай авто замын төслийн 70 км авто замын барилгын ажлыг амжилттай гүйцэтгэж байна.
📌Төслийн хэрэгжилтийн явцтай Зэвсэгт хүчний Барилга-Инженерийн цэргийн удирдах газрын дарга бригадын генерал Ч.Гандирваа танилцаж, бүтээн байгуулалтад үүрэг гүйцэтгэж буй ангиудын хээрийн байрлалд ажиллан техник, тоног төхөөрөмжийн ашиглалт, ажлын явц, төслийн хэрэгжилтийн талаар мэдээлэл сонслоо.
📌Мөн авто замын бүтээн байгуулалтад шаардлагатай техник, тоног төхөөрөмж болон чулуу бутлуур, бетон зуурмагийн үйлдвэрийн хүчин чадлыг нэмэгдүүлэх, нөхөн хангах хэрэгцээ, судалгааг нэгтгэн шаардлагатай арга хэмжээг үе шаттай авч хэрэгжүүлэхээр болов.
📌Одоогийн байдлаар төслийн хүрээнд 50 км авто замын ус өнгөрүүлэх хоолойн оролт, гаралтын чулуун бэхэлгээ, ус давуулах далан зэрэг хиймэл байгууламж, суурийн болон хучилтын ажлуудыг батлагдсан график төлөвлөгөөний дагуу үргэлжлүүлэн гүйцэтгэж байна.
📌Үүний зэрэгцээ цементээр бэхжүүлсэн суурь болон асфальтан хучилтын ажлыг эхлүүлэх бэлтгэлийг бүрэн хангаж байгаа бол үлдсэн 20 км авто замын чиглэлд геодезийн хэмжилт, трассын тэмдэглэгээ, түр зам байгуулах, өрөмдлөг, тэсэлгээ, ухмалын ажлыг төлөвлөгөөний дагуу гүйцэтгэж байна.
📌Төслийн хэрэгжилтийн явцад хөдөлмөрийн аюулгүй байдал, эрүүл ахуйн шаардлагыг чанд мөрдөж, алба хаагчдыг хамгаалах хувцас, хэрэгсэл, авто замын барилгын зориулалтын техник, тоног төхөөрөмж, геодезийн болон лабораторийн хэмжилтийн багаж хэрэгслээр бүрэн ханган ажиллаж байна.
📌185 тонн хүртэлх даацтай тээврийн хэрэгслийн хөдөлгөөнд зориулан баригдаж буй энэхүү авто зам ашиглалтад орсноор Монгол Улсын экспорт, импортын тээврийн урсгалыг нэмэгдүүлэх, боомтын хүчин чадлыг сайжруулах, уул уурхайн ашигт малтмалын тээвэрлэлтийг илүү аюулгүй, үр ашигтай зохион байгуулахад чухал хувь нэмэр оруулах юм.
#ДамбынБАТЛУТ
#Батланхамгаалахяам
#зэвсэгтхүчнийжанжинштаб
#соёмборедакц

01/08/2026

🇲🇳 ЗЭВСЭГТ ХҮЧНИЙ 342 ДУГААР АНГИД АЖИЛЛАЛАА

▪️ Монгол Улсын Их Хурлын гишүүн, Засгийн газрын гишүүн, Батлан хамгаалахын сайд Д.Батлут Зэвсэгт хүчний 342 дугаар ангид ажиллаж, ангийн үйл ажиллагаа, бүтээн байгуулалтын явц, алба хаагчдын ажиллах, амьдрах орчин нөхцөлтэй танилцлаа.

▪️Зэвсэгт хүчний 342 дугаар анги нь Барилга-инженерийн цэргийн бүрэлдэхүүн бөгөөд байлдааны болон дайчилгааны бэлэн байдлыг хангахын зэрэгцээ улсын бүтээн байгуулалт, инженерийн дэд бүтэц, гамшгаас хамгаалах ажиллагаанд чухал үүрэг гүйцэтгэдэг юм.

▪️Тус анги байгуулагдсан цагаасаа хойш эх орны томоохон бүтээн байгуулалтад идэвхтэй оролцож, газрын тос боловсруулах үйлдвэрийн авто зам, Улаанбаатар–Дархан, Шинэжинст–Шивээхүрэн, Улаанбаатар–Арвайхээр–Хужирт чиглэлийн авто замын төслүүд, Тавантолгой–Зүүнбаян, Зүүнбаян–Ханги зэрэг стратегийн ач холбогдол бүхий төмөр замын бүтээн байгуулалт, чулуу бутлуурын үйлдвэрлэл, гүний усны худгийн ажлуудыг амжилттай хэрэгжүүлэн улс орны хөгжилд бодит хувь нэмэр оруулж ирсэн.

▪️ Батлан хамгаалахын сайд Д.Батлут ангийн нийт бие бүрэлдэхүүнтэй уулзах үеэр Засгийн газраас алслагдсан бүсэд байрлах Зэвсэгт хүчний анги, салбарын алба хаагчдын нийгмийн баталгааг сайжруулах чиглэлээр хэрэгжүүлж буй бодлогыг танилцуулж, эрх зүйн шинэчлэлийн хүрээнд алслагдсан бүсэд ажиллаж буй алба хаагчдад таван жил тутамд 30 сарын цалинтай тэнцэх хэмжээний нэг удаагийн нэмэгдэл олгох боломж бүрдсэнийг онцоллоо.

▪️ Мөн бүтээн байгуулалтын ажилд оролцож буй бие бүрэлдэхүүний нэг өдрийн нэмэлт хөлсийг 120 мянган төгрөг болгон нэмэгдүүлэх шийдвэр гарсны үр дүнд Барилга-инженерийн цэргийн алба хаагчид үндсэн цалингаасаа гадна сар бүр дунджаар дөрвөн сая орчим төгрөгийн нэмэгдэл авах нөхцөл бүрдээд байгааг тэмдэглэв.

▪️ Ангийн захирагч дэд хурандаа П.Төрбадрах ангийн эрхэм зорилго, алсын хараа, бүтэц зохион байгуулалт, бие бүрэлдэхүүний чадавх, хэрэгжүүлж буй бүтээн байгуулалтын төслүүд болон тулгамдаж буй асуудлын талаар танилцууллаа. Тэрбээр ангийн штабын барилга, соёл спортын төв, албан тушаалын орон сууцны асуудлыг шийдвэрлэх шаардлагатай байгааг онцлон танилцуулсан юм.

▪️ Үүний хариуд салбарын сайд тулгамдсан асуудлыг үе шаттай шийдвэрлэхээ илэрхийлж, албан тушаалын орон сууцны төслийг эхлүүлэхэд шаардлагатай хөрөнгийг Зэвсэгт хүчний Хөгжлийн сангаар дамжуулан шийдвэрлэх чиглэлээр ажиллахаа мэдэгдэв. Мөн ангийн штабын барилгын хөрөнгийг 2027 оны улсын төсөвт тусгуулах, соёл спортын цогцолборын бүтээн байгуулалтыг үе шаттай хэрэгжүүлэх, алба хаагчдыг ипотекийн зээлд хамруулахад дэмжлэг үзүүлж ажиллахаа илэрхийллээ.

▪️ Архангай аймгийн Засаг дарга Б.Цэрэннадмид орон нутгийн зүгээс эрх үүргийн хүрээнд хамтран ажиллаж, дэмжлэг үзүүлэхээ мэдэгдэв.

▪️Уулзалтын төгсгөлд Батлан хамгаалахын сайд Д.Батлут салбартаа ажил үйлс, ур чадвар, хичээл зүтгэлээрээ манлайлан ажилласан алба хаагчдад “Дайчин алдар”, “Эх орны төлөө” медалийг гардуулан өгч, цаашдын ажил үйлсэд нь амжилт хүслээ.

▪️ Ажлын уулзалтад салбарын сайдын хамт Батлан хамгаалахын сайдын зөвлөх дэслэгч генерал Г.Сайханбаяр, Барилга-инженерийн цэргийн удирдах газрын дарга бригадын генерал Ч.Гандирваа, Архангай аймгийн Засаг дарга Б.Цэрэннадмид болон холбогдох удирдлагууд оролцов.

31/07/2026

Г.ГАНХУЯГ: ААВ МИНЬ ДАЙНЫ ОН ЖИЛҮҮДЭД ЦАНГАХДАА МОРИНЫХОО ШЭЭСИЙГ УУЖ, ӨЛСӨХДӨӨ ЗУРАМ АГНАЖ ИДДЭГ БАЙСАН ТУХАЙГАА ХУУЧИЛДАГ БАЙЛАА
🇲🇳 Монгол улсын ерөнхийлөгч, Зэвсэгт хүчний ерөнхий командлагч Khurelsukh Ukhnaa анхдагчдын өлгий Булган нутгийн Чөлөөлөх дайнд оролцож явсан ахмад дайчдын гэр бүл, тэдний үр хүүхдэд илгээлт хүргүүллээ.

31/07/2026

ЗЭВСЭГТ ХҮЧИН ШИНЭХЭН ОФИЦЕРУУДААР БҮЛ НЭМЛЭЭ

📌 2026 онд ҮБХИС болон гадаадын цэргийн их, дээд сургуулийг амжилттай төгссөн төгсөгчид "Жанжин туганд" хүндэтгэл үзүүлэх ёслолын ажиллагаа ЗХЖШ-ын жагсаалын талбайд боллоо.
📌 Энэ үеэр гадаадын цэргийн их, дээд сургуулийг төгсөгчдөд ЗХЖШ-ын даргын тушаалаар дэслэгч цол олгож, Монгол Улсын Зэвсэгт хүчний офицерын эгнээнд элссэнийг баталгаажуулав.
📌 Зэвсэгт хүчний бүрэлдэхүүнд бүл нэмж, цэргийн албаны нэр хүндтэй бөгөөд хариуцлагатай замналынхаа эхлэлийг тавьж буй шинэхэн офицеруудад ЗХЖШ-ын дарга дэслэгч генерал С.Ганбямба баяр хүргэн амжилт хүсээд, офицер хүний нэр төр, сахилга хариуцлагыг эрхэмлэн, ажил албандаа эзний ёсоор хандаж, эх орон, ард түмэндээ үнэнчээр зүтгэхийг захисан юм.

30/07/2026