15/08/2026
राजनीतिमा सधैँ व्यक्तिलाई नै प्रधान मानेर आफ्नो पक्षलाई राम्रो र सही देखाउन बारम्बार प्रयास गरिन्छ। अर्को पक्षको विरोध र भर्त्सना गर्ने परिपाटी सधैँ रहिआएको छ।
हिजोका दिनमा शेरबहादुर देउवा जी सभापति भइरहँदा गगन थापा पक्षलाई साह्रै थिचोमिचो हुन्थ्यो। उहाँहरूसँग न त कुनै सल्लाह-परामर्श हुन्थ्यो, न त उहाँहरूको योगदानको कदर नै हुन्थ्यो। यसप्रति हामी सर्वसाधारण जनताले पनि ठूलो विरोध गर्थ्यौँ र "शेरबहादुर जीले किन सबैलाई मिलाएर नलैजानुभएको?" भनेर प्रश्न गर्थ्यौँ।
तर, जति नै थिचोमिचो गरे पनि अन्तिममा ६०/४० को भागबन्डामा पुगेर कुरा मिल्थ्यो। यो दृश्य हामीले धेरै ठाउँमा देख्यौँ। देउवा जीले जति नै पेल्न खोजे पनि गगन जीले ४० प्रतिशत हिस्सा लिएरै छाड्नुहुन्थ्यो र देउवा जी पनि त्यो परिस्थिति स्वीकार्न बाध्य हुनुहुन्थ्यो।
तर, आज परिस्थिति बिल्कुलै फरक छ। गगन जी सभापति हुनुहुन्छ र केन्द्रीय समितिमा उहाँको १००% स्पष्ट बहुमत (Majority) छ। पार्टीको आधिकारिकता र सम्पूर्ण अधिकार स्वतः गगन जीसँगै छ।
त्यसैले, हिजो जुन विषयमा हामी शेरबहादुर जीलाई प्रश्न गर्थ्यौँ, आज त्यही प्रश्न गगन जीलाई सोध्न मिल्ने कि नमिल्ने?
अब शेरबहादुर देउवा पक्षका नेताहरूको भ्रष्टाचार र कमजोरीलाई मात्र देखाएर उहाँ पन्छिन मिल्दैन होला। यो त विशुद्ध राजनीतिक प्रश्न हो, त्यसैले यसलाई मिलाउन गगन जीले ठूलो प्रयास गर्नुपर्छ। भित्रभित्रै सायद प्रयास गर्नुभएको पनि होला, तर बाहिरबाट हेर्दा त गगन जीले "फुटेर गए जाओस्, जहाँ बढाउनुपर्ने थियो त्यहाँ हुरीले बढारिदियो" भनेजस्तै शैली अपनाउनुभएको हो कि भनेर प्रश्न गर्ने ठाउँ छ।
अहिलेका लागि यो प्रश्न त्यति महत्त्वपूर्ण नदेखिए पनि भविष्यले यो प्रश्नलाई निकै गम्भीरताका साथ जोड्नेछ। उहाँहरूलाई (इतर पक्षलाई) विश्वासमा लिएर उहाँहरूका माग पूरा गर्दा "महाधिवेशनमा म आफैँ कमजोर हुन्छु कि" भन्ने सोच हो भने, लोकतान्त्रिक पार्टीमा त प्रतिस्पर्धा गरेरै आउने हो। यदि उहाँसँग त्यो ल्याकत, आँट र समर्थन छ भने स्पष्टसँग भन्नुपर्यो, उहाँलाई कसले रोक्छ र? आखिर आम जनता त उहाँकै पक्षमा छन् नि, होइन र?
Gagan Thapa
