14/08/2026
मिति २०८३ श्रावण २८ गते साँझदेखि परेको अविरल वर्षाका कारण राति करिब ११:१० बजे त्रिवेणी नगरपालिका वडा नं. ९, ताम्सु निवासी श्री धर्म थापा र श्री कर्ण थापाको घरमाथिबाट आएको पहिरोले घर पूर्ण रूपमा क्षति भएको तथा सोही पहिरोमा परी १ जनाको दुःखद् निधन र २ जना घाइते हुनुभएको घटनाप्रति त्रिवेणी नगरपालिका परिवार गहिरो दुःख व्यक्त गर्दछ।
उक्त पहिरोमा परी प्रतिक्षा थापाको दुःखद् निधन भएको छ भने श्री धर्म थापा र श्री धौली देवी थापा (रावल) घाइते हुनुभएको छ। घाइते दुवै जनालाई उपचारका लागि जिल्ला अस्पताल, मार्तडी पठाइएको छ।
घटना भएको खबर प्राप्त हुनासाथ राति करिब २:०० बजे नगर प्रमुख श्री कर्ण बहादुर थापा ज्यू, उप–प्रमुख श्री कमला कुमारी जैशी (न्यौपाने) ज्यू लगायतको टोली घटनास्थलतर्फ प्रस्थान गर्नुभएको थियो। त्यसैगरी, बिहान करिब ६:०० बजे प्रमुख प्रशासकीय अधिकृत श्री बुद्धिप्रसाद उपाध्याय ज्यू, विपद् व्यवस्थापन शाखा प्रमुख, प्राविधिक शाखा प्रमुख लगायतको टोली घटनास्थलमा पुगेर खोज तथा उद्धार एवं आवश्यक समन्वयको कार्यमा जुटेको थियो।
खोज तथा उद्धार कार्यमा नेपाली सेना, नेपाल प्रहरी, सशस्त्र प्रहरी बल, नेपाल रेडक्रस सोसाइटी, पत्रकार तथा स्थानीय जनसमुदायको सक्रिय सहभागिता रहेको थियो।
यस दुःखद् घटनामा परी ज्यान गुमाउनुभएकी प्रतिक्षा थापाप्रति भावपूर्ण श्रद्धाञ्जली अर्पण गर्दै शोकसन्तप्त परिवारजनमा गहिरो समवेदना व्यक्त गर्दछौँ। साथै, घाइते श्री धर्म थापा र श्री धौली देवी थापा (रावल) को शीघ्र स्वास्थ्यलाभको कामना गर्दछौँ।
