03/08/2026
शिक्षक सरुवाको विरोधमा हर्कपुर माविमा कक्षा बहिष्कार, विद्यार्थी र अभिभावक धर्नामा
ओखलढुंगा — श्री हर्कपुर माध्यमिक विद्यालयमा कार्यरत एक शिक्षकको शैक्षिक सत्रकै बीचमा गरिएको काज सरुवाको विरोधमा विद्यार्थी तथा अभिभावक आन्दोलनमा उत्रिएका छन्।
आन्दोलनरत पक्षले स्थापित सरुवा निर्देशिकाविपरीत तथा बालबालिकाको शिक्षा र अधिकारमा असर पर्ने गरी सरुवा गरिएको दाबी गर्दै निर्णय तत्काल फिर्ता लिन सम्बन्धित गाउँपालिका, गाउँ शिक्षा समिति, विद्यालय व्यवस्थापन समिति र विद्यालय प्रशासनलाई २४ घण्टे अल्टिमेटमसहित संयुक्त ज्ञापनपत्र बुझाएका छन्।
मागको सुनुवाइ नभएपछि आन्दोलनको पहिलो चरणअन्तर्गत आज विद्यार्थीहरूले विद्यालयको सम्पूर्ण पठनपाठन बहिष्कार गर्दै विद्यालय परिसरमा शान्तिपूर्ण धर्ना दिएका छन्। आन्दोलन परिचालन समितिका अनुसार सरुवा निर्णयले विद्यार्थीको मनोविज्ञान र सिकाइ प्रक्रियामा नकारात्मक प्रभाव पार्ने भएकाले त्यसको विरोध गर्नुपरेको हो।
आन्दोलनरत विद्यार्थी तथा अभिभावकले सम्बन्धित शिक्षकमाथि पूर्वाग्रह र प्रतिशोधका आधारमा सरुवा गरिएको आरोप लगाउँदै उक्त निर्णय तत्काल बदर गर्न माग गरेका छन्।
आन्दोलन पूर्ण रूपमा शान्तिपूर्ण, संयमित र अनुशासित रहने तथा कुनै पनि प्रकारको तोडफोड वा अवाञ्छित गतिविधि नगर्ने प्रतिबद्धता समेत आयोजकले जनाएका छन्। उनीहरूले तोकिएको २४ घण्टाभित्र सरुवा निर्णय फिर्ता नभए भोलिदेखि थप कडा आन्दोलनका कार्यक्रम सार्वजनिक गर्ने चेतावनी दिएका छन्।
स्रोतः आन्दोलनरत विद्यार्थी
