01/08/2026
9 Kunsilli Lokali jsejħu għal diskussjoni nazzjonali dwar l-istorbju mill-istabbilimenti
Illum ninstabu hawn aħna bħala rappreżentanti tal-Kunsilli Lokali ta’ Ħ'Attard, Ħal-Balzan, ir-Rabat, is-Siġġiewi, l-Iklin, il-Mosta, Ħal-Lija, Ħaż-Żebbuġ u l-Imtarfa bi l-għan li forsi sa fl-aħħar, problema li ilha timpatta b’mod mill-aktar negattiv il-kwalita’ tal-ħajja tar-residenti tal-lokalitajiet tagħna tibda tiġi ndirizzata.
Huwa fatt raġunat li r-residenti jistennew li meta jkunu f’darhom, ikollhom l-opportunita’ li jgawdu ħin ta’ kwiet u mistrieħ.
Jistennew li f’darhom jistgħu jiksbu serħan mill-istorbju li
huwa karatteristiku u normali f’postijiet pubbliċi.
Naturalment huwa ugwalment mingħajr dubju l-fatt li pajjiżna jeħtieġ ekonomija vibranti li tinkludi l-qasam ta’ l-entertainment. Aħna la qatt konna nemmnu u qas qatt ma’ nistgħu naqblu ma’ sitwazzjoni fejn f’pajjiżna ma’ jkunx hemm lok ta’ postijiet ta’ entertainment.
Imma huwa ċar li jeħtieġ li naraw li jkollna bilanċ li filwaqt li jirrispetta d-dritt ta’ dawn l-istabbilimenti li jikbru kummerċjaliment u jattiraw aktar klijenti, ma’ jagħmlux dan a’ skapitu tas-serenita’ u s-saħħa mentali tar-residenti.
Huwa inaċċettabli li f’pajjiżna għandna sitwazzjoni fejn il-liġijiet huma arkajiċi u allura bl-ebda mod ma’ jindirizzaw ir-realajiet tal-llum. Liġijiet li ma’ jgħatu ebda saħħa lill-forzi ta’ l-ordni jew li huma tant vagi li huma diffiċli ħafna sabiex jiġu implimentati.
Ħa nkunu ċari, ħalli ma’ jkunx hemm min jilgħab bid-diskors. It-tħassib tagħna ġej minn użu fuq bażi regolari u sistematiku ta’ apparat ta’ sound li ġimgħa wara l-oħra jikkawża probelmi
serji lir-residenti. Bl-ebda mod ma’ rridu niġu interpretati bħala li qegħdin nipprovaw noħolqu restrizzjonijiet fuq tradizzjonijiet li jsawwru l-identita’ tal-bliet u rħula li aħna nirrapreżentaw għaliex dan assolutament mhuwiex il-każ.
Jekk nħarsu barra min xtutna, jeżistu klabbs, diskoteki u stabbilimenti oħra li jagħmlu użu mill-mużika amplifikata fuq bażi regolari. Imma jeżistu wkoll obbligi legali ta’ passi li jridu jittieħdu sabiex tali użu bl-ebda mod ma’ jfixxkel lil ħaddieħor.
L-appell tagħna huwa sabiex minnufih tinfetaħ diskussjoni nazzjonali dwar dan is-suġġett sabiex nifhmu x’miżuri jista’ jadotta pajjiżna sabiex niksbu bilanċ fejn kulħadd jista’ jopera
mingħajr ma’ jxekkel il-paċi ta’ ħaddieħor. Dan mhuwiex xi appell politiku partiġġjan; dan huwa mqanqal li għandu biss bħala mottiv li sa fl-aħħar ir-residenti tal-lokalitajiet tagħna ma’ jibqawx jum wara l-ieħor, weekend wara l-ieħor vittmi tal-anarkija legali li għandna bħalissa fejn jidħol dan il-qasam.
Jekk naħdmu flimkien u jekk l-istakeholders jinġiebu kollha flimkien m’għandna ebda dubbju li jista’ jintlaħaq bilanċ li jsolvi din il-problema. Nisperaw li dan l-appell ġenwin tagħna ma’ jaqax fuq widnejn torrox, u ninstabu disposti li naħdmu id f’id sabiex jinstabu soluzzjonijiet fattibli u effettivi.
