02/09/2026
Arc Usman Darazo Ya Raba Taki Buhu 200 Ga Manoman Ganjuwa-Darazo
A yau Laraba, ɗan takarar kujerar Majalisar Tarayya 2027 na mazabar Ganjuwa/Darazo a jam’iyyar APC, Arc. Usman Ya’u Darazo, ya ƙaddamar da rabon takin zamani buhu 200 ga manoma da sauran masu ruwa da tsaki a mazabar, a wani sabon yunƙuri na ƙarfafa harkokin noma da samar da wadataccen abinci.
Waɗan da su ka ci gajiyar shirin sun haɗa da manoma, jagororin addinai, sarakunan gargajiya, shugabannin jam’iyya, ƙungiyoyin mata da matasa da sauran masu ruwa da tsaki, inda aka zaɓo su daga ward 22 na ƙananan hukumomin Ganjuwa da Darazo.
Kowace ƙaramar hukuma ta samu kaso na buhu 100.
Wannan ba shi ne karon farko da Arc. Usman Darazo ke tallafa wa manoma da takin zamani ba, lamarin da ke ƙara nuna yadda yake mayar da hankali kan bunƙasa noma a matsayin ginshiƙin dogaro da kai, samar da abinci da inganta rayuwar al’ummar yankin.
A ranar 23 ga watan da ya gabata, Arc Usman Darazo ya raba tallafin jari da ya kai kimanin Naira miliyan shida ga mata domin ƙarfafa sana’o’insu da taimaka musu wajen dogaro da kansu.
Da yake bayyana manufar shirin, Darakta-Janar na yakin neman zaben Arc. Usman Ya’u Darazo, Mai Girma Sarkin Soro, Alhaji Abdullahi Shehu Yakubu, ya bayyana rabon takin a matsayin matakin farko cikin jerin ayyukan alheri da Arc. Usman Darazo ya ƙuduri aniyar aiwatarwa domin amfanin al’ummar Ganjuwa-Darazo.
Ya buƙaci shugabannin da aka ɗora wa alhakin raba takin da su tabbatar an gudanar da rabon cikin gaskiya, adalci da riƙon amana.
A nasa jawabin, Sakataren yaƙin neman zaben Arc. Usman Ya’u Darazo, Hon. Sha’abdin Bello Zalanga, ya ce tallafin wani ɓangare ne na hangen nesa na Arc Usman Darazo na ganin an ƙarfafa manoma da sauran ƙananan ’yan kasuwa a mazabar.
Ya ƙara da cewa irin waɗannan shirye-shirye na nuna cewa ci gaban al’umma ne babban abubun da Arc. Usman Darazo ya sa a gaba.
Shi ma Shugaban APC na Ƙaramar Hukumar Ganjuwa, Hon. Abdulrahman Umar, ya yaba da shirin, yana mai cewa tallafin zai taimaka wa manoma wajen rage musu kuɗin noman damina. Ya kuma yi kira ga masu cin gajiyar tallafin da su yi amfani da takin yadda ya kamata domin samun amfanin da ake fata.
Taron rabon takin ya samu halartar tsohon Ɗan Majalisar Jiha, Hon. Sale Umar Nabayi, dukkanin Shugabannin APC na ward, Lobito Group Ganjuwa LGA Contact and Mobilisation, Haj. Sadiya Alhassan, Hon. Ɗanliti Miya, Hon. Halilu Firo, Hon. Aminu Lasisi, Hon. Abdulkadir Madaki Gamji, da sauran shugabannin ƙungiyoyin NURTW, mata da matasa.
🖊️ Kamal Ibrahim
