AgNor Bulletin

22/10/2026

𝐀𝐃𝐍 𝐧𝐚𝐠𝐡𝐚𝐭𝐚𝐠 𝐛𝐚𝐠-𝐨𝐧𝐠 𝐩𝐚𝐠𝐥𝐚𝐨𝐦 𝐚𝐥𝐚𝐧𝐠 𝐬𝐚 𝟓𝟗 𝐤𝐚 𝐅𝐑𝐬

Nakadawat og cash assistance, food packs, hygiene kits, sleeping mats, kitchenware, groceries, ug usa ka sako sa bugas ang 59 ka Friends Rescued (FRs) nga mibalik na sa sabakan sa gobyerno, atol sa awarding sa E-CLIP Assistance Packages karong Oktubre 22, 2026.

Mas gipalig-on pa sa probinsya sa Agusan del Norte ang pagpatuman sa Enhanced Comprehensive Local Integration Program (E-CLIP) pinaagi sa paghatag og komprehensibong suporta alang sa mga FRs aron matabangan ug matagaan og tinuod nga kahigayonan nga makasugod pag-usab sa ilang kinabuhi ug mahimong malinawon, produktibo, ug aktibong mga sakop sa katilingban.

Gipalig-on usab sa probinsya ang Transformation Program, uban sa mga kaabag nga ahensya, nga nagtumong sa pagsiguro sa kaluwasan sa mga FRs ug pagtabang kanila sa pagbalik sa komunidad.

Gilauman sa lokal nga panggamhanan nga pinaagi sa cash assistance nga gidunol kanila magamit sa insaktong pamaagi aron makatabang kanila sa pagpalambo sa ilang panginabuhian.

“Tabangi mi nga mahimo mong kaabag sa pagpahibalo ug pagdasig hilabi na sa mga kabatan-onan nga dili madani o malimbongan sa armadong grupo ug pilion ang malinawon nga kaugmaon,” matod ni Gob. Amante.

Ang maong kalihokan para sa mga FRs bunga sa panaghiusa ug lig-on nga kooperasyon sa probinsya sa Agusan del Norte sa pagpanguna ni Gobernador Ma. Angelica Rosedell M. Amante pinaagi sa Provincial Social Welfare Development Office, Provincial Disaster Risk Reduction Management Office nga maoy nag provide sa mga food packs ug mga gamit, Armed Forces of the Philippines (AFP), Philippine National Police (PNP), National Commission on Indigenous Peoples (NCIP) ug mga kaabag nga ahensya sa gobyerno.

Gipatuman ang maong programa ubos sa Whole-of-Nation Approach, nga nagtinguha sa pagpalig-on sa kalinaw ug paghatag og bag-ong kahigayonan sa mga Friend Rescued aron makabaton og mas maayong kaugmaon.

✍️Shiene D. Gomez
📷Shiene Gomez & Roldan Enjambre

22/10/2026

PRC, NDH nagkahiusa alang sa mas lig-on nga blood services

Gihatagan og awtoridad sa Sangguniang Panlalawigan si Governor Ma. Angelica Rosedell M. Amante aron mopirma sa Memorandum of Agreement (MOA) tali sa panggamhanang probinsyal, pinaagi sa Nasipit District Hospital (NDH), ug Philippine Red Cross (PRC) alang sa pagpalig-on sa koordinadong blood services alang sa mga pasyente sa ospital.

Ubos sa kasabutan, ang PRC motagana ug mopang-apod-apod og dugo ug blood products sa NDH labing menos kausa matag semana, depende sa panginahanglan ug sa kasamtangang blood inventory sa ospital. Gitugotan usab ang paghatag og dugang nga blood products panahon sa emerhensiya o kung adunay dinaliang panginahanglan, depende sa available nga suplay.

Samtang, ang NDH mopakusog sa pagpalambo ug pag-recruit og boluntaryong blood donors gikan sa hospital personnel, mga pasyente, ilang mga paryente, ug sa komunidad. Magpatuman usab ang ospital og regular nga pag-monitor sa paggamit sa dugo aron masiguro ang husto, episyente, ug responsable nga pagdumala sa blood supply.

Ang kasabutan nahiuyon sa Republic Act No. 7719, o ang National Blood Services Act of 1994, nga nagtumong sa pagsiguro sa igo, luwas, ug kasaligan nga suplay sa dugo sa nasud, lakip na ang pagdasig sa boluntaryong blood donation.

Ang MOA mahimong epektibo sulod sa tulo ka tuig gikan sa petsa sa pagpirma niini. Gilauman nga ang maong kasabutan makatabang sa pagsiguro sa padayon ug tukmang suplay sa luwas nga dugo ug blood products alang sa mga pasyente sa Nasipit District Hospital.

Giaprobahan sa Sangguniang Panlalawigan ang maong MOA pinaagi sa Sanggunian Resolution No. 408-2026, nga gipangamahanan ni Provincial Board Member James T. Reserva, uban nila Provincial Board Members Rodulfo A. Pitogo, Alan M. Asio, Rey G. Jamboy, ug Virgilio R. Escasiñas, Jr.

22/10/2026

22/10/2026

22/10/2026

Datu Ali: The Brave Moro Leader Who Fought for Freedom

22/10/2026

P200-M PAMANA PROJECTS IPATUMAN SA AGUSAN DEL NORTE

Gitugotan si Governor Ma. Angelica Rosedell M. Amante sa pagpirma sa Memorandum of Agreement (MOA) tali sa OPAPRU ug Pangagamhanang Probinsiyal alang sa pagpatuman sa otso (8) ka proyekto ubos sa PAMANA Program nga nagkantidad og P200 milyon ka pesos.

Lakip sa mga proyekto ang farm-to-market roads sa Pirada–Payas ug Mahaba–Belwang sa Cabadbaran City; Kaunlaran Masundong–Sumubay ug Balang-Balang–San Antonio–Kaunlaran sa Remedios T. Romualdez; Afga–Sitio Linao-Linao ug Jct. Talo-ao–Sitio Talaganahaw sa Buenavista.

Magpatuman usab og housing projects sa Barangay Del Pilar sa Cabadbaran City ug Barangay Talaganahaw ug Talo-ao sa Buenavista.

Tumong sa programa nga mapaayo ang imprastraktura ug panginabuhi sa mga komunidad nga apektado sa panagbangi, isip kabahin sa paningkamot sa gobyerno nga mapalig-on ang kalinaw ug kalamboan sa probinsya.

Ang awtorisasyon gihatag pinaagi sa Sanggunian Resolution No. 470-2026, nga gipangulohan ni BM Ryan Jade D. Lim, kauban ang mga co-author nga sila BM Rodulfo A. Pitogo ug BM Rey G. Jamboy.

21/10/2026

21/10/2026