06/09/2026
सांसद बुद्धिप्रसाद पन्तको संसद्को चेतावनी यथार्थमा परिणत: वीरगन्ज क्यासिनो काण्डले पुष्टि गर्यो नीतिगत मिलेमतो
काठमाडौं, भदौ २१ (सेप्टेम्बर ६, २०२६): पर्सा क्षेत्र नम्बर १ बाट निर्वाचित राष्ट्रिय स्वतन्त्र पार्टी (रास्वपा)का प्रतिनिधि सभा सदस्य मा. बुद्धिप्रसाद पन्तले संघीय संसद्मा उठाउनुभएको विषय अन्ततः सत्य साबित भएको छ। वीरगन्जको एक क्यासिनोमा स्थानीय प्रशासनका जिम्मेवार सुरक्षा अधिकारी र जनप्रतिनिधि नै जुवा खेलिरहेको अवस्थामा रंगेहात पक्राउ परेपछि सांसद पन्तको पूर्व चेतावनी यथार्थमा परिणत भएको हो।
संसद्मा सांसद पन्तको के थियो चेतावनी?
यसअघि संघीय संसद्को बैठकमा विशेष समय लिँदै सांसद बुद्धिप्रसाद पन्तले वीरगन्जका क्यासिनोहरूमा प्रहरी र स्थानीय प्रशासनको मिलेमतोमा नेपाली नागरिकहरूलाई अवैध रूपमा सहजै प्रवेश गराइने गरेको जनगुनासो सार्वजनिक गर्नुभएको थियो।
संसद्मा बोल्दै उहाँले भन्नुभएको थियो:
"वीरगन्जका क्यासिनोहरूमा स्थानीय प्रहरी र प्रशासनिक अधिकारीहरूको मिलेमतो र सेटिङमा नेपाली नागरिकहरूलाई खुला रूपमा भित्र छिर्न दिइएको छ। यसले गर्दा कयौँ मध्यमवर्गीय परिवार र युवा उद्यमीहरू बर्बादीको बाटोमा लागेका छन्। नियम उल्लंघन गर्ने क्यासिनो र सेटिङ मिलाउने अधिकारीहरूमाथि कडा कारबाही गरियोस्।"
घटनाले पुष्टि गर्यो मिलेमतोको जालो
सांसद पन्तले संसद्मा आवाज उठाएको केही समयमै शनिबार राति वीरगन्ज–१४ गण्डकस्थित क्लार्क रिसोर्टको 'गोल्डेन फिंगर गेमिङ जोन' मा प्रहरीले छापा मार्दा संसद्मा उठाइएको दाबी सही ठहरियो। क्यासिनोबाट इलाका प्रहरी कार्यालय पोखरियाका प्रमुख प्रहरी निरीक्षक (इन्स्पेक्टर) प्रदीप पौडेल र सखुवा प्रसौनी गाउँपालिकाका अध्यक्ष जसवन्त यादव जुवा खेलिरहेकै अवस्थामा पक्राउ परे।
प्रहरी प्रमुख आफैँ आफ्नो कार्यक्षेत्र (पोखरिया) छाडेर सीमा पार गर्दै वीरगन्जको क्यासिनोमा सेटिङकै आधारमा भित्र छिरेको र जनप्रतिनिधिले सरकारी गाडी चढेर जुवा अखडा धाएको भेटिएपछि सांसद पन्तले औँल्याएको प्रशासनिक मिलेमतोको जालो छताछुल्ल भएको छ।
पन्तको माग: छानबिनको दायरा बढाउनु पर्ने
यो घटना सार्वजनिक भएपछि वीरगन्ज र पर्सा क्षेत्रमा सांसद पन्तको संसद् सम्बोधनको भिडियो र भनाइहरू फेरि चर्चामा आएका छन्। यसअघि पनि उनले क्यासिनोमा नेपालीको प्रवेश पूर्ण रूपमा रोक्न र यसमा संलग्न हुने होटल सञ्चालक तथा प्रशासनका अधिकारीलाई कानुनी दायरामा ल्याउन गृह मन्त्रालयको ध्यानाकर्षण गराएका थिए।
स्थानीय बासिन्दाहरूले संसद्मा जनआवाज बुलन्द गर्ने पन्तको प्रयासकै कारण अहिले प्रहरी प्रशासनमाथि दबाब बढेको र यो छापा मारिएको बताएका छन्। हाल पक्राउ परेका प्रहरी निरीक्षक पौडेल र गाउँपालिका अध्यक्ष यादवसहित ८ जनामाथि जिल्ला प्रहरी कार्यालय पर्साले थप अनुसन्धान अघि बढाएको छ।
