29/08/2026
प्रेस विज्ञप्ति
मिति: २०८3/०५ /१३ गते
विज्ञप्ति नं: २०८३-०८४ /०५
विषय: रसुवागढी प्राकृतिक विपत्ति सम्बन्धमा।
नेपाल–चीन सिमाना रसुवागढीमा गएको हिम–चट्टान पहिरोका कारण नदी थुनिएर लेदोसहित भोटेकोशी हुँदै त्रिशूली नदीमा आएको अप्रत्याशित, भीषण र प्रलयंकारी बाढी-पहिरोका कारण देशले ठूलो जनधनको अकल्पनीय क्षति ब्यहोर्नु परेकोमा नेपाल जनता पार्टी गहिरो दुःख व्यक्त गर्दछ।यस प्राकृतिक विपद्मा परी ज्यान गुमाउनुहुने देश-विदेशका आदरणीय नागरिक, पर्यटक, धर्मावलम्बी, सुरक्षाकर्मी, सामाजिक सेवक, कृषक, व्यवसायी लगायत सम्पूर्ण दिवंगत आत्माहरूको चिरशान्तिको कामना गर्दै हाम्रो पार्टी भावपूर्ण श्रद्धाञ्जली अर्पण गर्दछ। साथै, शोक सन्तप्त परिवारजनप्रति हार्दिक समवेदना प्रकट गर्दछौं। विपद्मा परी घाइते हुनुभएका सम्पूर्णको शीघ्र स्वास्थ्य लाभको कामना गर्दै, बेपत्ता हुनुभएका नागरिकहरूको तत्काल कुशल खोजी र उद्धार भई सुरक्षित घर फिर्तीको लागि भगवान पशुपतिनाथसँग प्रार्थना गर्दछौं।यस महाविपत्तिले देशको विकासका पूर्वाधारहरू ध्वस्त पारेको छ भने गम्भीर आर्थिक संकट र पारिस्थितिक असन्तुलन निम्त्याएको छ। नेपाली जनताको सुख र शान्ति खलबलिएको यो अत्यन्तै संवेदनशील समय हो। यस्तो विषम परिस्थिति र संकटबाट पार पाउनका लागि अहिले दृढ राष्ट्रिय एकताको आवश्यकता छ।यो संकटको घडीमा जनसेवामा समर्पित हुनु हाम्रो परम कर्तव्य हो। तसर्थ, नेपाल जनता पार्टी आफ्ना सम्पूर्ण तहका नेता, कार्यकर्ता, भातृ संगठन तथा शुभेच्छुकहरूलाई तत्काल आ-आफ्नो क्षेत्रबाट उद्धार, राहत संकलन तथा वितरण कार्यमा सक्रियताका साथ जुट्न हार्दिक आह्वान गर्दछ। प्रभावित क्षेत्रमा औषधी, खाद्यान्न र सुरक्षित बासस्थान पुर्याउने कार्यमा स्थानीय प्रशासनसँग समन्वय गरी अग्रपंक्तिमा खटिन हामी अपिल गर्दछौँ।साथै, सम्पूर्ण राजनीतिक दल, नागरिक समाज, निजी क्षेत्र र आम सर्वसाधारणलाई पनि आ-आफ्नो स्थानबाट यथाशक्ति योगदान पुर्याउन र एकजुट हुन नेपाल जनता पार्टी हार्दिक आह्वान गर्दछ। राहत, उद्धार र पुनर्निर्माणका कार्यलाई तीव्र गतिमा अघि बढाई देशमा पुनः सुख र शान्ति पुनर्बहाली गर्नका लागि आराध्यदेव भगवान पशुपतिनाथले हामी सबैलाई शक्ति प्रदान गरून्।........................
त्रिभुवन नाथ पाठक
रास्ट्रिय अध्यक्ष
नेपाल जनता पार्टी (NJP)काठमाडौँ, नेपाल
