06/08/2026
KLART FOR EIN NY HAUST MED STOR AKTIVITET!
Vi er i gong med ein ny haust og dermed er også aktivitetsnivået i Stordalshallen raskt tilbake til normalen.
Først ute er dei som nyttar grendasalen til sine faste øvingar og etterkvart vil det bli aktivitet der mest kvar einaste kveld. Truleg vil øvingstidene i grendasalen bli som før ferien, men det er naturlegvis også mulig å gjere justeringar og ikkje minst også få plass til nye brukargrupper om det skulle vere ønske om det.
Også denne hausten ligg det an til nytt kurs i yoga i regi av Merete Myklebust. Pensjonisttreffa første onsdagen kvar månad står sjølvsagt også på programmet og då med oppstart den 26. august.
Treningstidene i idrettshallen skal også fordelast etterkvart. Sjølv om mange av fotballaga kjem til å trene utandørs ein god periode fortsatt, kan det vere lurt å melde inn ønska sine så tidleg som mulig. Dette, ikkje minst om det er slik at ein har bestemte ønske i høve til dag og tid. Om det er andre/nye grupper som har ønske om fast treningstid i Stordalshallen er det berre å ta kontakt.
For at det ikkje skal gå for lang tid før ny oversikt kjem på plass, vil vi gjerne at alle som ønsker trenings- og øvingstid i Stordalshallen denne hausten, melder inn ønska sine innan fredag 21. august.
Stordal skule vil sjølvsagt også kome i gong med kroppsøvingsundervisninga si i idrettshallen, så snart nytt skuleår er i gong.
Vi gjentek gjerne at vi må kunne hevde at vi er særs privilegerte med tanke tilgjengelegheit til anlegg/lokale her hjå oss.
FLOTTE ARRANGEMENT!
Også denne sommaren er det gjennomført aktivitetsopplegg som inngjekk som ein del av Barnas Supersommar. Då fekk ein god gjeng med born frå heile kommunen boltre seg i idrettshallen, under leiing av SFO. Ikkje minst var det stas for borna å få vere med på klatreinstruksjon i regi av Robin Aasen og Kjell Mulelid. Vi er verkeleg heldige som har slike eldsjeler.
Når vi no legg sommaren bak oss, tek også arrangementsaktiviteten seg opp att. Sjølv om ikkje alle arrangementa er datofesta enno, kan vi med glede melde at Big Valley Voices førebur konsert siste helga i september og ikkje minst kan vi sjå fram til stor jubileumskonsert med Stordal Hornmusikklag når vi blar om til november månad. Det er ikkje eit reint lite jubileum vi snakkar om heller. Stordal Hornmusikklag vil nemleg då markere at dei er 135 år!
Når det så nærmar seg jul, så veit dei fleste kva det betyr med tanke på flotte arrangement.
Dei mange flotte arrangementa i regi av Stordalshallens Venner og Stordal Revylag må verkeleg også trekkjast fram. Rett før ferien fekk vi vere med på nok ei utgåve av «Visepøbb» og på hausten er det «Oktoberfest» som plar stå på programmet. I tillegg til at arrangement som dette gir oss særs flotte opplevingar, går inntektene til vidare utvikling av nettopp Stordalshallen. Saman med inntektene frå Årsfestane, har dette m.a. gjort det mulig å totalrenovere grendasalen. Etter ein imponerande dugnadsinnsats frå slutten av desember og utover nyåret, framstår denne no som ny. Montering av lydisolerande plater i tak og veggar har - i tillegg - bidratt til perfekt akustikk der. Stordalshallens Venner har også fått betydeleg støtte m.a. frå Sparebanken Møre til denne satsinga, m.a. i form av midlar til innkjøp av meir lydutstyr.
Ein oppgradert og nyoppussa grendasal, bidreg naturlegvis også til at det er blitt endå meir populært å leige Stordalshallen til tilstellingar av ulikt slag og sjølvsagt var det stinn brakke også i samband med Norge sin suksess i fotball-VM.
FLEIRE BESØK UTANFRÅ
Vi har alt fått nye henvendelsar frå lag som ønskjer å legge opp til treningssamlingar i Stordalshallen. Så har vi i tillegg dei som kjem tilbake år etter år. Utfordringa har tidlegare vore å finne ledige helgar til dei mange som ønskjer kome. Dette også på grunn av alle dei flotte arrangementa. Vi oppmodar difor om at dei som har planar om å gjennomføre treningssamlingar, øvingshelgar el.l. om å ta kontakt så tidleg som mulig, for reservering.
TRUFASTE SAMARBEIDSPARTNARAR!
Interessa for reklameplass i Stordalshallen er fortsatt god. Dei fleste av våre samarbeidspartnarar har vore med på laget i fleire tiår og profileringskonseptet vårt er, som tidlegare peika på, den viktigste årsaka til at drifta av Stordalshallen har vore så suksessfull, også reint økonomisk. I tillegg til at dette har bidratt til balanse i rekneskapen, har det også gjort det mulig å investere i utstyr til ein verdi av nærare 2 millionar.
SNART KLART FOR JUBILEUM!
I skrivande stund er det faktisk berre eit halvt år til Stordalshallen kan feire 30 årsjubileum og det må sjølvsagt markerast. Noko av det som skal på plass no, er også ei ny utgåve av den populære «buffen» vår. Dette blir dermed også ei ny muligheit til nettopp å kunne få profilere våre mange gode samarbeidspartnarar.
Då er det berre å sjå fram til ein ny, innhaldsrik haust i Stordalshallen! 🙂
