19/06/2026
विकास र बजेटमा युवा सहभागिताको प्रतिवद्धता, अध्यक्षसँग युवा संवाद कार्यक्रम मेल्लेखमा सम्पन्न ।।
असार ५, मेल्लेख
समृद्ध मेल्लेखको आधार, विकास र बजेट निर्माणमा युवा सरोकार भन्ने मूल नाराका साथ अछामको मेल्लेख गाउँपालिकामा ‘युवा सहभागिता संवाद र रूपान्तरण अन्तर्गत अध्यक्षसँग युवा कार्यक्रम मेल्लेखमा सम्पन्न भएको छ ।
मेल्लेख गाउँपालिकाको आयोजना, अछाम मिडिया नेटवर्कको सहजीकरण तथा आस्था नेपाल र वल्र्ड भिजनको साझेदारीमा उक्त कार्यक्रम विहिवार सम्पन्न भएको हो ।
हाम्रो मेल्लेख राम्रा मेल्लेख भन्ने मूल संकल्पका साथ पालिकालाई सफा, स्वच्छ, स्वस्थ र समृद्ध बनाउने अभियान अन्तर्गत युवाहरूको अर्थपूर्ण सहभागिता सुनिश्चित गर्न यो संवाद कार्यक्रमको आयोजना गरिएको हो ।
विकास र बजेट निर्माणमा युवाको विचार समेटिने :
कार्यक्रममा स्थानीय तहको विकास प्रक्रिया, नीति तथा बजेट निर्माणमा युवाहरूको अर्थपूर्ण सहभागिता र भूमिकाका विषयमा सरोकारवालाहरूबीच गहन छलफल भएको छ ।
कार्यक्रमका प्रमुख अतिथि एवं मेल्लेख गाउँपालिका अध्यक्ष ज्वाला सिं साउँदले पालिकाको समग्र विकासका लागि युवाहरूको ऊर्जा र रचनात्मक सुझाव अपरिहार्य रहेको बताउनुभयो । संवादका क्रममा स्थानीय युवाहरूले उठाएका जायज माग, आवश्यकता र योजनाहरूलाई आगामी बजेटमा प्राथमिकताका साथ समेट्ने प्रतिवद्धता समेत अध्यक्षले व्यक्त गर्नुभयो ।
उहाले भन्नुभयो युवाहरूको रचनात्मक सुझाव र सहभागिता विना समृद्ध मेल्लेखको सपना अधुरो रहन्छ । आगामी नीति तथा बजेटमा युवाका भावनालाई सम्बोधन गरिने छ ।
भौतिक, सामाजिक र पर्यटन विकासमा फड्को मार्दै मेल्लेख :
संवाद कार्यक्रममा पालिकाले पछिल्लो समय भौतिक तथा सामाजिक विकासमा मारेको महत्वपूर्ण फड्को र गौरवका आयोजनाहरूका बारेमा समेत जानकारी गराइएको थियो । मेल्लेखले आफ्नै प्रशासनिक भवन निर्माण, पिच सडक, निर्माणाधिन आधारभूत अस्पताल, र बृहत लिफ्टिङ खानेपानी योजना, सबै वडाहरूमा बिजुली तथा इन्टरनेटको पहुँच विस्तार, ऐतिहासिक विमकोट दरबार, छोटी बढीमालिका (नन्दामाता मन्दिर), सुगरदह शहीद पार्क र सातमुल जस्ता गौरवमय सांस्कृतिक तथा प्राकृतिक धरोहरहरूको संरक्षण र विकास गर्दै अघि बढिरहेको छ ।
कृषि र उद्यमशीलता मार्फत युवा स्वरोजगार :
युवाहरूलाई गाउँमै स्वरोजगार बनाउन पालिकाले अघि सारेका दूरगामी योजनाहरूबारे कार्यक्रममा जानकारी गराइएको थियो । पालिकाले एक घर दुई एभोकाडो अभियान तरकारी तथा फलफुल पकेट क्षेत्रको विकास जस्ता कार्यक्रम मार्फत जनताको जिवन स्तर उकास्ने कामभइरहेको पालकिाले जनाएको छ ।
सामाजिक कुप्रथा न्यूनीकरणमा युवा परिचालन
भौतिक विकाससँगै सामाजिक रूपान्तरणका लागि दलित, महिला र युवा क्लबहरूको परिचालन मार्फत समाजमा जरा गाडेर बसेका छाउपडी र बालविवाह जस्ता कुप्रथा न्यूनीकरणका प्रयासहरूलाई तीव्र पारिएको पालिकाले जनाएको छ । सामाजिक सचेतना जगाउन युवा क्लबहरूको भूमिकालाई अझ सशक्त बनाइने निष्कर्ष कार्यक्रमले निकालेको छ ।
साझा यात्राका लागि हार्दिक अध्यक्षको अपिल :
संवाद कार्यक्रमबाट स्थानीय सरकारको कार्यप्रणालीप्रति युवाहरूको बुझाइ बढ्ने र सामाजिक कुरीति विरुद्ध युवा परिचालन थप व्यवस्थित हुने अपेक्षा पालिकाले राखेको छ । समृद्ध मेल्लेख निर्माणको यो साझा यात्रामा सम्पूर्ण युवा, अभियन्ता, राजनीतिक दल, नागरिक समाज र आम सर्वसाधारण सबैलाई रचनात्मक सहयोग र सहभागिताका लागि मेल्लेख गाउँपालिकाले हार्दिक अपिल समेत गरेको छ ।
युवामैत्री बजेट निर्माण गर्न सराेकारवालाकाे सुझाव :
सामाजिक विकास संयोजक प्रेम महरको अध्यक्षतामा भएको कार्यक्रममा गाँउपालिका अध्यक्ष ज्वाला सिं साउँद प्रमुख अतिथी रहनु भएके थियो । प्रशासकीय अधिकृत संगिता ताम्राकारले पालिकाको बजेट निमार्ण प्रक्रिया र भएगरेका विकास निमार्णको वारेमा जानकारी गराउनुभएके थियो भने प्रमुख प्रशासकिय अधिकृत धौलराम शार्की, २ नम्वर वडा अध्यक्ष कुशलराज बुढा, ५ नम्वर वडा अध्यक्ष प्रकाश अधिकारी, गैससकर्मी भ्वानसिह शार्की, जनता नमूना मावीका प्रधानाध्यापक नृप विक, सञ्चारकर्मीहरुले बजेटमा युवाहरुको सहभागिता हुनुपर्नेमा जोड दिदै सुझाव दिएका थिए ।
कार्यक्रममा स्थानीय युवाहरू, बालकल्बका प्रतिनिधि, जनप्रतिनिधिहरू, पत्रकार तथा विभिन्न संघसंस्थाका प्रतिनिधिहरूको सहभातिगा रहेको थियो ।
