23/09/2026
IKA-LIMA NGA SELEBRASYON SANG APO NI CORA | MSWD BINYAGAN ACTIVITY
Ginhiwat sang September 22, 2026 ang ika-lima nga selebrasyon sang Apo ni Cora Binyagan Activity, isa ka makahulugan nga inisyatibo sang Medical Social Work Department (MSWD) sang Corazon Locsin Montelibano Memorial Regional Hospital (CLMMRH) nga nagatinguha nga ma-address ang problema sang mga pasyente nga wala sang legal kag birth documents—isa ka importante nga requirement sa pag-access sang nagkalain-lain nga health kag social protection programs.
Sa sini nga siklo, 44 ka kabataan halin sa aton partner communities, mga pasyente sang CLMMRH, kag mga children in street situations ang nakabaton sang sakramento sang Binyag. Sa mas daku nga hulagway, ini nagdala sa 144 ka kabataan nga nahatagan sang mas klaro nga pagkilala, identity, kag dignidad paagi sa Apo ni Cora.
Ang Apo ni Cora indi lamang isa ka Binyagan. Isa ini ka pagpangamuyo kag pagpaninguha nga ang tagsa ka bata may ngalan, identidad, kag dignidad—kag indi mangin balabag ang kakulang sang dokumento sa ila pag-angkon sang mga oportunidad kag serbisyo nga para sa ila.
Daku gid ang amon pagpasalamat sa CLMMRH Management sa padayon nga pagsuporta kag paghatag sang kinahanglanon nga resources para mapadayon ini nga programa.
Madamo man nga salamat sa Bacolod Cathedral, sa aton bag-o nga Obispo, Most Rev. Louie P. Galbines; sa CLMMRH Sto. Niño Chaplaincy, Rev. Fr. Joachim kag Rev. Fr. William; kag sa Virlanie Faith Foundation sa inyo padayon nga pag-upod sa sini nga misyon.
Pagpasalamat man sa MSWD OPD kag OB, nga amo ang nag-host kag nanguna sa pagpatuman sang sini nga aktibidad; sa Wisey’s Bounce District para sa inflatable slide; King Drey Pop-Up Carts; kag kay Livan Lagrama, nga naghatag kalipay bilang magician kag sa MS Photo para sa aton photobooth kag photography.
Sa kada bata nga ginabunyagan, isa ka bag-o nga istorya ang nagasugod. Sa kada birth certificate nga aton ginabuligan nga maangkon, isa ka identidad ang ginakilala. Kag sa kada bata nga aton ginahatagan sang kahigayunan, isa ka kaugmaon ang aton ginapabakod.
Sa Apo ni Cora, indi lamang kita nagadugang sang numero. Nagadugang kita sang mga kabataan nga may ngalan, may identidad, may dignidad, kag may lugar sa aton komunidad.
Kag sa kada Binyagan, mas nagadako kag nagadamo ang pamilya ni Cora. 44 ka kabataan. 144 na tanan ka istorya. Isa ka pamilya nga nagapadayon sa pag-atipan, pag-amlig, kag paghatag sang dignidad. ❤️
Apo ni Cora — because every child deserves to be known, recognized, and celebrated.
