25/06/2026
Den siste Bjørn West soldat har gått av vakt.
Med stor respekt takker vi Sverre Nikolai Sivertsen for innsatsen, og vil med dette lyse fred over hans minne.
TIL MINNE OM BJØRN WEST – SOLDAT NR 154 – SVERRE SIVERTSEN
Det var med sorg me tok i mot meldinga om at Sverre Nikolai Sivertsen døde 15. juni i Bergen.
Sverre vart 101 år.
Med det er den siste Bjørn West-soldat gått av vakt.
Sverre slutta seg til Bjørn West-styrken som soldat nr 154 – våren 1945. Han hadde framfor seg ei tid med hard trening, tunge bører, lange vakter, angrep frå tyske styrker og tap av kameratar i barske Masfjord-fjell.
For oss som berre har opplevd fred og fridom er det vanskeleg å førestilla seg korleis dette påverkar ein.
Etter krigen har Sverre trufast møtt fram på arrangement knytt til historia om Bjørn West – som til dømes Bjørn West-marsjen og årsmøte i Bjørn West-venneforening – så lenge helsa heldt. Alltid med sitt lune smil og smittande humør.
Det er no meir enn 81 år sidan dei to første Bjørn West-soldatane steig i land i Masfjorden. Det var starten på Bjørn West- basen – militæravdelinga som til slutt talde 259 mann under våpen i dei ville Masfjordfjella.
Bjørn West-soldatane var dei første ordinære soldatane under direkte kommando av forsvarsleiinga i London - sidan kapitulasjonen i juni 1940.
Dei skulle operera i okkupert Norge – bak fienden sine linjer – i skjul for lokalbefolkninga – og verta forsynt med alt dei trong frå England og Shetland.
I 1944 starta Sverre med i illegalt arbeid i Bergen. Først med utdeling av aviser, men det vart raskt langt meir alvorleg.
I starten var Sverre ein del av «Saborg» i Bergen. Her var han m.a. med på to bankran i mars 1945. 1. mars mot Fana Sparebank og 16 mars mot Bruvik Sparebank sin filial i Vaksdal. Føremålet var å finansiera motstandsarbeidet samt å gje økonomisk støtte til familiane til offer for den tyske okkupasjonsmakta (les og høyr i BT 12.01.26 https://www.bt.no/nyheter/lokalt/i/jO55q/her-ranet-vi-banken-og-roemte-i-robaat)
Etter å ha halda seg i skjul ei stund fekk han og nokre kameratar hjelp til å slutta seg til Bjørn West i Matrefjella.
I slutten av april sette den tyske okkupasjonsmakta inn store styrker for å ta knekken på Bjørn West – ein gong for alle. Opp mot 800 soldatar vart sett inn mot 259 Bjørn West-soldatar – der om lag 1/3 knapt hadde hatt tid til å gjera våpena stridsklar. Kampane raste i seks døgn – der dei undertallege Bjørn West-soldatane knapt fekk kvila mellom slaga.
Bjørn West gjorde ein imponerande innsats og slo tilbake alle tyske framstøyt.
Kampane i Matrefjella var dei siste i 2. verdskrigen i Noreg.
Seks av Sverre sine medsoldatar vart drepne i Matrefjella desse dagane. I tillegg vart 76 år gamle Torgeir Stordal brutalt henretta – som hemn for at Bjørn West-styrken hadde nytta Stordalen fjellstove – heimen hans - som hovudkvarter.
For oss som berre har opplevd fred og fridom er det vanskeleg å førestilla seg korleis dette påverkar ein.
I djup respekt takker me for din innsats for eit fritt Noreg.
På vegne av Bjørn West-museet lyser me fred over Sverre Nikolai Sivertsen sitt minne.
Arnold Matre
Bjørn West-museet
Foto: Alice Bratshaug / Bergens Tidene (skjermdump frå videoreportasje)
