31/08/2026
Ġemellaġġ Storiku bejn Ħal Luqa u Gricignano di Aversa – Tiġdid ta’ Rabta ta’ Ħbiberija, Kultura u Tradizzjoni
Il-Kunsill Lokali ta’ Ħal Luqa bi pjaċir iħabbar kapitlu ieħor importanti u storiku fir-relazzjonijiet bejn il-komunità Luqija u l-Belt ta’ Gricignano di Aversa, permezz tat-tiġdid tal-ftehim ta’ Ġemellaġġ bejn iż-żewġ komunitajiet.
Din hija ġrajja memorabbli li l-bidu tagħha jmur lura madwar ħmistax-il sena u li matul is-snin kompliet issaħħaħ ir-rabtiet ta’ ħbiberija, kultura, fidi u tradizzjoni bejn iż-żewġ lokalitajiet.
Iċ-ċerimonja tat-tiġdid tal-Ġemellaġġ saret f’Gricignano di Aversa, waqt iż-żjara tad-delegazzjoni Maltija fl-okkażjoni tal-festa patronali tal-lokalità. Matul iċ-ċerimonja, is-Sindku ta’ Ħal Luqa, is-Sur John Schembri, kien mistieden mis-Sindku ta’ Gricignano di Aversa, id-Dott. Vittorio Lettieri, sabiex iwassal messaġġ fl-okkażjoni tal-festa kif ukoll dwar it-tifsira ta’ dan il-ftehim ta’ Ġemellaġġ bejn iż-żewġ komunitajiet.
F’mument ta’ sinifikat partikolari, is-Sindku Schembri għażel li jwassal il-messaġġ tiegħu mhux biss bil-lingwa Taljana, iżda wkoll bil-lingwa Maltija, filwaqt li esprima l-kburija tiegħu bħala Malti u bħala Luqi. Dan il-ġest intlaqa’ b’merħba kbira u b’applaws minn dawk kollha preżenti.
Fil-messaġġ tiegħu ġie enfasizzat li dan il-Ġemellaġġ imur lil hinn minn sempliċi ftehim formali. Huwa impenn biex iż-żewġ komunitajiet ikomplu jaqsmu l-għarfien, il-kultura u l-esperjenzi tagħhom, isaħħu r-rabtiet ta’ ħbiberija u, fuq kollox, iħarsu u jippromwovu l-fidi u t-tradizzjonijiet li għalihom huma magħrufa kemm Ħal Luqa kif ukoll Gricignano di Aversa.
Il-Kunsill Lokali ta’ Ħal Luqa jirringrazzja lil dawk kollha li taw is-sostenn tagħhom sabiex matul dawn l-aħħar xhur seta’ jitwettaq dan il-pass importanti, b’mod speċjali lill-membri tal-Kumitat tal-Fratellanza tas-Santissimu Sagrament, li kienu parti integrali minn din l-okkażjoni.
Ringrazzjament speċjali jmur lis-Sindku ta’ Ħal Luqa, is-Sur John Schembri, lill-Kappillan, ir-Rev. Kan. Michael Zammit, u lir-Rev. Dun Louis Farrugia għall-impenn u l-kontribut tagħhom.
Fuq kollox, il-Kunsill jesprimi ringrazzjament sinċier lill-ħbieb tagħna minn Gricignano di Aversa, b’mod partikolari lis-Sindku Dott. Vittorio Lettieri u lill-membri tal-Kumitat tal-Festa għall-merħba straordinarja u mill-qalb li taw lid-delegazzjoni Luqija waqt il-festa patronali tagħhom.
It-tiġdid ta’ dan il-Ġemellaġġ huwa xhieda tar-rabta b’saħħitha li nbniet matul is-snin u tal-impenn komuni li din ir-relazzjoni tkompli tikber u tiżviluppa għall-ġenerazzjonijiet futuri.
Ħal Luqa u Gricignano di Aversa huma żewġ komunitajiet b’identità distinta iżda magħqudin minn valuri komuni – il-kultura, il-fidi, it-tradizzjoni, il-ħbiberija u s-sens qawwi ta’ komunità.
Dan huwa kapitlu ieħor li se jibqa’ mnaqqax b’ittri tad-deheb fl-istorja taż-żewġ komunitajiet.
