30/08/2026
प्रधानमन्त्रीका अनुसार भोटेकोशी बाढी प्रभावित क्षेत्रबाट हालसम्म ९,४३५ जनाको उद्धार गरिएको छ भने राहत तथा उद्धारका लागि ३९४ वटा हवाई उडान सञ्चालन भइसकेका छन्। प्रभावित क्षेत्रमा नेपाली सेना, नेपाल प्रहरी र सशस्त्र प्रहरी बलका गरी २०,६१८ सुरक्षाकर्मी परिचालन गरिएको छ।
प्रधानमन्त्रीले विभिन्न जलविद्युत् आयोजना क्षेत्रमा खोज तथा उद्धार कार्य तीव्र रूपमा जारी रहेको जानकारी दिएका छन्। माथिल्लो त्रिशूली–१ आसपासबाट दुई दिनमा २५० जनाको उद्धार गरिएको छ भने विभिन्न विद्युत् आयोजना क्षेत्रबाट हेलिकप्टरमार्फत २७९ जनालाई सुरक्षित स्थानमा ल्याइएको छ।
उनका अनुसार माथिल्लो त्रिशूली ३ ‘ए’ आयोजनाको सुरुङमा नेपाली सेनाका इन्जिनियरहरूले ब्लास्टिङ तथा प्वाल फराकिलो पार्ने काम गरिरहेका छन्। घटनास्थलमा विशेषज्ञसहित ९० जनाको संयुक्त टोली परिचालन गरिएको छ। चिनियाँ विशेषज्ञ टोलीले सुरुङभित्र करिब ३ किलोमिटरसम्म खोजी गरे पनि हालसम्म मानिस फेला पर्न नसकेको प्रधानमन्त्रीले बताएका छन्।
बाढीबाट घाइते २६७ जनाको उद्धार गरी उपचार भइरहेको छ भने १५६ जना अस्पतालबाट डिस्चार्ज भइसकेका छन्। रसुवा र नुवाकोटमा २६ वटा आश्रयस्थल तथा राहत वितरण केन्द्र सञ्चालनमा ल्याइएको छ र आइतबार मात्रै ३,४५४ जनाले अस्थायी आश्रय तथा राहत प्राप्त गरेका छन्।
प्रधानमन्त्रीका अनुसार राहत कोषमा हालसम्म ५ अर्ब २४ करोड ७९ लाख ४४ हजार ५८५ रुपैयाँ जम्मा भएको छ। साथै, भारत, चीन, अमेरिका, अष्ट्रेलिया, स्विट्जरल्यान्ड, एडीबी र विश्व बैंकलगायतबाट आर्थिक, प्राविधिक तथा मानवीय सहायता प्राप्त हुने क्रम जारी छ।
हालसम्म बाढीका कारण ज्यान गुमाएका ७८१ जनाको शव फेला परेको प्रधानमन्त्रीले जानकारी दिएका छन्। पहिचान भएका शव आफन्तलाई जिम्मा लगाउने र पहिचान हुन नसकेका शवको डीएनएसहित आवश्यक पहिचान विवरण सुरक्षित राखेर कानुनी प्रक्रियाअनुसार व्यवस्थापन भइरहेको उनले बताएका छन्।
