26/06/2026
“Улаанбаатар нислэгийн мэдээллийн бүсийн агаарын зайн зохион байгуулалт, зайчлалын стандарт” сэдэвт сургалт, семинар амжилттай зохион байгуулагдлаа.
Иргэний нисэхийн ерөнхий газар нь Тайландын Хаант Улсын “Bearcat” сургалтын байгууллагатай хамтран Монгол Улсын агаарын зайн бүтэц, зохион байгуулалтыг Олон улсын иргэний нисэхийн байгууллагын стандарт, хэтийн чиг хандлагад нийцүүлэн хөгжүүлэх, түүнчлэн “Сайншанд бүсийн нислэгийн хөдөлгөөний удирдлагын хоёр дахь төв” төсөл болон агаарын зайн хэрэглэгчдийн хэрэгцээ, шаардлагыг хангах зорилгоор “Initial Strategic Workshop on Airspace Re-configuration and Separation Standards for UB ACC En-route Environment” сэдэвт сургалт, семинарыг 2026 оны 06 дугаар сарын 24-өөс 26-ны өдрүүдэд амжилттай зохион байгууллаа.
Уг сургалт, семинарыг “Bearcat” сургалтын байгууллагын үүсгэн байгуулагч ноён Ноппадол Прингванич удирдан явуулж, мэргэжлийн туршлага солилцсон бөгөөд тэрээр Олон улсын иргэний нисэхийн байгууллага (ICAO)-ын Ази, номхон далайн бүсийн дэд төвийн захирал, Олон улсын агаарын тээврийн холбоо (IATA)-ны нислэгийн хөдөлгөөний менежмент, инженерчлэл хариуцсан дарга, Тайландын Хаант Улсын “Аэротай” ХХК-ийн Агаарын зайн менежмент болон нислэгийн журам зохиолт хариуцсан газрын дарга зэрэг албан тушаалд ажиллаж байсан иргэний нисэхийн салбарын өндөр туршлагатай мэргэжилтэн, багш юм.
Тус арга хэмжээнд Иргэний нисэхийн ерөнхий газар, “Иргэний нисэхийн үндэсний төв” ТӨХХК, түүний харьяа алба салбарууд, “МИАТ” ТӨХК, “Хүннү эйр” ХХК болон Монгол иргэний агаарын тээврийн нисгэгчдийн холбооноос тус тус иргэний нисэхийн хяналтын байцаагч, нислэгийн хөдөлгөөний удирдагч, нисгэгч, диспатчер, нислэгийн журам зохиогч нарын төлөөлөл оролцож, үзүүлэлтэд тулгуурласан навигаци (PBN), үзүүлэлтэд тулгуурласан холбоо, ажиглалт (PBCS) болон зайчлалын стандартыг Олон улсын иргэний нисэхийн байгууллага (ICAO)-аас баримталж буй бодлого, хэтийн чиг хандлагатай нийцүүлэх зэрэг бусад асуудлаар өргөн хүрээнд хэлэлцэв.
Тус арга хэмжээ нь нийт гурван хоногийн турш амжилттай үргэлжилсэн бөгөөд энэ хугацаанд оролцогчид чөлөөт агаарын зай (Free-Route Airspace), ерөнхий зориулалтын нислэг, хүнгүй агаарын хөлөг болон тусгай зориулалтаар ашиглах агаарын зай болон уулархаг бүс нутгийн сорилтуудыг шийдвэрлэх арга замыг тодорхойлж, Улаанбаатар нислэгийн мэдээллийн бүс (FIR)-ийн агаарын зай, сектор зохион байгуулалтыг шинэчлэх ажлын хэсгийг байгуулан, цаашид үргэлжлүүлэн хамтарч ажиллах тухай хэлэлцлээ.
Мөн аюулгүй байдлын эрсдлийн үнэлгээг хиймэл оюун ухааны тусламжтайгаар хийх боломжтой дэвшилтэт техник, технологитой танилцан, Улаанбаатар нислэгийн мэдээллийн бүсийн “Алтай” секторт агаарын хөлөг хоорондын зайчлалын стандартыг шинэчлэх тохиолдлыг авч үзэн, аюулгүй байдлын эрсдлийг үнэлгээг хийж туршин, дасгал ажилласан.
Энэхүү сургалт, семинар нь нислэгийн үйл ажиллагаанд оролцогч талуудыг нэг дор цуглуулсан, олон улсын мэргэжилтнээс мэргэжлийн зөвлөгөө авч, туршлага солилцсон, цаашдын хамтын ажиллагааг сайжруулахад өндөр ач холбогдолтой арга хэмжээ болж өндөрлөлөө.
