BFAR SAAD MIMAROPA

20/08/2026

𝐍𝐞𝐰𝐬 𝐑𝐞𝐥𝐞𝐚𝐬𝐞 | NYMTTBP sa Linapacan nakapagtala ng 54.75 kilo na aning bangus

Nakapagtala ng humigit-kumulang 54.75 kilo ng bangus ang Nurutan y ang Manegbila na Tagbanua ‘tong Barangay Pical (NYMTTBP) mula sa unang produksyon nito sa ilalim ng Food Production and Livelihood (FPL) component ng BFAR-SAAD Program.

Isinagawa noong Agosto 14 ang monitoring at assistance visit ng BFAR-SAAD MIMAROPA sa samahan na nakatuon sa pag-aani ng natitirang bangus at pagpapalit ng lambat ng fish cage bilang bahagi ng regular na pagpapanatili nito.

Tinatayang 800 hanggang 900 gramo bawat piraso ang timbang ng mga naaning bangus. Sa kabuuang ani, 80 piraso ang naibenta ng samahan at nakapagtala ng mahigit Php 9,000 na kita. Karamihan sa mga ito ay binili ng mga kasapi ng samahan, habang ang iba ay naibenta sa iba pang mamimili.

Bago ang produksyon, nakatanggap ang NYMTTBP ng 2,470 pirasong bangus fingerlings, feeds, at isang yunit ng mga kagamitang kailangan sa bangus cage culture bilang bahagi ng pangkabuhayang interbensyon ng programa.

Ayon sa samahan, naging mahalagang bahagi ng kanilang unang produksyon ang pagbebenta ng mga naaning bangus, na nagbigay ng karagdagang kita at nakatulong sa pagbabalik ng puhunan para sa kanilang produksyon.

Kasabay ng pag-aani ay isinagawa rin ng mga kasapi ang pagpapalit ng lambat ng fish cage upang mapanatili itong maayos at angkop para sa susunod na produksyon. Sinubaybayan ni Deo C. Fajardo, Area Coordinator ng Linapacan, ang mga gawain upang matiyak ang wastong pagsasagawa ng pag-aalaga at pag-aani ng bangus.

Bahagi ng isinagawang monitoring ang pagtukoy sa kalagayan ng fish cage at pagbibigay ng kinakailangang gabay sa samahan sa pagpapanatili ng pasilidad at wastong pangangasiwa ng produksyon.

Para sa susunod na produksyon, nakatuon ang samahan sa pagpapanatili ng maayos na fish cage at pagsunod sa wastong pamamaraan ng pag-aalaga ng bangus upang mapangalagaan ang kanilang livelihood project.

𝑺𝑨𝑨𝑫, 𝒌𝒂𝒂𝒈𝒂𝒑𝒂𝒚 𝒔𝒂 𝒎𝒂𝒖𝒏𝒍𝒂𝒅 𝒏𝒂 𝒃𝒖𝒉𝒂𝒚.

14/08/2026

𝐁𝐅𝐀𝐑-𝐒𝐀𝐀𝐃, 𝐧𝐚𝐦𝐚𝐡𝐚𝐠𝐢 𝐧𝐠 𝐤𝐚𝐠𝐚𝐦𝐢𝐭𝐚𝐧𝐠 𝐩𝐚𝐧𝐠𝐤𝐚𝐛𝐮𝐡𝐚𝐲𝐚𝐧 𝐬𝐚 𝐦𝐠𝐚 𝐦𝐚𝐧𝐠𝐢𝐧𝐠𝐢𝐬𝐝𝐚 𝐬𝐚 𝐁𝐚𝐧𝐭𝐨𝐧, 𝐑𝐨𝐦𝐛𝐥𝐨𝐧

Noong Agosto 11, 2026, namahagi ang Bureau of Fisheries and Aquatic Resources – Special Area for Agricultural Development (BFAR-SAAD) Program ng mga kagamitang pangisdaan sa mga benepisyaryong mangingisda sa Banton, Romblon bilang dagdag na suporta sa kanilang kabuhayan at mga gawaing pangisdaan sa komunidad.

Ipinamahagi sa mga benepisyaryo mula sa mga samahang Laging Pangalagaan Upang Lalo Pang Umunlad Ang Ating Kalikasan at Mamamayan (LAPULAPU) at Mamayan, Mahalin, At Ingatan Ang Ating Kalikasan (MAMING) ang iba't ibang kagamitang pangisdaan. Kabilang dito ang multiple hook and line, mga materyales para sa gill net, timbangan, fish trap at mga materyales para sa long line.
Pinangunahan ang aktibidad nina Villardo F. Fadallan, OIC, at Ace Michael F. Fetizanan, Fishery Extension Officer, kasama ang mga benepisyaryo at kinatawan ng mga samahang mangingisda.

Bukod sa pamamahagi ng mga kagamitan, isinasagawa rin ng BFAR-SAAD ang mga pagsasanay para mapaunlad ang kaalaman at kasanayan ng mga samahan sa pamamahala ng kanilang mga kabuhayan. Kabilang dito ang pagsasanay sa pagbuo ng samahan at pagpapalakas ng kakayahan, gayundin ang pagtatahi at paggawa ng lambat-panghuli (gill net).

Kasabay ng mga kagamitang ipinagkaloob ang paghahanda sa mga samahan upang matiyak na maayos nilang magagamit at mapapangalagaan ang mga ito. Sa ganitong paraan, hindi lamang kagamitan ang naipagkakaloob sa mga mangingisda, kundi pati kaalaman at kasanayang maaari nilang magamit sa pagpapatuloy ng kanilang kabuhayan.

Bahagi ang mga interbensyon ng Food Production and Livelihood (FPL) component ng BFAR-SAAD na naglalayong magbigay ng angkop na suporta sa mga mangingisda batay sa kanilang pangangailangan at kabuhayan. Sa pagkakaroon ng karagdagang kagamitan, mas napalalakas ang kanilang kakayahang ipagpatuloy ang mga gawaing pangisdaan at mapakinabangan ang mga ito bilang pinagkukunan ng kita.

𝑺𝑨𝑨𝑫, 𝒌𝒂𝒂𝒈𝒂𝒑𝒂𝒚 𝒔𝒂 𝒎𝒂𝒖𝒏𝒍𝒂𝒅 𝒏𝒂 𝒃𝒖𝒉𝒂𝒚.

07/08/2026

𝐁𝐅𝐀𝐑-𝐒𝐀𝐀𝐃 𝐌𝐈𝐌𝐀𝐑𝐎𝐏𝐀 𝐧𝐚𝐠𝐬𝐚𝐠𝐚𝐰𝐚 𝐧𝐠 𝐂𝐫𝐚𝐛 𝐂𝐮𝐥𝐭𝐮𝐫𝐞 𝐓𝐫𝐚𝐢𝐧𝐢𝐧𝐠 𝐩𝐚𝐫𝐚 𝐬𝐚 𝐒𝐚𝐦𝐚𝐡𝐚𝐧𝐠 𝐌𝐚𝐧𝐠𝐢𝐧𝐠𝐢𝐬𝐝𝐚 𝐬𝐚 𝐋𝐢𝐧𝐚𝐩𝐚𝐜𝐚𝐧, 𝐏𝐚𝐥𝐚𝐰𝐚𝐧

Bilang paghahanda sa pagpapatupad ng proyektong crab fattening, nagsagawa ang Bureau of Fisheries and Aquatic Resources – Special Area for Agricultural Development (BFAR-SAAD) MIMAROPA ng Crab Culture Training para sa mga miyembro ng Tarabidan y ang Magtarangay sa Bakawan sa Sitio Iloc, Linapacan, Palawan.

Pinangunahan ni G. Ferdinand B. Lim, Community Development Officer ng Regional Fisheries Training Center–Palawan, ang pagsasanay na nakatuon sa mga pangunahing kaalaman at wastong pamamaraan sa pag-aalaga at pagpapataba ng alimango. Tinalakay ang pagpili ng dekalidad na stock, tamang pagpapakain, paghahanda at pamamahala ng kulungan, at iba pang teknikal na aspetong mahalaga sa matagumpay na pagpapatupad ng proyekto.

Ang nakatakdang proyektong crab fattening ay bunga ng isinagawang Participatory Rural Appraisal (PRA) noong Marso 2026, kung saan natukoy ang potensyal ng Sitio Iloc para sa nasabing kabuhayan batay sa umiiral na yamang bakawan at kondisyon ng lugar. Isinasaalang-alang din sa pagpili ng interbensyon ang pangangailangan at kakayahan ng asosasyon upang matiyak na ang proyektong ipatutupad ay angkop sa kanilang komunidad.

Bilang bahagi ng social preparation component ng programa at paghahanda sa Food Production and Livelihood component, inuuna ang pagpapalakas ng kakayahan ng mga benepisyaryo sa pamamagitan ng mga pagsasanay at iba pang capacity-building activities bago ang implementasyon ng mga livelihood intervention.

Sa pamamagitan ng mga ganitong gawain, patuloy na pinalalakas ng BFAR-SAAD MIMAROPA ang kahandaan ng mga samahang mangingisda sa pamamahala ng kanilang mga proyekto.

𝑺𝑨𝑨𝑫, 𝒌𝒂𝒂𝒈𝒂𝒑𝒂𝒚 𝒔𝒂 𝒎𝒂𝒖𝒏𝒍𝒂𝒅 𝒏𝒂 𝒃𝒖𝒉𝒂𝒚.

04/08/2026

𝐌𝐠𝐚 𝐒𝐚𝐦𝐚𝐡𝐚𝐧𝐠 𝐌𝐚𝐧𝐠𝐢𝐧𝐠𝐢𝐬𝐝𝐚 𝐬𝐚 𝐒𝐚𝐧 𝐉𝐨𝐬𝐞, 𝐑𝐨𝐦𝐛𝐥𝐨𝐧, 𝐬𝐮𝐦𝐚𝐢𝐥𝐚𝐥𝐢𝐦 𝐬𝐚 𝐅𝐮𝐧𝐝𝐚𝐦𝐞𝐧𝐭𝐚𝐥 𝐌𝐚𝐫𝐤𝐞𝐭-𝐑𝐞𝐥𝐚𝐭𝐞𝐝 𝐓𝐫𝐚𝐢𝐧𝐢𝐧𝐠

Pinalawak ng Bureau of Fisheries and Aquatic Resources – Special Area for Agricultural Development (BFAR-SAAD) MIMAROPA ang kakayahan ng mga samahang mangingisda sa San Jose, Romblon sa pamamagitan ng pagsasagawa ng Fundamental Market-Related Training sa ilalim ng Market Assistance and Enterprise Development (MAED) component ng programa.

Layunin ng pagsasanay na ihanda ang mga asosasyon sa mas maayos na pamamahala ng kanilang mga kabuhayan at matulungan silang maging Community-Based Enterprise (CBE) na may kakayahang umunlad at maging matatag sa pangmatagalan.

Naging resource speaker si Mr. Lou V. Foja, CPA, MABA, mula sa Romblon State University, na nagbahagi ng kaalaman sa mahahalagang aspeto ng enterprise development. Tinalakay sa pagsasanay ang basic business recording, bookkeeping, financial statements, pricing and costing, packaging and labeling, at entrepreneurial mindset and values formation upang higit na mapalakas ang kakayahan ng mga kalahok sa pamamahala ng kanilang mga negosyo.

Naging katuwang din sa pagsasagawa ng aktibidad ang Municipal Agricultural Office (MAO) ng San Jose, Romblon na tumulong sa koordinasyon at paglahok ng mga samahan.

Bukod sa pagpapalawak ng kaalaman sa pamamahala ng negosyo, binigyang-diin sa pagsasanay ang kahalagahan ng tamang pagpaplano, maayos na pagtatala ng pananalapi, at pagbuo ng mga desisyong nakabatay sa pangangailangan ng merkado. Mahalaga ang mga ito sa pagpapatatag ng mga proyektong pangkabuhayan ng mga asosasyon at sa paghahanda sa kanila para sa mas malawak na oportunidad sa merkado.

Patuloy na isinusulong ng BFAR-SAAD MIMAROPA ang mga pagsasanay na hindi lamang nagbibigay ng kaalaman, kundi naghahanda rin sa mga samahang mangingisda na maging mas matatag, mas organisado, at mas handa sa pagbuo ng mga negosyong magbibigay ng pangmatagalang benepisyo sa kanilang mga komunidad.

𝑺𝑨𝑨𝑫, 𝒌𝒂𝒂𝒈𝒂𝒑𝒂𝒚 𝒔𝒂 𝒎𝒂𝒖𝒏𝒍𝒂𝒅 𝒏𝒂 𝒃𝒖𝒉𝒂𝒚.

04/08/2026

Sharing from BFAR - Special Area for Agricultural Development Program

𝐂𝐎𝐍𝐆𝐑𝐀𝐓𝐔𝐋𝐀𝐓𝐈𝐎𝐍𝐒 𝐁𝐅𝐀𝐑-𝐒𝐀𝐀𝐃!

The Bureau of Fisheries and Aquatic Resources – Special Area for Agricultural Development (BFAR-SAAD) Program Phase II has been recognized as one of the top-performing locally funded projects by the Department of Agriculture - Special Projects Coordination and Management Assistance Division (DA-SPCMAD). For the first semester of CY 2026, the Program earned an impressive 97.56% performance rating under the Special Projects Monitoring and Evaluation Tool (SPMET), officially awarded during the Midyear Assessment held in Diliman, Quezon City last July 31, 2026.

This recognition reflects the teamwork and shared commitment of the Program's implementers, who continue to work hand in hand to keep the program moving forward. With this achievement as added inspiration, the team remains committed to excellence in implementation and firm in its mission: to help reduce poverty by advancing fisheries development initiatives that bring lasting, meaningful change to coastal and fisherfolk communities.

Mabuhay ang sektor ng Pangisdaan!

13/07/2026

𝐖𝐄 𝐀𝐑𝐄 𝐇𝐈𝐑𝐈𝐍𝐆!

The BFAR - Special Area for Agricultural Development Program (SAAD) MIMAROPA is hiring an Information Officer I.

Employment Status: Contract of Service
Place of Assignment: BFAR MIMAROPA Regional Office

Qualifications:
- Bachelor’s Degree relevant to the job preferably in Journalism, Development Communication, Communication Arts, and other related courses
- At least one (1) year of relevant experience and 8 hours relevant training
- Preferably proficient in news/feature writing, video editing and graphic design, social media content creation, and editor softwares.

For interested applicants, you may send in your Personal Data Sheet (PDS) and application Letter addressed to Mr. Roberto R. Abrera, Regional Director and attention to Ms. Ellaine Mae G. Paeldin, Regional SAAD Alternate Assistant Focal Person.

Email: [email protected]
Deadline of submission: July 17, 2026

02/07/2026

Maligayang Kaarawan, Regional Director Roberto R. Abrera!

Taos-pusong pagbati mula sa buong BFAR-SAAD MIMAROPA. Maraming salamat sa inyong patuloy na suporta at pamumuno sa pagpapatupad ng mga programang nagbibigay ng mas maraming oportunidad at mas maayos na kabuhayan para sa ating mga mangingisda.

Nawa’y patuloy kayong pagpalain ng mabuting kalusugan, lakas, at tagumpay sa inyong paglilingkod. Maligayang kaarawan po!

29/06/2026

𝐒𝐚𝐦𝐚𝐡𝐚𝐧𝐠 𝐌𝐚𝐧𝐠𝐢𝐧𝐠𝐢𝐬𝐝𝐚 𝐬𝐚 𝐏𝐚𝐥𝐚𝐰𝐚𝐧, 𝐏𝐢𝐧𝐚𝐥𝐚𝐤𝐚𝐬 𝐚𝐧𝐠 𝐊𝐚𝐤𝐚𝐲𝐚𝐡𝐚𝐧𝐠 𝐏𝐢𝐧𝐚𝐧𝐬𝐲𝐚𝐥 𝐬𝐚 𝐏𝐚𝐦𝐚𝐦𝐚𝐠𝐢𝐭𝐚𝐧 𝐧𝐠 𝐅𝐢𝐧𝐚𝐧𝐜𝐢𝐚𝐥 𝐀𝐜𝐜𝐞𝐬𝐬 𝐎𝐫𝐢𝐞𝐧𝐭𝐚𝐭𝐢𝐨𝐧 𝐚𝐭 𝐆𝐫𝐨𝐮𝐩 𝐀𝐜𝐜𝐨𝐮𝐧𝐭 𝐄𝐧𝐫𝐨𝐥𝐥𝐦𝐞𝐧𝐭

Bilang bahagi ng patuloy na pagpapalakas ng kabuhayan ng mga benepisyaryo ng Bureau of Fisheries and Aquatic Resources – Special Area for Agricultural Development (BFAR-SAAD) Program, nagsagawa ang BFAR-SAAD MIMAROPA ng Financial Access Orientation and Group Account Enrollment para sa mga samahan ng mangingisda sa mga bayan ng Cagayancillo at Balabac, Palawan noong Hunyo 25–26, 2026 sa Citystate Asturias Hotel, Puerto Princesa City.

Ang aktibidad ay isinagawa sa pakikipagtulungan ng Land Bank of the Philippines (LBP)-Palawan upang matulungan ang mga samahan ng mangingisda na makapagbukas ng pormal na bank account. Ito ay isang mahalagang hakbang tungo sa pagtatatag ng mga Community-Based Enterprises (CBEs) sa ilalim ng Market Assistance and Enterprise Development (MAED) Component ng SAAD Program Phase II.

Isa ang MAED sa apat na component ng SAAD na naglalayong mapalakas ang mga kabuhayang naipagkaloob na sa mga benepisyaryo at gawing mas matatag at pangmatagalan ang kanilang mga pinagkukunan ng kita. Nakatuon ito sa pagpapabuti ng produksyon, pagpapalawak ng kaalaman ng mga samahan sa pagnenegosyo, pagbuo ng ugnayan sa merkado, at pagbibigay ng teknikal at iba pang suporta upang maitaguyod ang mga umuusbong na negosyo ng mga mangingisda.

Gayunman, isa sa mga pangunahing hamon na kinakaharap ng mga samahan ay ang kakulangan ng access sa mga serbisyong pinansyal. Marami sa mga benepisyaryo ng SAAD ay kabilang sa mga walang sapat na karanasan sa pormal na sistemang pampinansyal, dahilan upang maging limitado ang kanilang pagkakataong makapagbukas ng account at makakuha ng mga serbisyong kailangan para sa pagpapatakbo at pagpapalawak ng kanilang mga negosyo.

Sa unang araw ng aktibidad, nagbigay ng mensahe si G. Mario C. Basaya, Officer-in-Charge ng Provincial Fisheries Office (PFO)-Southern Palawan, kung saan binigyang-diin niya ang kahalagahan ng pagkakaroon ng maayos na sistemang pinansyal sa pagpapatatag ng mga samahan. Sinundan ito ng orientation at pagproseso ng pagbubukas ng account sa pamamagitan ng Digital Onboarding System (DOBS) na pinangunahan nina G. John Lawrence M. Garcellano at Bb. Elaye Bernadette B. Velasco, kapwa Senior Customer Associate ng LBP Palawan. Tinalakay sa mga samahan ang mga kinakailangang dokumento, proseso ng aplikasyon, at kahalagahan ng pagkakaroon ng pormal na bank account bilang paghahanda sa mas organisado at mas matatag na pagpapatakbo ng kanilang mga asosasyon at community-based enterprises.

Samantala, sa ikalawang araw ay isinagawa ang talakayan tungkol sa mga pamamaraan sa pagpapalago ng kita at pamamahala sa panganib sa pananalapi sa pangunguna ni G. Jobert Sibunga, Account Assistant ng LBP Palawan Lending Center. Tinalakay rin ni Bb. Karla Joy Gabayan, Account Officer ng LBP Palawan Lending Center, ang AGRISENSO Plus Lending Program ng Landbank. Ipinakilala sa mga benepisyaryo ang iba't ibang programa at mga oportunidad sa pagpopondo na maaaring mapakinabangan ng mga mangingisda at kanilang mga asosasyon. Tinalakay rin ang mga kwalipikasyon sa pag-avail ng loan, mga maaaring paggamitan ng pondo, at iba pang suportang pinansyal na makatutulong sa pagpapalawak ng kanilang kabuhayan at mga umuusbong na negosyo.

Sa pamamagitan ng aktibidad na ito, inaasahang magkakaroon ng mas maayos na access sa mga serbisyong pinansyal ang mga samahan ng mangingisda sa Cagayancillo at Balabac. Magiging daan din ito upang mapalakas ang kanilang kakayahang pamahalaan ang pondo ng kanilang organisasyon, magkaroon ng akses sa mga oportunidad sa pagpopondo, at makabuo ng mga pangmatagalang estratehiya para sa pagpapatatag ng kanilang mga negosyo.

𝑺𝑨𝑨𝑫, 𝒌𝒂𝒂𝒈𝒂𝒑𝒂𝒚 𝒔𝒂 𝒎𝒂𝒖𝒏𝒍𝒂𝒅 𝒏𝒂 𝒃𝒖𝒉𝒂𝒚.