04/08/2026
Nakikiduyog ngan naintindi kami han iyo kasubo mahitungod nga maaram ghap kami nga mas damo pa an nanginginahanglan ngan mabubuligan hini nga Rice Distribution, Barangay 97 Cabalawan! Pero katungod ghap niyo nga mabaro para han kasayuran han ngatanan kabahin han proseso han RICE DISTRIBUTION:
An Opisina han Barangay 97 nakadawat hin instruksyon nga magpasa hin lista nga daw “waray limit” han mga indigent households nga molupyo han Barangay.
Tungod hini, an Opisina in dayon liwat nakibulig ngan nakigkoordinar ha ngatanan nga Purok ngan Cluster Leaders basi masiguro nga malista an mga pamilya nga angay makatagamtam hini nga programa. Katapos han proseso han pag-urusa han mga ngaran, nakapasa an aton Barangay hin MORE THAN 1,500 nga household names ngadto ha CSWDO, nga ira man ginkarawat pinaagi hin stamped received.
Han naglabay nga bulan han Hulyo, an mga representante han mao nga opisina in mismo naglibot ha aton Barangay agud himuon an validation han mga ngaran nga aton ginpasa. Tikang hini nga proseso han ira opisina, 381 households an naaprubahan ngan nalakip ha listahan han mga benepisyaryo nga asya an nakarawat han opisina han barangay yana nga kulop resulta han na una nga announcement para han kadagmitan nga pag impormar.
Karuyag namon ipahibaro nga waray iba nga hingyap an Opisina han Baranga 97 Cabalawan kundi an masiguro nga an ngatanan inin mahatagan. Sanglit ginhimo namon an amon bahin pinaagi han pag-urusa ngan pagpasa hin MORE THAN 1,500 nga ngaran.
PERO HA KATAPUSAN nga pagplastar, pag-validate, ngan pagpili han mga benepisyaryo aada na ha responsibilidad han kinauyokan nga ahensya nga nagdudumara hini nga programa.
Sanglit, mapainubsanon namon nga gin-aaro an iyo pag-intindi nga ini nga desisyon pagkaada hin 381 nga benepesyaryo inin diri matikang hin bisan hino ha Opisina han Barangay.
Damo nga salamat han iyo kooperasyon ngan pagsarig.
