23/07/2026
आज मिति २०८३ साल साउन ७ गते ज्योति सामुदायिक विकास सेवा नेपालद्वारा महिला सशक्तिकरण कार्यक्रम अन्तर्गत आत्मनिर्भरता, स्वरोजगार तथा उद्यमशीलता प्रवर्द्धन गर्ने उद्देश्यले सञ्चालन गरिएको ५-महिने सिलाई–कटाई तालिमको उद्घाटन समारोह सफलतापूर्वक सम्पन्न भएको छ।
कार्यक्रमको सभापतित्व संस्थाका संस्थापक एवं अध्यक्ष राजन सुनारले गर्नुभएको थियो भने प्रमुख अतिथिका रूपमा भरतपुर महानगरपालिकाका का.वा. नगर प्रमुख चित्रसेन अधिकारीको गरिमामय उपस्थिति रहेको थियो।
त्यसैगरी, विशिष्ट अतिथिहरूमा भरतपुर महानगरपालिका स्वास्थ्य तथा सामाजिक विकास महाशाखाका प्रमुख सुशीला वाग्ले, गैरसरकारी संस्था समन्वय तथा सामुदायिक परिचालन शाखाका शाखा प्रमुख पञ्चमाया तामाङ, तथा भरतपुर महानगरपालिका वडा नं. ११ का वडा सदस्य सागर कुमारको उपस्थिति रहेको थियो।
कार्यक्रममा अतिथिका रूपमा नवजीवन सामुदायिक विकास सेवाका संस्थापक तथा अध्यक्ष किरण खाती, ज्योति सामुदायिक विकास सेवा नेपालका कार्यक्रम संयोजक जीवन गहतराज, संस्थाका प्रतिनिधिहरू जोसेफ गहतराज र राजेन्द्र वि.क., तालिमका प्रशिक्षक प्रभा सेन्चुरी, तालिममा सहभागी प्रशिक्षार्थीहरू तथा विभिन्न क्षेत्रका समाजसेवी एवं सरोकारवालाहरूको उल्लेखनीय सहभागिता रहेको थियो।
कार्यक्रमको सञ्चालन श्री जखडीमाई आधारभूत विद्यालयका प्रधानाध्यापक आशिष गोपाल परियारले गर्नुभएको थियो।
कार्यक्रमलाई सफल बनाउन प्रत्यक्ष तथा अप्रत्यक्ष रूपमा सहयोग, समन्वय र सहभागिता जनाउनुहुने सम्पूर्ण महानुभावहरूप्रति ज्योति सामुदायिक विकास सेवा नेपाल हार्दिक आभार व्यक्त गर्दछ। साथै, तालिममा सहभागी सम्पूर्ण प्रशिक्षार्थीहरूलाई सफल, उपलब्धिमूलक तथा उज्ज्वल भविष्यको हार्दिक शुभकामना व्यक्त गर्दछ।
