बागचौर नगरपालिका

16/08/2026

कोटवारा स्वास्थ्य चौकीमा निःशुल्क विशेषज्ञ स्वास्थ्य शिविर सम्पन्न ।

बागचौर नगरपालिका–७ स्थित कोटवारा स्वास्थ्य चौकीमा आयोजित निःशुल्क विशेषज्ञ स्वास्थ्य शिविर सम्पन्न भएको छ। “स्वस्थ शरीर, स्वस्थ मन, सुखी जीवन हाम्रो अभियान” भन्ने नारासहित सञ्चालन गरिएको शिविरमा स्थानीय नागरिकले विशेषज्ञ चिकित्सक तथा फिजियोथेरापिस्टबाट निःशुल्क स्वास्थ्य परीक्षण, परामर्श र उपचार सेवा प्राप्त गरेका छन्।

शिविरमा हाडजोर्नी तथा नसारोग विशेषज्ञ डा. राज कृष्ण श्रेष्ठ, अटिजम विशेषज्ञ डा. रघुनन्दन सालाग्राम, मस्कुलोस्केलेटल फिजियोथेरापिस्ट डा. रोशन कुमार वि.क. र न्युरो फिजियोथेरापिस्ट डा. कमला चौधरीले सेवा प्रदान गर्नुभएको थियो।

चिकित्सकहरूले कम्मर, घुँडा तथा जोर्नी दुखाइ, हाडजोर्नी समस्या, हड्डी खिइने, नसासम्बन्धी समस्या, मांशपेशी समस्या तथा बालबालिकामा देखिने अटिजमलगायतका रोगको परीक्षण र परामर्श दिएका थिए। आवश्यकताअनुसार उपचार, व्यायाम र फिजियोथेरापीसम्बन्धी सुझावसमेत प्रदान गरिएको थियो।

ग्रामीण क्षेत्रमा विशेषज्ञ सेवा पुर्‍याउने उद्देश्यले आयोजना गरिएको शिविरले स्थानीयलाई आफ्नै ठाउँमा स्वास्थ्य सेवा लिन सहज बनाएको छ।

शिविरको समापन कार्यक्रममा नगर प्रमुख जनकराज गौतम, वडा नं. ७ का अध्यक्ष प्रेमबहादुर डाँगी, अन्य जनप्रतिनिधि, स्वास्थ्यकर्मी तथा स्थानीयवासीको उपस्थिति रहेको थियो।

नगर प्रमुख गौतमले ग्रामीण क्षेत्रमा यस्ता शिविरले नागरिकलाई प्रत्यक्ष लाभ पुग्ने बताउँदै स्वास्थ्य सेवालाई सबैको पहुँचमा पुर्‍याउन नगरपालिका प्रतिबद्ध रहेको उल्लेख गर्नुभयो। वडा अध्यक्ष डाँगीले पनि यस्ता कार्यक्रमलाई निरन्तरता दिनुपर्नेमा जोड दिनुभयो।

-२०८३ साउन ३१
-बागचौर नगरपालिका सल्यान ।

09/08/2026

श्री बालकन्या माध्यमिक विद्यालयको फिल्ड निर्माण कार्यको अनुगमन

बागचौर नगरपालिका–७ स्थित श्री बालकन्या माध्यमिक विद्यालयको फिल्ड निर्माण कार्यको नगर प्रमुख जनकराज गौतमले स्थलगत अनुगमन गर्नुभएको छ।

अनुगमनका क्रममा निर्माण कार्यको प्रगति, गुणस्तर तथा आवश्यक व्यवस्थापनका विषयमा जानकारी लिँदै निर्धारित मापदण्डअनुसार गुणस्तरीय र समयमै निर्माण कार्य सम्पन्न गर्न सम्बन्धित पक्षलाई आवश्यक सुझाव तथा निर्देशन दिनुभएको छ।

अनुगमनमा वडा नं. २ का वडा सदस्य मोहनलाल डाँगी, विद्यालय व्यवस्थापन समिति अध्यक्ष दामोदर दाहाल, प्रधानाध्यापक चक्रपानी गौतम, यान्त्रिक शाखा प्रमुख पारस खडका, नगर प्रहरी प्रमुख नवराज चन्द, प्रेस सल्लाहकार श्रवण देवकोटा, शिक्षक तथा अभिभावक लगायतको सहभागिता रहेको थियो।

विद्यालयको शैक्षिक वातावरणलाई थप प्रभावकारी बनाउन आवश्यक भौतिक पूर्वाधार विकासलाई नगरपालिकाले प्राथमिकताका साथ अघि बढाउँदै आएको नगर प्रमुख गौतमले बताउनुभयो।

-२०८३ साउन २४
-बागचौर नगरपालिका सल्यान ।

06/08/2026

मानसिक स्वास्थ्य सचेतना महिनाको अवसरमा बागचौरमा निःशुल्क मानसिक स्वास्थ्य शिविर सम्पन्न ।

मानसिक स्वास्थ्य सचेतना महिनाको अवसरमा स्वास्थ्य निर्देशनालय, कर्णाली प्रदेश को आयोजना, CMC–नेपाल को प्राविधिक सहयोग तथा FELM को आर्थिक सहयोगमा सञ्चालित “अपाङ्गता भएका व्यक्तिहरूको समावेशी तथा पहुँचयुक्त सशक्तीकरण परियोजना” अन्तर्गत बागचौर नगरपालिकासँगको समन्वयमा मानसिक स्वास्थ्य शिविर सफलतापूर्वक सम्पन्न भएको छ।

शिविरमा मनोचिकित्सक डा. विवेक रेग्मी तथा तालिमप्राप्त स्वास्थ्यकर्मीहरूको सक्रिय सहभागितामा मानसिक स्वास्थ्य परीक्षण, उपचार तथा मनोपरामर्श सेवा प्रदान गरिएको थियो। यस अवसरमा ४२ जना सेवाग्राहीले मानसिक स्वास्थ्यसम्बन्धी परीक्षण, उपचार र परामर्श सेवा प्राप्त गरेका छन्।

साथै, बागचौर नगरपालिकाअन्तर्गत थारमारे प्राथमिक स्वास्थ्य केन्द्र मा कार्यरत स्वास्थ्यकर्मीहरूको मानसिक स्वास्थ्यलाई प्राथमिकतामा राख्दै मनोचिकित्सक, मनोविद् तथा स्वास्थ्यकर्मीहरूबीच कार्यसम्बन्धी तनाव व्यवस्थापन, आफ्नै मानसिक स्वास्थ्यको संरक्षण तथा स्व–हेरचाह (Self-care) सम्बन्धी अन्तरक्रियात्मक छलफल सम्पन्न गरिएको थियो। स्वास्थ्यकर्मीहरूको मानसिक स्वास्थ्य तथा मनोसामाजिक सुदृढीकरणका लागि विभिन्न स्व–हेरचाह अभ्यासहरू समेत सञ्चालन गरिएको थियो ।

-२०८३ साउन २१
-बागचौर नगरपालिका सल्यान ।

06/08/2026

21/07/2026

घाइते अपाङ्गता भएका व्यक्ति तथा सहिद बेपत्ता परिवारका हकवालाले पाउने जीवन निर्वाह भत्ताका लागि आ.व. २०८३/०८४ मा अद्यावधिक गर्ने सम्बन्धमा ।

20/07/2026

सामाजिक सुरक्षा परिचयपत्र नवीकरण सम्बन्धमा ।

18/07/2026

बागचौर–४ मा २ करोड ४३ लाखमा सेतिगुराँस दलित बस्ती लिफ्ट खानेपानी तथा सरसफाइ आयोजनाको शिलान्यास

२२८ घरधुरी र १ विद्यालय प्रत्यक्ष लाभान्वित हुने

बागचौर नगरपालिका वडा नं. ४ मा २ करोड ४३ लाख ९९ हजार ८ सय २२ रुपैयाँ लागतको सेतिगुराँस दलित बस्ती लिफ्ट खानेपानी तथा सरसफाइ आयोजनाको शिलान्यास गरिएको छ।

बागचौर नगरपालिका, फिनल्यान्ड सरकार तथा युरोपियन युनियनको साझेदारीमा सञ्चालन हुने उक्त आयोजनाबाट २२८ घरधुरी तथा १ वटा विद्यालय प्रत्यक्ष रूपमा लाभान्वित हुनेछन्। आयोजनाले स्थानीय बासिन्दालाई सुरक्षित तथा स्वच्छ खानेपानी उपलब्ध गराउनुका साथै सरसफाइको अवस्था सुधार, पानीजन्य रोग न्यूनीकरण र जनस्वास्थ्य प्रवर्द्धनमा महत्वपूर्ण योगदान पुर्‍याउने अपेक्षा गरिएको छ।

आयोजनाको शिलान्यास बागचौर नगरपालिकाका नगर प्रमुख जनकराज गौतमले गर्नुभएको थियो। कार्यक्रममा उपप्रमुख सुम्निमा डी.सी. वलीको विशिष्ट आतिथ्यता रहेको थियो।

शिलान्यास कार्यक्रममा वडा नं. ४ का वडा अध्यक्ष कृष्णबहादुर बस्नेत, वडा नं. ११ का वडा अध्यक्ष केशबहादुर भण्डारी, वास सल्लाहकार अम्बादत्त अवस्थी, कार्यपालिका सदस्य रेशम बि.क., वडा सदस्य सरोज बि.क., वास सहजकर्ता ठाकुर भण्डारी, स्वास्थ्य शाखाका कार्यरत घनबहादुर पुन, नगर खेलकुद प्रशिक्षक दीपक पुन, पत्रकार तथा स्थानीय बासिन्दाहरूको उल्लेखनीय सहभागिता रहेको थियो।

नगरपालिकाले यस आयोजनामार्फत दलित बस्तीमा स्वच्छ र सुरक्षित खानेपानीको पहुँच विस्तार गर्दै नागरिकको जीवनस्तर सुधार, सरसफाइ प्रवर्द्धन तथा दिगो विकासका लक्ष्य हासिल गर्न थप टेवा पुग्ने विश्वास व्यक्त गरेको छ।

-२०८३ श्रावण १
-बागचौर नगरपालिका सल्यान ।

16/07/2026

बागचौर नगरपालिकाको १६ औँ नगर सभा सम्पन्न ।

बागचौर नगरपालिकाको १६ औँ नगर सभा सम्पन्न भएको छ। नगर सभाले आर्थिक वर्ष २०८३/८४ का लागि रु. ७७ करोड २३ लाख ७५ हजार ३३० बराबरको बजेट, नीति तथा कार्यक्रम र आर्थिक विधेयक पारित गरेको हो।

पारित बजेटमध्ये चालु खर्चतर्फ रु. ५५ करोड ७८ लाख ११ हजार २७९ तथा पुँजीगत खर्चतर्फ रु. २१ करोड ४५ लाख ६४ हजार ५१ विनियोजन गरिएको छ। दुवै शीर्षकको कुल रु. ७७ करोड २३ लाख ७५ हजार ३३० रहेको छ।

नगर सभामा प्रस्तुत नीति तथा कार्यक्रममाथि छलफल गर्दै नीति, कार्यक्रम, बजेट तथा आर्थिक ऐन सर्वसम्मतबाट पारित गरिएको हो।

नगरपालिकाले आगामी आर्थिक वर्षमा शिक्षा, स्वास्थ्य, कृषि, खानेपानी, सडक पूर्वाधार, पर्यटन, रोजगार, सामाजिक सुरक्षा तथा सुशासनलाई प्राथमिकतामा राखी कार्यक्रम सञ्चालन गर्नेछ।

-२०८३ असार ३२
-बागचौर नगरपालिका सल्यान ।