26/01/2026
Waat zeen weer megatrots det ozze Springdonker Inez de nuuje jeugprinses van ‘t Graasboerriek is gewoore!
Gister sjprong ‘t veur eine bomvolle zaal de buhne op en sjtraolde ‘t van oor tot oor! ❤️💛💚
Inez, maak d’r same mèt prins Stijn en Graasboerin Lia eine te gekke vastelaovend van! Geneet d’r met volle teuge van! Weer sjpichte os al op carnavalsvriedig es geer mèt uch drieën bie os langskomp op sjool!
❤️💛💚—————————❤️💛💚
De proklemasie van Inez I
Waat woor ut sjpannend de lètste paar maondje, mèr eindelik is ut den zao wiet en moog ich ut van de daake sjreeuwe!
Hie sjtaon ich den veur uch, jeugprinses Inez de 1e!
Ich zal mich ieëst ‘ns aeve aan uch veursjtelle.
Ich bön Inez Ermans, 12 jaor auwd. Ich woon saame mit miene pap Cyril, mien mam Mireille, mien zus Isabel en ozze hondj Finn op de Sef Pernotlaan. Ich höb auch nog een groate zus Tess en unne groate broor Cas.
Ich woor blie wie ein klein kèndj toen Raoul en Daniëlle mich den eindelijk koome vraoge of ich dit jaor jeugprinses wilde waere. De pap minstens net zo blie, det ut ‘m den eindelik bie zien veerde kindj toch nog gelök is om dem zo gek te kriege.
Mèr ich hauw hie neet gesjtaon zònger Petro. Doe wis ut veurig jaor al det ich dit ech hieël gaer wauw. Dankjewel dèts ze mich neet bös vergaete. Ich haup det ze de kommende waeke sjtiekem euver òzze sjouwers ein bietje mit kiks.
Ut vastelaovesblood zit bie òs ech in de femilie. Miene pap woor in 2010 groate prins van ut Graasboerriek en daomit veur zien laeve bie de Auwt Prinse en is lid van de Raod van Ellef. Mien zus Tess woor in 2023 de prinses van CV Ònger ’t Viaduct in Maasbracht. Veurig jaor bön ich zelluf bie de jeugraod gegaon en wat höbbe weer al unne haup plezeer saame gehad. Aan de kantj van de mam sjtruimt det vastelaovesblood auch. Mien nichske Cedrique woor de jeugprinses van Puth en Roger, ein van de zangers van Rempetemp, is unne naef van de mam!
Door de waek zit ich in de allerleukste groep 8 van de allerleukste basissjoal De Springdonk bie meister Edwin en juf Natascha, alias Nel. Waat höb ich dao de lètste paar waeke vaak op mien tong mòtte biete en eine haup bie-ein mòtte leege. Nel haet mich aaf en toe toch ech ut vuur aan de sjeene gelag.
In miene vrieje tied sjtaon ich gaer oppe bühne. De afgelaupe jaore höb ich ein paar kieër aan de declamatiewedstrijd van ’t Veldeke mitgedaon en sjtòng toen in de provinciale finale. Auch die leefde veur ut veurdraage, ut leefs mit get humor, haet de pap aan mich doorgegaeve.
Es ich neet dichtend op de bühne sjtaon, den is ut zèngend. Elke moandig gaon ich nao zangles en op de trökwaeg riej ich mit de mam nog get extra rundjes door ut dörp mit de muziek knoerhèl aan en allebei hèl mit kwaakend. Dus, dae Mini op maondigaovend rondj kwart euver ach wo eine haup kabaal oetkoom… det woore weer!
In de res van miene vrieje tied gaon ich nao turne en bootcamp en sjpraek ich gaer aaf mit vriendinne. Den vènj ich ut superleuk om creatief bezig te zeen mit vanalles, of dèt noe teikene, knutsele of bakke is. Ich wis den auch drèk naodet ze mich gevraog hauwe al wie mien pèkske d’r-oet moos zeen en höb dao toen ein teikening van gemaak. Astrid oet Eindhoven, dae naam kump uch inmiddels missjiens waal al bekènd veur, haet miene druim waor gemaak. Mien teikening is noe ein ech pèkske gewoore! Auch ut ontwerp van mien medaille en pinkes, höb ich saame mit de mam zelf bedach en ich bön dao supergreuetsj op!
Es ich den ech neet nao sjool hoof en vakantie höb, den lik ich ut leefste aan ut zjwömbad in Spanje! Dao kint geer mich elke vakansie weer vènje en probeer ich nog get baeter Sjpaans te lieëre kalle! Vamos de fiesta!
Wat vonj ich ut de aafgelaupe waeke auch sjpannend om te heure waem de nuuje prins en nuuj graasboerin zoew waere! Op de galazitting woor ich saame mit mien oma Annie thoes op de Pernotlaan en kòs ich toch ech neet gaon sjlaope veurdet de mam mich hauw geapp en ich wis waem de nuuje prins zou zeen. Miene Prins Stijn I sjtraks naeve mich. Waat weurd det sjiek en biezunjer!
Net zo benuujd woor ich hun waek later nao wae ut nuuj ‘maedje’ naeve mich zou zeen. Dao woor den Graasboerin Lia. Waat zeen weer saame un sjiek drietal!
Leef graasboerinnekes en Graasbuurkes, hie laot ich ut veur noe bie.
Saame mit prins Stijn en Graasboerin Lia begint veur mich noe al de Vastelaovend. Ich höb d’r superveul zin in om saame mit uch allemaol eine onvergaetelijke tied d’r van te maake en wil veur noe aafsjloete mit mien sjpreuk:
Maak plezeer, dans, zèng en lach
De ganse vastelaovend door, daag en nach
Den gaef ich uch op un blaedje:
Deze vastelaovend weurt te gek, mit dit ech Zösters maedje!
