02/06/2026
✅Бүс нутгийн болон олон улсын хүний эрхийг хамгаалах тогтолцоонд бие даан оролцогчийн хувьд Комисс нь Монгол Улсын гадаад бодлогын чухал бүрэлдэхүүн юм.
🔹Комиссын гишүүн Г.Нарантуяа Европын аюулгүй байдал, хамтын ажиллагааны байгууллага (ЕАБХАБ)-ын Аюулгүй байдлын хорооны хуралдаанд илтгэгчээр оролцож, тус байгууллагын гишүүн 57 улсын Засгийн газрын төлөөлөлтэй цахим орчны зохицуулалтын асуудлаар санал солилцлоо.
🔹Монгол Улс нь Зүүн хойд Азийн бүс нутагт ардчилал, хүний эрх, хууль дээдлэх ёсыг эрхэмлэсэн, нээлттэй нийгмийг хөгжүүлэх сонголтоо тууштай хадгалж ирсэн. Иймд тус улсын хувьд цахим орчны зохицуулалт нь зөвхөн технологийн асуудал бус ардчилсан засаглал, хүний эрх, нийгмийн итгэлцэл, аюулгүй байдлын асуудал болж байна.
🔹Цахим орчны туйлшрал нь хүний нийгмийн хэрэгцээ, сэтгэл хөдлөл бүхий контентийн хандалт өндөр байх алгоритмийн тохиргооноос улбаатай, бодит байдалд үл нийцэх итгэл үнэмшлийг бий болгож буй үзэгдэл юм. Иймээс цахим орчны аюулгүй байдлыг хангах нь зөвхөн контентын зохицуулалт хийх бус, платформын дизайныг хүнд ээлтэй болгох, ил тод байдал, хариуцлагыг нь нэмэгдүүлэх, хүний эрхийн нөлөөллийг хянан магадлах, хүүхэд болон нийгмийн эмзэг бүлгийг хамгаалах, олон нийтийн мэдээллийн боловсрол, итгэлцлийг нэмэгдүүлэх, хараат бус сэтгүүл зүй, баримт шалгах механизмийг хөгжүүлэх цогц үйл ажиллагаа байх шаардлагатайг тэмдэглэж, ЕАБХАБ-ын гишүүн орнуудыг Монгол Улс зэрэг хөгжиж буй улсын сонголт, эрх ашгийг хамгаалах, чадавхийг бэхжүүлэхэд хамтран ажиллахыг уриаллаа.
🔹ЕАБХАБ нь Европ, Хойд Америк, Азийн 57 оролцогч улсаас бүрдэх, аюулгүй байдал, энх тайван, ардчилал, хүний эрхийг улс төрийн яриа хэлэлцээ, хамтын ажиллагаагаар дэмжих зорилготой, бүс нутгийн аюулгүй байдлын байгууллага юм.
📍Илтгэлийг Англи хэлээр бүрэн эхээр нь эндээс уншина уу.
nhrcm.gov.mn/pdf/OnlineRadicalisation_NGRemarks.pdf
📍Мэдээний дэлгэрэнгүйг эндээс уншина уу: https://nhrcm.gov.mn/ #/page/7/post/view/6918
