12/03/2026
I kommunestyremøtet i dag, heldt vår eigen Kristoffer eit svært godt og klokt innlegg i saka om vedtekter for kommunale barnehagar, etterfulgt av eit samrøystes vedtak om løpande barnehageoppta.
Innlegget i sin heilhet kan lesast nedanfor:
Som småbarnsfar, og som lokalpolitikar, kjenner eg på kroppen kor mykje barnehagekvardagen betyr for familiar – i heile Stad. I dag behandlar vi reviderte Vedtekter for kommunale barnehagar, og eg vil særleg løfte fram noko som er avgjerande for både tilflytting, busetting og kvardagslogistikk:
Behovet for løpande opptak i barnehagane våre.
I framlegget til vedtektsendringar ligg det føre at vi skal halde fram med eitt hovudopptak, men at barnehagane kan ha supplerande opptak gjennom heile året når ressursane tillet det.
Dette er viktig, og eg vil understreke kor verdifull denne fleksibiliteten er for eit distriktsamfunn som vårt.
Vi veit at tilflytting ofte skjer «midt i året» – når foreldre får ny jobb, når familiar kjem heim att, eller når folk vurderer å etablere seg her. For mange familiar kan det vere heilt avgjerande at ein ikkje må vente i månadsvis på barnehageplass. Det kan rett og slett vippe avgjerda om dei vel Stad – eller ein annan kommune. Det var i vert fall heilt avgjerande for oss då vi valte å flytte tilbake til Selje sommaren 2021.
Vi konkurrerer om arbeidskraft, om barnefamiliar og om livskraftige bygder. Då må vi tilby ein barnehagepolitikk som møter kvardagen slik den faktisk ser ut.
• Det handlar om likskap, fordi alle familiar – ikkje berre dei som får barn på «rett tid» av året – skal ha like moglegheiter til ein trygg oppstart i barnehagen.
• Det handlar om fridom, fordi familiane skal kunne flytte til Stad utan å risikere lange periodar utan omsorgstilbod.
• Og det handlar om solidaritet, fordi fleksible løysingar treffer dei som treng det mest: dei som ikkje har råd til uløna permisjon eller som står i ein sårbar livssituasjon.
Den viktigaste ressursen i Stad kommune er menneska som bur og arbeider her. Å legge til rette for tilflytting og stabile bumiljø er derfor ei av kjerneoppgåvene til oss lokalpolitikere.
I fleire av bygdene våre er barnehagen ein av dei viktigaste grunnpilarane for å få familiar til å etablere seg. Dersom vi gjer tilbodet mindre føreseieleg ved å snevre inn opptaksmoglegheitene, kan det ramme distrikta spesielt hardt.
Då må vi ikkje svekkje det som er ein av dei få reelle flyttefordelane vi kan tilby: fleksibilitet og nærleik.
Vi er alle her opptatt av ansvarleg økonomisk styring. Men ansvar er ikkje berre å kutte – ansvar er også å investere i tiltak som skaper vekst, innflytting og arbeidskraft.
Supplerande opptak gjennom året krev ikkje nødvendigvis meir ressursbruk – det krev berre at vi brukar kapasiteten klokt. Og som saka viser, er dette allerede mogleg når ressursane tillet det. Dette er ei ordning som gjev mykje verdi for lite kostnad.
I ei tid der vi veit at rekruttering, arbeidskraft og tilflytting er blant dei største utfordringane for Stad kommune, må vi ikkje gjere barnehageopptaket til ein flaskehals.
Løpande opptak er ikkje berre ei barnehagesak. Det er ei distrikts- og samfunnsutviklingssak.
La oss sørge for at Stad kommune held på eit barnehagetilbod som møter folk der dei er – når dei treng det – og som gjer det enklare for familiar å ta valet om å bygge livet sitt her.
