05/05/2026
L-Awtorità Reġjonali għall-Iżvilupp ta’ Għawdex (GRDA) tilqa’ b'sodisfazzjon l-introduzzjoni ta’ konnessjonijiet marittimi veloċi diretti ġodda li jgħaqqdu lil Għawdex ma’ Buġibba u Tas-Sliema, li jikkumplimentaw is-servizz eżistenti lejn il-Belt Valletta. Dan l-iżvilupp importanti jimmarka pass sinjifikanti ’l quddiem fit-titjib tal-aċċessibbiltà u l-konnettività bejn Għawdex u Malta.
Konnessjonijiet marittimi mtejjba ilhom identifikati bħala prijorità ewlenija fl-Istrateġija Reġjonali għal Għawdex, li tiddeskrivi viżjoni għal gżira aktar konnessa, reżiljenti u ekonomikament vibranti. Iż-żieda ta’ rotot ġodda lejn Buġibba u Tas-Sliema ssaħħaħ in-network tat-trasport, u toffri aktar flessibbiltà, anqas ħinijiet ta’ vvjaġġar u għażliet aktar konvenjenti għar-residenti, il-ħaddiema u l-viżitaturi bl-istess mod.
Il-GRDA tinnota li punti ta’ dħul u tluq diversifikati huma essenzjali biex jappoġġjaw it-tkabbir ekonomiku ta’ Għawdex, partikolarment f’setturi bħat-turiżmu, il-kummerċ u s-servizzi. Billi jespandu l-konnettività lil hinn mill-Belt Valletta, dawn ir-rotot ġodda huma mistennija li jqassmu aħjar il-flussi tal-passiġġieri, inaqqsu l-konġestjoni u jinkoraġġixxu żvilupp reġjonali aktar bilanċjat.
Barra minn hekk, titjib fl-aċċessibbiltà hija kruċjali biex tittejjeb il-kwalità tal-ħajja għar-residenti Għawdxin, tiffaċilita l-ivvjaġġar aktar faċli, aċċess għal servizzi essenzjali, u rabtiet soċjali u ekonomiċi aktar b'saħħithom bejn il-gżejjer.
L-Awtorità ttenni li l-investiment sostnut f'soluzzjonijiet ta' trasport multimodali jibqa' ċentrali biex jintlaħqu l-objettivi fit-tul tal-Istrateġija Reġjonali ta' Għawdex. L-introduzzjoni ta' dawn ir-rotot ġodda tal-katamaran veloċi hija eżempju pożittiv u tanġibbli ta' politika li tittraduċi f'azzjoni.
Il-GRDA tħares 'il quddiem lejn kollaborazzjoni kontinwa mal-partijiet interessati biex tkompli tissaħħaħ aktar il-konnettività u tiżgura li Għawdex ikompli jiżviluppa bħala reġjun dinamiku u attraenti kemm għar-residenti, u kif ukoll għall-viżitaturi.
Ritratt: MaltaToday
