03/08/2026
Nutri-Agri-Aqua Trade Fair 2026: Isang Pagpupugay sa Sektor ng Agrikultura at Pangisdaan, July 31, 2026 @ Aroroy Pier Site Complex
Bilang pagkilala sa kadakilaan at importansya ng sektor ng agrikultura at pangisdaan, isinagawa ng Pamahalaang Bayan ng Aroroy ang Nutri-Agri-Aqua Trade Fair 2026. Layunin nitong maipakita ang yaman ng bayan at ma showcase ang mga produktong lokal na siyang bumubuhay sa mamamayan.
Sa ilalim ng temang “Nutrisyon at Kalikasan, Ating Pangalagaan”, kasabay ng pagdiriwang ng Buwan ng Nutrisyon, tampok ang Search for Best Barangay Producers. Ang patimpalak ay nahati sa dalawang grupo: Coastal Barangay Producers at Inland Barangay Producers, kung saan ipinamalas ng bawat barangay ang kanilang mga produkto, malikhaing disenyo, at aktibong partisipasyon ng komunidad.
Mga Nanalo
Coastal Barangay Producers
1. Matalangtalang
2. Talib
3. Tigbao
4. Tinago
5. Amotag
Inland Barangay Producers
1. Balete
2. Cabangcalan
3. Concepcion
4. Pinanaan
5. Luy-a
Mga Produktong Ipinakita
• Coastal Barangays: sari-saring yamang dagat gaya ng isda, kabibe, at crustaceans; kalakip ang mga produktong agrikultural tulad ng palay, mais, saging, rootcrops, prutas, at gulay.
• Inland Barangays: pangunahing produktong agrikultural tulad ng palay, mais, saging, rootcrops, prutas, at gulay; dagdag pa ang ipinagmamalaking ginto at pilak mula sa kanilang lokal na industriya.
Mga Pamantayan sa Pagpili ng Nanalo
• Mga Produktong Lokal (Mataas ang kalidad, sariwa, at tunay na galing sa barangay) - 15%
• Laki at Dami ng Produkto (Sapat ang dami at maayos ang sukat ng mga nakadisplay) - 10%
• Estetikong Pagkakaayos (Maayos, kaaya-aya, at organisado ang pagkaka-display ng mga produkto) 15%
• Disenyo at Estruktura ng Kubo o Booth (Natatangi at kaakit-akit ang disenyo, Matibay at solid ang pagkakagawa ng estruktura) 30%
• Sustainability Practices (Walang paggamit ng plastik; organikong materyales gaya ng basket at eco-bags ang pinahihintulutan) 10%
• Market Sales Performance (Aktwal na bentahan at galaw ng produkto sa loob ng trade fair) 5%
• Partisipasyon ng Komunidad (Aktibong pakikiisa at suporta mula sa komunidad) 15%
Premyo: 1st – ₱80,000; 2nd – ₱65,000; 3rd – ₱50,000; 4th – ₱35,000; 5th – ₱25,000
Sa kanyang mensahe, pinuri at kinilala ni Mayor Bitoy Virtucio ang sektor ng agrikultura at pangisdaan na, sa kabila ng mga hamon sa ekonomiya at kalusugan, ay patuloy na nagsisilbing haligi ng lipunan. Aniya, sila ang nagbibigay ng pagkain sa bawat hapag, anuman ang estado, antas, o sektor ng mamamayan. Dagdag pa niya, “Mainam na magtrabaho ng marangal kaysa umasa sa ayuda.”
Ang Trade Fair na ito ay nagpapatunay na ang magsasaka at mangingisda ang tunay na bayani ng nutrisyon at kalikasan. Ang kanilang pagsusumikap ay hindi lamang nagdadala ng pagkain at nutrisyon, kundi nagtataguyod din ng pangmatagalang seguridad sa pagkain at pangangalaga sa kapaligiran.
Sa pagtatapos ng Buwan ng Nutrisyon, muling pinaaalala ng Pamahalaang Bayan ng Aroroy na ang nutrisyon at kalikasan ay magkaugnay—at tungkulin nating lahat na pangalagaan ang mga ito para sa susunod na henerasyon.
