Завхан Стандарт, хэмжил зүйн хэлтэс

13/08/2026

12/08/2026

11/08/2026

🎒 ХҮҮХДИЙН ЦҮНХИЙГ ЗӨВ СОНГОЁ — ЖИЖИГ НУРУУНЫ ЭРҮҮЛ МЭНДИЙГ ХАМГААЛЪЯ

6 настай хүүхэд сургуульд анх орохдоо өдөр бүр цүнх үүрч эхэлдэг. Тиймээс цүнхийг зөвхөн өнгө, загвараар нь бус, хүүхдийн биеийн онцлог, тав тух, аюулгүй байдлыг харгалзан сонгох нь чухал.

📌 Судалгаанд цүнхний ачаалал нэмэгдэхэд хүүхдийн биеийн байрлал, алхалтын хэв маяг өөрчлөгдөж болохыг харуулсан байна.

⚖️ Цүнхний нийт жинг хүүхдийн биеийн жингийн 10%-иас хэтрүүлэхгүй байхыг аюулгүй байдлын үүднээс түгээмэл зөвлөдөг. Жишээлбэл, 20 кг жинтэй хүүхдийн цүнхийг ном, дэвтэр, хэрэгслийн хамт 2 кг-аас илүүгүй байхаар тооцож болно.

🎒 Хоёр мөрөвчтэй, өргөн, зөөлөвчтэй, тохируулгатай цүнх сонгож, хоёр мөрөндөө зэрэг үүрүүлээрэй. Цүнхийг нуруунд ойр, биед эвтэйхэн байрлуулж, хэт доош унжуулахгүй байх нь зүйтэй.

📚 Цүнхийг шаардлагагүй зүйлээр бүү хүндрүүлээрэй. Тухайн өдрийн хичээлийн хуваарийн дагуу зөвхөн хэрэгтэй ном, дэвтэр, хэрэглэлийг хийж хэвшүүлэх нь хамгийн энгийн бөгөөд үр дүнтэй дадал юм.

❤️ Эцэг эхчүүд ээ, хүүхдийн цүнх бол зүгээр нэг хичээлийн хэрэгсэл биш. Өдөр бүр хүүхдийн нуруу, мөрөнд үүрч явдаг ачаа юм.

ЗӨВ СОНГОЛТ — ХӨНГӨН АЧАА — ЭРҮҮЛ НУРУУ.

11/08/2026

ЭЦЭГ ЭХЧҮҮД, ДҮРЭМТ ХУВЦАС АВАХДАА ЮУГ АНХААРАХ ВЭ?

🎒 MNS 6814:2019 стандартын шаардлагад нийцсэн дүрэмт хувцас сонгоно уу.

🔹 Хэмжээ – хүүхдийн биеийн хэмжээнд тохирсон, чөлөөтэй хөдөлгөөн хийх боломжтой байх
🔹 Материал – чанар, ширхэгтийн найрлага стандартын шаардлага хангасан байх
🔹 Эрүүл ахуй – агаар нэвтрүүлэлт, чийг шингээлт сайтай, эрүүл мэндэд сөрөг нөлөөгүй байх
🔹 Оёдол, хийц – бат бөх, цэвэр, чанартай боловсруулалттай байх
🔹 Шошго – үйлдвэрлэгч, хэмжээ, материалын найрлага, арчилгааны мэдээлэл бүрэн байх

📌 Дүрэмт хувцас сонгохдоо өнгө, загвараас илүүтэй хүүхдийн эрүүл мэнд, тав тух, аюулгүй байдлыг нэн тэргүүнд анхаарна уу.

СТАНДАРТАД НИЙЦСЭН БҮТЭЭГДЭХҮҮН — ЧАНАРТАЙ ХЭРЭГЛЭЭ.

10/08/2026

📍СТАНДАРТ, ХЭМЖИЛ ЗҮЙН САЛБАРЫН 2027 ОНЫ ТӨСӨВТ ИРГЭД, МЭРГЭЖИЛТНҮҮДИЙН САНАЛЫГ АВЧ ЭХЭЛЛЭЭ

📈Монгол Улсын Төсвийн тухай хуулийн 28 дугаар зүйлийн дагуу Стандарт, хэмжил зүйн газар (СХЗГ)-аас 2027 оны төсвийн төсөл болон шинээр хэрэгжүүлэх хөрөнгө оруулалтын төсөл, арга хэмжээнд олон нийтийн саналыг нээлттэй цуглуулж байна.

📩Энэхүү санал асуулга нь салбарын бодлого, чиг үүргийг хэрэгжүүлэхэд иргэд, төрийн бус байгууллага, хувийн хэвшил, мэргэжлийн холбоодын бодит оролцоог хангаж, төсвийн төвлөрүүлэн захирагчийн саналд иргэдийн дуу хоолойг тусгах зорилготой юм.
Салбарын хөгжил, хүнсний аюулгүй байдал, чанарын хяналтыг сайжруулахад чиглэсэн хөрөнгө оруулалтын болон зардлын асуудлаар иргэд та бүхэн 2026 оны 8 дугаар сарын 14-ний өдрийг дуустал дараах сувгуудаар саналаа илгээх боломжтой.

Та энэхүү линкээр орж саналаа өгөх боломжтой.
https://forms.gle/JEFKaLNPEGGBhram9

📝Бичгээр хүргүүлэх хаяг: Монгол Улс, Улаанбаатар хот 13343, Баянзүрх дүүрэг, Энхтайваны өргөн чөлөө 46а, Стандарт, хэмжил зүйн газрын 1 дүгээр байр
📧Цахим хаяг: [email protected]
📞Холбоо барих утас: 51-262200

Санал асуулгын үндсэн чиглэлүүд:
Төсвийн төслийн санал асуулга нь дараах үндсэн асуудлуудыг хамруулж байна. Үүнд:
1.Техник, чадавхын шинэчлэл: Хэмжлийн нэгжийн үндэсний эталон болон хууль эрхийн хэмжил зүйн техникийн чадавхыг нэмэгдүүлэх тоног төхөөрөмжийн шинэчлэл.
2.Хүнсний аюулгүй байдал: Олон улсын стандартын шаардлага хангасан лабораторийг хөгжүүлж, экспорт болон дотоодын хүнсний өрсөлдөх чадварыг дэмжих багаж хэрэгслийн сайжруулалт.
3.Орон нутгийн дэд бүтэц: Сэлэнгэ аймгийн СХЗХ-ийн барилга, орон нутгийн болон Үндэсний лавлагаа лабораториудын их засвар, ундны усны чанарын тоног төхөөрөмж, мөн салбарт Хиймэл оюун ухаан (AI) болон цахим сан нэвтрүүлэх төслүүд.
4.Төсвийн хуваарилалт ба хэмнэлт: Чиг үүргээ хэрэгжүүлэхэд шаардлагатай химийн урвалж, судалгаа шинжилгээний зардлыг нэмэгдүүлэх болон бичиг хэрэг, тээвэр шатахуун зэрэг хэмнэж болох зардлын сонголтууд.
👨‍💼Иргэн бүрийн оролцоо салбарын чанар, аюулгүй байдлын стандарт, хэмжил зүйн ирээдүйн хөгжилд чухал хувь нэмэр болох тул идэвхтэй оролцохыг уриалж байна.

10/08/2026

ХУДАЛДААНЫ ТҮР ХЭЛЭЛЦЭЭРИЙГ ХЭРЭГЖҮҮЛЭХ ХҮРЭЭНД СУРГАЛТ, ХАМТЫН АЖИЛЛАГААГ ЭРЧИМЖҮҮЛЖ БАЙНА

🔹Стандарт, хэмжил зүйн газар болон ОХУ-ын Техникийн зохицуулалт, хэмжил зүйн агентлагийн хооронд байгуулсан 2026–2028 оны хамтын ажиллагааны төлөвлөгөөний хүрээнд Евразийн эдийн засгийн холбооны хүнсний бүтээгдэхүүн, тэр дундаа мах, сүүн бүтээгдэхүүнд мөрдөгдөх техникийн зохицуулалт (TR/CU)-ын талаар цахим сургалтыг 2026 оны 4 дүгээр сарын 29-ний өдөр хамтран зохион байгуулж, Монголын талаас 60 гаруй төлөөлөгч хамрагдсан.

✍️ Мөн 2026 оны 5 дугаар сарын 27–28-ны өдрүүдэд "Оросын Холбооны Улс болон Евразийн эдийн засгийн холбооны техникийн зохицуулалтын систем: өнөөгийн байдал ба хөгжлийн чиглэлүүд", "Техникийн зохицуулалт ба стандартчиллын онцлог (ноолуур)" сэдвээр цахим сургалтыг амжилттай зохион байгуулсан.

✅Цаашид Худалдааны түр хэлэлцээрийг үр дүнтэй хэрэгжүүлэх хүрээнд дараах арга хэмжээг үе шаттайгаар хэрэгжүүлэхээр төлөвлөн ажиллаж байна. Үүнд:

Монгол Улс болон Евразийн эдийн засгийн холбоонд мөрдөгдөж буй техникийн зохицуулалт, стандарт дахь аюулгүй байдал болон техникийн шаардлагын үзүүлэлтүүдийн нийцлийг харьцуулан судлах;

Хоёр талын худалдаанд мөрдөгдөж буй техникийн зохицуулалт, стандартыг харилцан зөвшөөрөхтэй холбоотой арга хэмжээг холбогдох байгууллагуудтай хамтран хэрэгжүүлэх;

Шинжилгээний аргын стандарт, аргачлал, түүний үр дүн, дүгнэлтийг харилцан зөвшөөрөх чиглэлээр хамтын ажиллагааг өргөжүүлэх;

Тохирлын мэдэгдэл (Декларирование соответствия)-ийг харилцан зөвшөөрөх тогтолцоог бүрдүүлэхтэй холбоотой арга хэмжээг хэрэгжүүлэх.

🔹Монгол Улс болон Евразийн эдийн засгийн холбоо, түүний гишүүн орнуудын хооронд байгуулсан Худалдааны түр хэлэлцээрийн хүрээнд харилцан нийлүүлэх 367 нэр төрлийн бараа, бүтээгдэхүүн экспортлох, импортлох аж ахуйн нэгж, байгууллагуудад Стандарт, хэмжил зүйн газар өөрийн эрхлэх асуудлын хүрээнд шаардлагатай мэдээлэл, мэргэжлийн зөвлөгөө, дэмжлэгийг үзүүлэн ажиллана.

🔹Иймд Монгол Улсаас Евразийн эдийн засгийн холбооны гишүүн орнуудад экспортлох, эсвэл Евразийн эдийн засгийн холбооны гишүүн орнуудаас Монгол Улсад импортлох 367 нэр төрлийн бараа, бүтээгдэхүүнтэй холбоотой мэдээллээ урьдчилан Стандарт, хэмжил зүйн газарт ирүүлснээр тухайн бүтээгдэхүүнд хамаарах техникийн зохицуулалт, стандартын талаар дэлгэрэнгүй мэдээлэл, мэргэжлийн зөвлөгөөг шуурхай хүргэж, үйл ажиллагаанд тань бодит дэмжлэг үзүүлэх боломжтой.