CADUA UPB

Home
CADUA UPB

Campus Alliance for Dedicated and Unified Action (CADUA) is a homegrown service-oriented political organization from the University of the Philippines-Baguio.

CADUA (Campus Alliance for Dedicated and Unified Action) is a service-oriented political organization composed of alliances and individuals committed to actively addressing the political issues of, and rendering services to, the university and the community. Its primary goal is to promote student participation and collegiate/academic excellence or SPACE. For the interest of the studentry: ACTION. SERVICE. DEDICATION. CADUA!

02/06/2026

Naging matagumpay ang pagdaraos ng 𝐊𝐀𝐃𝐖𝐀 𝐍𝐆𝐀 𝐓𝐔𝐌𝐔𝐋𝐎𝐍𝐆 𝟓.𝟎 – 𝐏𝐚𝐫𝐚 𝐬𝐚 𝐦𝐠𝐚 𝐓𝐬𝐮𝐩𝐞𝐫, isang inisyatibang pinangunahan ng 𝐂𝐀𝐃𝐔𝐀 𝐔𝐏𝐁 katuwang ang 𝐓𝐡𝐞 𝐌𝐚𝐧𝐚𝐠𝐞𝐦𝐞𝐧𝐭 𝐄𝐜𝐨𝐧𝐨𝐦𝐢𝐜𝐬 𝐒𝐨𝐜𝐢𝐞𝐭𝐲 upang magbigay ng suporta sa ating mga tsuper na patuloy na humaharap sa tumitinding krisis pangkabuhayan.

Sa panahon ng walang tigil na pagtaas ng presyo ng langis at mga pangunahing bilihin, lalong nalulugmok ang kabuhayan ng mga tsuper na araw-araw na nagpapagalaw sa ating komunidad. Ngunit sa halip na pabayaan silang pasanin nang mag-isa ang bigat ng krisis, pinili nating kumilos, makiisa, at magbigay ng kongkretong suporta.

Isa itong pagkilala sa mahalagang papel ng mga tsuper sa lipunan at isang paninindigan na ang kanilang laban ay laban din ng mamamayan. Sa pamamagitan ng sama-samang pagkilos ng mga estudyante, organisasyon, at progresibong sektor, pinatutunayan nating may kapangyarihan ang kolektibong pagkakaisa laban sa kapabayaan at kawalang-katarungan.

Taos-pusong pasasalamat sa lahat ng nag-ambag, nakiisa, at sumuporta sa programang ito. Ang bawat donasyon, bawat oras, at bawat pagkilos ay ambag sa pagtatanggol sa kabuhayan at dignidad ng ating mga tsuper.

𝐓𝐮𝐦𝐮𝐥𝐨𝐧𝐠. 𝐌𝐚𝐤𝐢𝐚𝐥𝐚𝐦. 𝐌𝐚𝐤𝐢𝐛𝐚𝐤𝐚.

𝐏𝐚𝐫𝐚 𝐬𝐚 𝐭𝐬𝐮𝐩𝐞𝐫. 𝐏𝐚𝐫𝐚 𝐬𝐚 𝐦𝐚𝐦𝐚𝐦𝐚𝐲𝐚𝐧.

✊🚍

09/05/2026

𝐊𝐀𝐃𝐖𝐀 𝐍𝐆𝐀 𝐓𝐔𝐌𝐔𝐋𝐎𝐍𝐆 𝟓.𝟎 – 𝐏𝐚𝐫𝐚 𝐬𝐚 𝐦𝐠𝐚 𝐓𝐬𝐮𝐩𝐞𝐫

Sa gitna ng mataas na presyo ng langis, mga pangunahing bilihin, at araw-araw na gastusin, lalong bumibigat ang kalagayan ng ating mga tsuper. Habang patuloy silang bumibiyahe upang mapanatili ang galaw ng komunidad, kapalit naman nito ang pagod, kakarampot na kita, at matinding pangambang hindi sapat ang maiuuwi sa kanilang pamilya.

Sila ang mga manggagawang nasa kalsada mula umaga hanggang gabi, nagdadala sa atin sa paaralan, trabaho, at tahanan, ngunit sa panahon ng krisis, sila rin ang isa sa mga sektor na pinakamatinding naaapektuhan. Sa kabila ng kanilang mahalagang papel sa lipunan, nananatiling kulang ang konkretong suporta para sa kanilang kabuhayan at karapatan.

Sa diwa ng kolektibong pagkilos at pakikiisa sa masa, muling inilulunsad ng Campus Alliance for Dedicated and Unified Action (CADUA) ang 𝐊𝐀𝐃𝐖𝐀 𝐍𝐆𝐀 𝐓𝐔𝐌𝐔𝐋𝐎𝐍𝐆 𝟓.𝟎 – 𝐏𝐚𝐫𝐚 𝐬𝐚 𝐦𝐠𝐚 𝐓𝐬𝐮𝐩𝐞𝐫. Layunin ng programang ito na makalikom ng tulong at suporta para sa ating mga jeepney drivers na patuloy na lumalaban sa gitna ng krisis pangkabuhayan.

𝐀𝐧𝐠 𝐛𝐚𝐰𝐚𝐭 𝐦𝐚𝐥𝐢𝐢𝐭 𝐧𝐚 𝐚𝐦𝐛𝐚𝐠 𝐚𝐲 𝐡𝐚𝐤𝐛𝐚𝐧𝐠 𝐭𝐮𝐧𝐠𝐨 𝐬𝐚 𝐩𝐚𝐠𝐩𝐚𝐩𝐚𝐤𝐢𝐭𝐚 𝐧𝐚 𝐡𝐢𝐧𝐝𝐢 𝐧𝐚𝐠-𝐢𝐢𝐬𝐚 𝐚𝐧𝐠 𝐚𝐭𝐢𝐧𝐠 𝐦𝐠𝐚 𝐭𝐬𝐮𝐩𝐞𝐫 𝐬𝐚 𝐥𝐚𝐛𝐚𝐧 𝐧𝐚 𝐢𝐭𝐨.

Kaagapay ng CADUA sa inisyatibong ito ang 𝐓𝐡𝐞 𝐌𝐚𝐧𝐚𝐠𝐞𝐦𝐞𝐧𝐭 𝐄𝐜𝐨𝐧𝐨𝐦𝐢𝐜𝐬 𝐒𝐨𝐜𝐢𝐞𝐭𝐲, na nagsagawa ng isang income-generating program upang makatulong sa pagpopondo ng aktibidad at mas mapalawak pa ang maaabot na tulong para sa ating mga tsuper. Sa pamamagitan ng sama-samang pagkilos ng mga organisasyon at estudyante, pinapatunayan nating may lakas ang kolektibong pagkakaisa sa panahon ng pangangailangan.

Nanawagan kami sa mga estudyante, kabataan, organisasyon, at bawat indibidwal na may kakayahang tumulong na makiisa sa adbokasiyang ito. Sa panahon ng krisis, ang tunay na malasakit ay nasusukat sa ating kakayahang tumindig kasama ng mamamayan.

📌 Para sa donasyon:
GCash: 09812464784
Pangalan: 𝐌𝐞****** 𝐓. 𝐒𝐮****

Tumulong. Makialam. Makibaka.
Para sa tsuper. Para sa mamamayan. ✊

04/05/2026

IN PHOTOS | 𝗜𝗚𝗣 𝗪𝗲𝗲𝗸: 𝗙𝘂𝗻𝗱𝗿𝗮𝗶𝘀𝗲𝗿 𝗳𝗼𝗿 𝗝𝗲𝗲𝗽𝗻𝗲𝘆 𝗗𝗿𝗶𝘃𝗲𝗿𝘀
The Management Economics Society wraps up the recent fundraiser with immense gratitude to everyone who dropped by the UPB Cafeteria. Our hearts and cups are full! More than just a refreshment, every drink sold represents our shared commitment to standing with our transport sector amidst rising costs. A portion of our proceeds is now headed to CADUA to support their initiatives for our local jeepney drivers. 💙💛

—
𝘍𝘳𝘢𝘮𝘦 𝘣𝘺 𝘔𝘢𝘳𝘪𝘢𝘯 𝘗𝘢𝘶𝘭𝘢
𝘊𝘢𝘱𝘵𝘪𝘰𝘯 𝘣𝘺 𝘑𝘢𝘯𝘦𝘭𝘭𝘦 𝘝𝘪𝘭𝘭𝘢𝘯𝘶𝘦𝘷𝘢

01/05/2026

𝐌𝐚𝐛𝐮𝐡𝐚𝐲 𝐚𝐧𝐠 𝐦𝐠𝐚 𝐦𝐚𝐧𝐠𝐠𝐚𝐠𝐚𝐰𝐚! 𝐌𝐚𝐛𝐮𝐡𝐚𝐲 𝐚𝐧𝐠 𝐀𝐫𝐚𝐰 𝐧𝐠 𝐏𝐚𝐠𝐠𝐚𝐰𝐚!

Sa paggunita ng Pandaigdigang Araw ng Paggawa, mariing kinikilala ng 𝐂𝐚𝐦𝐩𝐮𝐬 𝐀𝐥𝐥𝐢𝐚𝐧𝐜𝐞 𝐟𝐨𝐫 𝐃𝐞𝐝𝐢𝐜𝐚𝐭𝐞𝐝 𝐚𝐧𝐝 𝐔𝐧𝐢𝐟𝐢𝐞𝐝 𝐀𝐜𝐭𝐢𝐨𝐧 (𝐂𝐀𝐃𝐔𝐀) ang mahalagang papel ng manggagawang Pilipino sa pagbuo at pagpapatakbo ng lipunan. Sila ang gulugod ng ekonomiya, sa pabrika, sa transportasyon, sa serbisyo, at sa iba’t ibang larangan ng paggawa na patuloy na nagpapagal upang maisulong ang kabuhayan ng bansa.

Ngunit sa kabila ng kanilang napakahalagang ambag, nananatiling bigat sa kanilang balikat ang sunod-sunod na pagtaas ng presyo ng langis at ang kaakibat nitong pagtaas ng pasahe at bilihin. Sa bawat oil price hike, lalong bumibigat ang araw-araw na pamumuhay ng mga manggagawa at kanilang pamilya. Habang patuloy na kumikita ang malalaking kumpanya ng langis, ang karaniwang mamamayan ang siyang napipilitang magtiis, magtipid, at magpasan ng krisis.

Bilang isang organisasyong pulitikal na nagtataguyod ng pagkakaisa at makamasang paninindigan, buong lakas kaming nakikiisa sa panawagan ng uring manggagawa para sa makatarungang sahod, tunay na proteksyon laban sa pagsasamantala sa presyo ng langis, at mga polisiyang tunay na nakatuon sa kapakanan ng nakararami. Ang Araw ng Paggawa ay hindi lamang pagdiriwang, kundi paalala ng nagpapatuloy na laban para sa dignidad, katarungan, at tunay na kalayaan mula sa kahirapan.

Ang kailangan natin ay ang kongkretong pagbabago. Hangga’t nananatili ang sistemang nagpapahirap sa manggagawa habang pinapaboran ang iilan, mananatiling buhay ang ating pakikibaka.

𝐌𝐚𝐤𝐢𝐛𝐚𝐤𝐚 𝐩𝐚𝐫𝐚 𝐬𝐚 𝐦𝐚𝐤𝐚𝐭𝐚𝐫𝐮𝐧𝐠𝐚𝐧𝐠 𝐥𝐢𝐩𝐮𝐧𝐚𝐧!
𝐌𝐚𝐤𝐢𝐬𝐚𝐦𝐚 𝐬𝐚 𝐥𝐚𝐛𝐚𝐧 𝐧𝐠 𝐮𝐫𝐢𝐧𝐠 𝐦𝐚𝐧𝐠𝐠𝐚𝐠𝐚𝐰𝐚!

27/04/2026

𝐈𝐬𝐤𝐨𝐥𝐚𝐫 𝐧𝐠 𝐁𝐚𝐲𝐚𝐧, 𝐩𝐚𝐫𝐚 𝐬𝐚 𝐓𝐬𝐮𝐩𝐞𝐫 𝐧𝐠 𝐁𝐚𝐲𝐚𝐧! 🇵🇭🛺

Habang patuloy nating tinatahak ang daang pasulong, nananatili ang komitment ng 𝗧𝗵𝗲 𝗠𝗮𝗻𝗮𝗴𝗲𝗺𝗲𝗻𝘁 𝗘𝗰𝗼𝗻𝗼𝗺𝗶𝗰𝘀 𝗦𝗼𝗰𝗶𝗲𝘁𝘆 na maging bahagi ng positibong pagbabago sa ating komunidad. Ikinalulugod naming ipahayag ang aming pakikipagtulungan sa 𝗖𝗮𝗺𝗽𝘂𝘀 𝗔𝗹𝗹𝗶𝗮𝗻𝗰𝗲 𝗳𝗼𝗿 𝗗𝗲𝗱𝗶𝗰𝗮𝘁𝗲𝗱 𝗮𝗻𝗱 𝗨𝗻𝗶𝗳𝗶𝗲𝗱 𝗔𝗰𝘁𝗶𝗼𝗻 (𝗖𝗔𝗗𝗨𝗔) dahil sa kanilang aktibo at dedikasyon na direktang 𝘴𝘶𝘮𝘶𝘴𝘶𝘱𝘰𝘳𝘵𝘢 𝘴𝘢 𝘢𝘵𝘪𝘯𝘨 𝘮𝘨𝘢 𝘭𝘰𝘬𝘢𝘭 𝘯𝘢 𝘫𝘦𝘦𝘱𝘯𝘦𝘺 𝘥𝘳𝘪𝘷𝘦𝘳 𝘴𝘢 𝘨𝘪𝘵𝘯𝘢 𝘯𝘨 𝘩𝘢𝘮𝘰𝘯 𝘯𝘨 𝘱𝘢𝘨𝘵𝘢𝘢𝘴 𝘯𝘨 𝘱𝘳𝘦𝘴𝘺𝘰 𝘯𝘨 𝘭𝘢𝘯𝘨𝘪𝘴 𝘢𝘵 𝘮𝘨𝘢 𝘣𝘪𝘭𝘪𝘩𝘪𝘯.

Bahagi ng kikitain mula sa aming IGP ay ilalaan upang suportahan ang kanilang programa. Sa ating pagkakaisa, layon nating palakasin ang boses ng mga estudyante at maghatid ng makabuluhang tulong kung saan ito pinaka-kailangan.

Tara na sa UPB Cafeteria, Abril 28 hanggang Abril 30! Sa bawat bili, may kasamang tulong ☕❤️💙

—
𝘗𝘶𝘣𝘭𝘪𝘤𝘢𝘵𝘪𝘰𝘯 𝘔𝘢𝘵𝘦𝘳𝘪𝘢𝘭 𝘣𝘺 𝘔𝘢𝘳𝘪𝘢𝘯 𝘗𝘢𝘶𝘭𝘢
𝘊𝘢𝘱𝘵𝘪𝘰𝘯 𝘣𝘺 𝘑𝘢𝘯𝘦𝘭𝘭𝘦 𝘝𝘪𝘭𝘭𝘢𝘯𝘶𝘦𝘷𝘢

26/04/2026

𝐒𝐀 𝐋𝐀𝐁𝐀𝐍 𝐍𝐆 𝐓𝐒𝐔𝐏𝐄𝐑,
𝐊𝐀𝐒𝐀𝐌𝐀 𝐀𝐍𝐆 𝐊𝐎𝐌𝐘𝐔𝐓𝐄𝐑!

Kaisa ang CADUA sa isinagawang walkout protesta ng mga estudyante ng University of the Philippines Baguio upang ipanawagan ang pagbabasura sa Oil Deregulation Law at ang agarang umento sa sahod ng mga manggagawa. Sa harap ng walang tigil na pagtaas ng presyo ng langis, pamasahe, bilihin, at iba pang batayang pangangailangan, malinaw na ang kasalukuyang sistema ay pabor sa malalaking negosyante habang lalong pinahihirapan ang ordinaryong mamamayan. Hindi dapat hinahayaan na ang krisis ay ipasa sa balikat ng mga maralita, manggagawa, tsuper, magsasaka, at kabataan.

Bilang kabataan at mga mag-aaral, kinikilala natin na ang laban para sa abot-kayang edukasyon ay kaugnay ng laban para sa disenteng sahod, sapat na hanapbuhay, at makataong pamumuhay. Walang saysay ang pag-aaral kung paglabas ng pamantasan ay kahirapan, kawalan ng trabaho, at pagsasamantala ang naghihintay sa mamamayan. Kaya nararapat lamang na makiisa ang hanay ng kabataan sa mas malawak na pakikibaka ng sambayanan para sa tunay na pagbabago.

Mula pamantasan hanggang lansangan, patuloy nating dadalhin ang tinig ng mamamayan. Ngayong nagtipon sa Baguio City Public Market para sa unang araw ng ika-42 Peoples’ Cordillera Day, pinatitibay natin ang paninindigan para sa karapatan ng mamamayan at pagtatanggol sa Cordillera laban sa pang-aabuso, pandarambong, at kapabayaan. Hangga’t may inhustisya, hindi titigil ang pagkilos ng mamamayan.

24/04/2026

𝗞𝗔𝗗𝗪𝗔 𝗡𝗚𝗔 𝗧𝗨𝗠𝗨𝗟𝗢𝗡𝗚 𝟰.𝟬 – 𝗣𝗔𝗥𝗔 𝗦𝗔 𝗧𝗦𝗨𝗣𝗘𝗥

Noong Abril 22, inilunsad ng 𝐂𝐀𝐃𝐔𝐀 𝐔𝐏𝐁 ang KADWA NG TUMULONG 4.0—isang inisyatiba ng kolektibong pagkilos upang tumugon sa patuloy na krisis na dinaranas ng ating mga tsuper. Sa gitna ng walang tigil na pagtaas ng presyo ng langis, lalong nilulugmok ang sektor ng transportasyon habang pinapasan nila ang bigat ng sistemang pumapabor sa iilan.

Hindi limos ang kailangan ng mga tsuper, kundi hustisya. Ang ating ambag ay hindi lamang tulong-pinansyal, kundi pagpapakita ng malinaw na paninindigan: na hindi natin hahayaang ipasa sa mamamayan ang gastos ng isang bulok at mapagsamantalang sistema.

Ang KADWA NGA TUMULONG ay higit pa sa donasyon, ito ay pagkakaisa ng estudyante at mamamayan sa gitna ng krisis. Habang patuloy na binabalewala ang panawagan para sa makatarungang pamasahe at disenteng kabuhayan, tungkulin nating kumilos at makiisa.

Lubos na pasasalamat sa 𝐒𝐭𝐚𝐭𝐞 𝐕𝐚𝐫𝐬𝐢𝐭𝐲 𝐂𝐡𝐫𝐢𝐬𝐭𝐢𝐚𝐧 𝐅𝐞𝐥𝐥𝐨𝐰𝐬𝐡𝐢𝐩 (𝐒𝐕𝐂𝐅) 𝐁𝐚𝐠𝐮𝐢𝐨 sa kanilang pakikiisa at mahalagang ambag bilang bahagi ng inisyatibang ito. Ang inyong suporta ay patunay ng tunay na diwa ng pagkakaisa at malasakit sa hanay ng mga tsuper at mamamayan.

Makibahagi. Mag-ambag. Makibaka.

23/04/2026

𝐈𝐓𝐈 𝐋𝐀𝐁𝐀𝐍 𝐓𝐈 𝐓𝐒𝐔𝐏𝐄𝐑, 𝐊𝐀𝐃𝐖𝐀 𝐓𝐀𝐘𝐔 𝐍𝐆𝐀 𝐊𝐎𝐌𝐘𝐔𝐓𝐄𝐑

Hindi na bago ang pagtaas ng presyo ng langis, pero bawat pagtaas ay may katumbas na bigat sa buhay ng mamamayan. Sa mga tsuper, ito ay direktang bawas sa kita, mas mahal ang krudo, pero hindi tumataas ang pasada. Sa mga komyuter at estudyante, ito ay dagdag na pasanin, mas mahal ang pamasahe, mas kaunti ang natitira para sa araw-araw na pangangailangan.

Unti-unting nagiging normal ang sitwasyong hindi naman dapat tinatanggap. Pinapasan natin ang epekto ng mga desisyong hindi naman tayo ang nakinabang. Habang may mga sektor na patuloy ang pagkamal ng kita, ang nakararami ay napipilitang mag-sakripisyo, magtipid, at magtiis.

Hindi sapat ang manahimik o makuntento sa panandaliang ginhawa. Ang kailangan ay sama-samang pagkilos upang igiit ang mga konkretong solusyon mula sa abot-kayang transportasyon hanggang sa mga patakarang tunay na naglilingkod sa interes ng mamamayan.

Bilang mga iskolar ng bayan, hindi hiwalay ang ating papel sa laban na ito. Ang silid-aralan ay hindi lang espasyo ng pagkatuto, kundi lugar din ng paninindigan. Kapag apektado ang mamamayan, apektado tayo.

Kaya sa oras na ito, piliin nating lumabas. Piliin nating makiisa. Piliin nating magsalita.

Magkita-kita tayo bukas, 𝐀𝐩𝐫𝐢𝐥 𝟐𝟒, 𝟐𝟎𝟐𝟔, 𝟏𝟏:𝟎𝟎 𝐀𝐌 𝐬𝐚 𝐔𝐏𝐁 𝐂𝐚𝐟𝐞𝐭𝐞𝐫𝐢𝐚.

Sama-sama nating igiit ang pagbabago.

12/04/2026

𝐊𝐀𝐃𝐖𝐀 𝐍𝐆𝐀 𝐓𝐔𝐌𝐔𝐋𝐎𝐍𝐆 𝟒.𝟎 – 𝐏𝐚𝐫𝐚 𝐬𝐚 𝐦𝐠𝐚 𝐓𝐬𝐮𝐩𝐞𝐫

Idineklara ang State of Calamity sa Baguio City matapos aprubahan ng city council ang Resolution No. 257, series of 2026, kasabay ng pambansang state of energy emergency na inanunsyo ni Pangulong Ferdinand Marcos Jr. Ngunit sa kabila ng mga deklarasyong ito, nananatiling pasan ng mamamayan, lalo na ng ating mga tsuper, ang bigat ng krisis na ito.

Sa patuloy na pagtaas ng presyo ng langis, unti-unting kinakain ang kita ng ating mga jeepney drivers. Mas mahaba ang oras ng pasada, mas maliit ang naiuuwi sa pamilya. Sila ang nagpapatakbo ng ating araw-araw na buhay, nagdadala sa atin sa paaralan, trabaho, at tahanan, ngunit sa panahong ito, sila mismo ang naiiwan.

Sa diwa ng kolektibong pagkilos at tunay na pakikiisa, inilulunsad ng Campus Alliance for Dedicated and Unified Action (CADUA) ang 𝐊𝐀𝐃𝐖𝐀 𝐍𝐆𝐀 𝐓𝐔𝐌𝐔𝐋𝐎𝐍𝐆 𝟒.𝟎 – 𝐏𝐚𝐫𝐚 𝐬𝐚 𝐦𝐠𝐚 𝐓𝐬𝐮𝐩𝐞𝐫. Layunin nitong maghatid ng agarang tulong sa pamamagitan ng donation drive at pamamahagi ng relief goods para sa mga tsuper na direktang tinamaan ng krisis.

𝐋𝐚𝐡𝐚𝐭 𝐧𝐠 𝐦𝐚𝐥𝐢𝐥𝐢𝐤𝐨𝐦 𝐧𝐚 𝐝𝐨𝐧𝐚𝐬𝐲𝐨𝐧 𝐚𝐲 𝐝𝐢𝐫𝐞𝐤𝐭𝐚𝐧𝐠 𝐦𝐚𝐩𝐮𝐩𝐮𝐧𝐭𝐚 𝐬𝐚 𝐦𝐠𝐚 𝐣𝐞𝐞𝐩𝐧𝐞𝐲 𝐝𝐫𝐢𝐯𝐞𝐫𝐬 𝐧𝐠 𝐁𝐚𝐠𝐮𝐢𝐨.

Nanawagan kami sa lahat ng mga estudyante, manggagawa, propesyunal, at bawat may kakayahang tumulong: makiisa kayo sa laban na ito. Ang kahit maliit na ambag ay may malaking epekto kung sama-sama.

📌 Para sa donasyon:
GCash: 09812464784
Pangalan: 𝐌𝐞****** 𝐓. 𝐒𝐮****

Tumulong. Makialam. Makibaka.
Para sa tsuper. Para sa mamamayan.

09/04/2026

𝐌𝐚𝐥𝐢𝐠𝐚𝐲𝐚𝐧𝐠 𝐀𝐫𝐚𝐰 𝐧𝐠 𝐊𝐚𝐠𝐢𝐭𝐢𝐧𝐠𝐚𝐧! 🇵🇭

Sa araw na ito, ginugunita natin ang walang kapantay na kabayanihan ng mga Pilipinong nag-alay ng kanilang buhay sa ngalan ng kalayaan, mga mandirigmang tumindig laban sa pananakop, paniniil, at kawalang katarungan. Ang kanilang tapang ay hindi lamang alaala ng nakaraan, kundi isang buhay na hamon sa kasalukuyan: na ipagpatuloy ang laban para sa tunay na kalayaan, hindi lamang sa papel kundi sa aktwal na kalagayan ng sambayanan.

Ngunit ang diwa ng kagitingan ay hindi dapat manatili sa seremonya at paggunita. Sa gitna ng patuloy na krisis sa edukasyon, kabuhayan, at karapatang pantao, ang tunay na pagpupugay sa ating mga bayani ay ang pagyakap sa kanilang ipinaglaban. Habang nananatili ang kahirapan, korapsyon, at pagsikil sa boses ng mamamayan, malinaw na ang laban para sa kalayaan ay hindi pa tapos.

Nawa’y magsilbing apoy ang kanilang sakripisyo upang sindihan ang ating kolektibong paninindigan. Ipagpatuloy natin ang laban para sa makabayang edukasyon, demokratikong karapatan, at isang lipunang tunay na malaya at makatarungan. Sa bawat pagkilos, sa bawat paninindigan, buhay ang diwa ng kagitingan.

Hindi lamang pag-alala—kundi pagkilos.
Hindi lamang pagpupugay—kundi pakikibaka.

𝐏𝐚𝐠𝐩𝐮𝐩𝐮𝐠𝐚𝐲 𝐬𝐚 𝐦𝐠𝐚 𝐛𝐚𝐲𝐚𝐧𝐢 𝐧𝐨𝐨𝐧, 𝐩𝐚𝐤𝐢𝐤𝐢𝐛𝐚𝐤𝐚 𝐩𝐚𝐫𝐚 𝐬𝐚 𝐛𝐚𝐲𝐚𝐧 𝐧𝐠𝐚𝐲𝐨𝐧!

Address

Website

facebook.com

Alerts

Be the first to know and let us send you an email when CADUA UPB posts news and promotions. Your email address will not be used for any other purpose, and you can unsubscribe at any time.

Contact The Organization

Send a message to CADUA UPB:

Want your organization to be the top-listed Government Service?

Country:

City: