03/06/2026
Tingnan | Matagumpay na Naisagawa ang Municipal Orientation ng Panahon ng Pagkilos: Philippine Community Resilience Project (PCRP) sa Bayan ng Araceli, Palawan
Isang mahalagang hakbang tungo sa pagbuo ng mas matatag at handang komunidad ang matagumpay na pagsasagawa ng Municipal Orientation para sa Panahon ng Pagkilos: Philippine Community Resilience Project (PCRP) noong ika-2 ng Hunyo 2026 sa Municipal Covered Gymnasium, Poblacion, Araceli, Palawan.
Ang nasabing aktibidad ay pinangunahan ng Area Coordinating Team at Municipal Coordinating Team (ACT/MCT) sa pangunguna ni Project Development Officer III/Area Coordinator Ma. Luz P. Daculap, kasama ang buong ACT at MCT ng Araceli. Naging tampok na tagapagsalita si Engr. Villamor C. Racca, Jr., Project Development Officer IV - Capability Building Officer mula sa Regional Program Management Office (RPMO) na nagbigay ng malawak na talakayan hinggil sa mga layunin, proseso, at mahahalagang bahagi ng implementasyon ng PCRP.
Dinaluhan ang oryentasyon nina Municipal Mayor Hon. Sue S. Cudilla, Municipal Vice Mayor Hon. Rafael V. Abiog, mga miyembro ng Municipal Resilience Team (MResT), mga kinatawan mula sa iba't ibang tanggapan ng lokal na pamahalaan, mga kinatawan ng Civil Society Organizations (CSOs), Indigenous Peoples Mandatory Representative (IPMR), at labintatlong (13) Punong Barangay ng bayan ng Araceli.
Sa isinagawang oryentasyon, tinalakay ang mga sumusunod na mahahalagang paksa:
Pagpapakilala sa Area Coordinating Team at Municipal Coordinating Team (ACT/MCT);
Pangkalahatang Pagpapakilala at Paglalahad ng Panahon ng Pagkilos: Philippine Community Resilience Project (PCRP);
Komposisyon, mandato, at mahahalagang tungkulin at responsibilidad ng Municipal Resilience Team (MResT);
Municipal Profile Format at mga kinakailangang datos bilang paghahanda sa mga susunod na yugto ng proyekto;
Provisional Schedule ng mga pangunahing aktibidad para sa Participatory Resilience and Vulnerability Assessment (PRVA) at Municipal Resilience Plan (MRP);
Municipal Commitment Setting bilang pagpapakita ng suporta at pakikiisa ng lokal na pamahalaan at mga stakeholder sa pagpapatupad ng proyekto; at
Maikling pagpupulong kasama ang mga Punong Barangay upang talakayin ang mga susunod na hakbang at paghahanda para sa implementasyon ng PCRP sa kanilang mga nasasakupan.
Sa kanyang mensahe, binigyang-diin ni Mayor Sue S. Cudilla ang kahalagahan ng sama-samang pagkilos ng pamahalaan at komunidad upang higit na mapalakas ang kakayahan ng bayan na makapaghanda, makatugon, at makabangon mula sa iba't ibang sakuna at epekto ng pagbabago ng klima.
Ang Municipal Orientation ay nagsilbing daan upang higit na maunawaan ng mga kalahok ang kahalagahan ng PCRP bilang isang programa na naglalayong palakasin ang katatagan ng mga komunidad sa pamamagitan ng partisipasyon ng mamamayan, mahusay na pagpaplano, at pagtutulungan ng iba't ibang sektor.
Sa pamamagitan ng pagkakaisa, pakikipagtulungan, at aktibong partisipasyon ng lahat ng sektor, inaasahan na magiging matagumpay ang pagpapatupad ng Panahon ng Pagkilos: Philippine Community Resilience Project sa Bayan ng Araceli tungo sa isang mas ligtas, matatag, at handang komunidad para sa susunod na henerasyon.
