11/02/2026
Villreinkveld
6. februar arrangerte BDMI villreinkveld på Sunndalsporten på Gjøra. Dette er ein kveld der fjellfolk og villreinjegerar møtes for sosialt- og fagleg påfyll.
Programmet starta med temaet jakt og jaktutøving i villreinfjellet. I samband med tiltaksplan for Snøhetta, er og jakt eit tema. Korleis kan ein drive god jaktutøving og minimere stress for villreinen? Styreleiar Hans Erik Wold hadde ei fin innleiing om temaet, før mikrofonen vart sendt rundt. Det var mange gode innspel og meiningar omkring jaktutøving. Styret noterte seg viktige moment og takkar for engasjementet!
Neste på programmet var Alf Harald Dragseth, ein røynd villreinjeger frå Sunndalsøra. I 2022 gav han ut boka «Jakt- og fiskebuer i Sunndalsfjella», og den boka vart seld ut tvert! No er han godt i gang med neste bok, «Jeger og Læger». Me fekk eit lite innblikk i arbeidet med boka, og ventar spent på at den kjem på slutten av året!
Pause med mat, loddsal og gode samtalar høyrer med. Den timen gjekk fort!
Etter pausa fekk Ingrid Sønsterud Myren frå Norsk villreinsenter Nord ordet. Eit fagleg godt bidrag i programmet, der både kalve- og strukturteljing, FoU-prosjekt og gps-merking, raset i Skirådalen, kalvetapsprosjekt og tiltaksplan vart presentert.
Kvelden vart runda av med loddtrekning og utdeling av fine gevinstar. BDMI takkar Håkon Melkild og Sunndalsporten for god mat og tilrettelegging. Vidare takkar me for oppmøte, og håper folk vil kome att neste år!
