Provincial Agriculturist's Office - Oriental Mindoro

04/09/2026

𝐏𝐀𝐠𝐎, 𝐏𝐡𝐢𝐥𝐑𝐢𝐜𝐞, 𝐀𝐓𝐈 𝐓𝐫𝐚𝐢𝐧 𝐑𝐢𝐜𝐞 𝐅𝐚𝐫𝐦𝐞𝐫𝐬, 𝐀𝐄𝐖𝐬 𝐨𝐧 𝐂𝐥𝐢𝐦𝐚𝐭𝐞-𝐑𝐞𝐬𝐢𝐥𝐢𝐞𝐧𝐭 𝐅𝐚𝐫𝐦𝐢𝐧𝐠 𝐏𝐫𝐚𝐜𝐭𝐢𝐜𝐞𝐬

Patuloy na pinapalakas ng Pamahalaang Panlalawigan ng Oriental Mindoro ang kakayahan ng mga rice farmers at agricultural extension workers upang maging mas handa at makapagpatuloy sa produksyon sa harap ng climate change at matinding tagtuyot.

Noong Setyembre 2–4, 2026, isinagawa ang tatlong araw na training na “𝑺𝒖𝒔𝒕𝒂𝒊𝒏𝒂𝒃𝒍𝒆 𝑹𝒊𝒄𝒆 𝑭𝒂𝒓𝒎𝒊𝒏𝒈 𝑻𝒉𝒓𝒐𝒖𝒈𝒉 𝑪𝒍𝒊𝒎𝒂𝒕𝒆-𝑹𝒆𝒔𝒊𝒍𝒊𝒆𝒏𝒕 𝒂𝒏𝒅 𝑨𝒅𝒂𝒑𝒕𝒊𝒗𝒆 𝑷𝒓𝒂𝒄𝒕𝒊𝒄𝒆𝒔” sa DA-ATI MIMAROPA Training Center, Brgy. Barcenaga, Naujan.

Pinangunahan ito ng Provincial Agriculturist’s Office (PAgO), katuwang ang DA-PhilRice Los Baños at DA-ATI MIMAROPA, at nilahukan ng Local Farmer Technicians (LFTs), farmer leaders, at Agricultural Extension Workers (AEWs) mula sa iba’t ibang bayan ng lalawigan.

Sa training, ibinahagi ng PhilRice ang mga teknolohiya at praktis para sa climate-resilient rice farming, kabilang ang PalayCheck System, Alternate Wetting and Drying (AWD), drought-tolerant rice varieties, pest and disease management, at nutrient at soil health management.

Mayroon ding hands-on at field demonstration sa wastong pag-install at paggamit ng AWD tube para sa mas mahusay na pamamahala ng tubig sa palayan.

Bahagi ito ng paghahanda ng lalawigan sa mga posibleng epekto ng El Niño, upang higit na mapalakas ang kakayahan ng mga magsasaka na makaangkop sa tagtuyot at mabawasan ang epekto nito sa produksyon.

Nagpaabot ng suporta sina Provincial Agriculturist Christine M. Pine at DA-ATI MIMAROPA Center Director Pat Andrew Barrientos, habang pinangunahan naman ni Ms. Michelle C. Quimbo, Supervising Science Research Specialist ng PhilRice Los Baños, ang pagbabahagi ng teknikal na kaalaman sa pagsasanay.

Sa ilalim ng pamumuno ni Governor Humerlito “Bonz” A. Dolor, patuloy na pinagtitibay ng Pamahalaang Panlalawigan, sa pamamagitan ng PAgO, katuwang ang DA-ATI MIMAROPA, PhilRice, at iba pang institusyon, ang mga hakbang tungo sa isang mas handa, matatag, at climate-resilient na rice sector sa Oriental Mindoro.

🌾 Mas handang magsasaka. Mas matatag na palayan. Mas matibay na food security.

03/09/2026

03/09/2026

𝐂𝐒 𝐌𝐚𝐩 𝐖𝐨𝐫𝐤𝐬𝐡𝐨𝐩 𝟑: 𝐏𝐨𝐥𝐢𝐜𝐲 𝐁𝐫𝐨𝐤𝐞𝐫𝐢𝐧𝐠 𝐟𝐨𝐫 𝐑𝐢𝐜𝐞 𝐅𝐚𝐫𝐦𝐞𝐫𝐬 𝐢𝐧 𝐎𝐫𝐢𝐞𝐧𝐭𝐚𝐥 𝐌𝐢𝐧𝐝𝐨𝐫𝐨

Ginanap ngayong Setyembre 2, 2026 ang ikatlo at huling workshop sa ilalim ng proyekto ng DA-PhilRice na “Climate-smart Maps for Strengthening the Adaptation Plans of Farming Communities” (CS Map Project), na naglalayong makatulong sa pagpapalakas ng kakayahan ng mga farming communities na umangkop sa mga epekto ng pagbabago ng klima.

Pinangunahan ang aktibidad ng DA-PhilRice, sa pangunguna ni Dr. Michelle Quimbo, katuwang ang Provincial Agriculturist’s Office (PAgO) sa pangunguna ni Provincial Agriculturist Christine M. Pine.

Sa workshop, inilahad ng CS Map Team ang mga resulta ng mga naunang konsultasyon at workshop, partikular ang pagtukoy at pagmamapa ng mga climate-related risks na nakaaapekto sa industriya ng pagpapalay sa lalawigan.

Tinalakay din ang mga posibleng climate adaptation strategies, kabilang ang mga instrumento at polisiya na maaaring makatulong sa pagpapatupad ng mga natukoy na hakbang.

Nakiisa sa aktibidad ang mga kinatawan mula sa DA-Regional Field Office, Agricultural Training Institute (ATI), National Irrigation Administration (NIA), Provincial Disaster Risk Reduction and Management Office (PDRRMO), Provincial Planning and Development Office (PPDO), Provincial Government - Environment and Natural Resources Office (PG-ENRO), City at Municipal Agriculture Offices, PAFC Rice Committee, at mga kooperatiba ng mga magsasaka.

Ang aktibidad ay bahagi ng patuloy na pagsusulong ng Pamahalaang Panlalawigan ng Oriental Mindoro, sa ilalim ng pamumuno ni Governor Humerlito “Bonz” A. Dolor, ng mga hakbang na nakatuon sa pagpapalakas ng sektor ng agrikultura at paghahanda ng mga magsasaka sa mga hamon ng pagbabago ng klima.

Bagama’t ito na ang huling workshop sa ilalim ng proyekto, hindi dito nagtatapos ang pagkilos. Ang mga nabuong climate-smart maps at adaptation strategies ay magsisilbing mahalagang batayan sa pagpaplano at paggawa ng mga desisyong makatutulong sa rice sector ng lalawigan.

Sa pamamagitan ng patuloy na pagtutulungan ng mga ahensya ng pamahalaan, lokal na pamahalaan, at mga organisasyon ng mga magsasaka, layunin nating maisulong ang mas maagap, mas koordinado, at mas climate-resilient na pagpaplano para sa industriya ng pagpapalay sa Oriental Mindoro. 🌱💚

03/09/2026

𝗣𝗮𝗴𝗽𝗮𝗽𝗮𝗹𝗮𝘄𝗮𝗸 𝗻𝗴 𝗠𝗮𝗿𝗸𝗲𝘁 𝗟𝗶𝗻𝗸𝗮𝗴𝗲 𝗽𝗮𝗿𝗮 𝘀𝗮 𝗠𝗴𝗮 𝗠𝗮𝗴𝘀𝗮𝘀𝗮𝗸𝗮

Nagkaroon ng pagpupulong ang Provincial Agriculturist’s Office (PAgO) katuwang ang DA-AMAD MIMAROPA sa Dayton International Corporation, noong Setyembre 1, 2026 upang talakayin ang potensyal na market linkage para sa mga produktong agrikultural ng Oriental Mindoro. Kabilang dito ang pakikipag-ugnayan sa mga farmer groups at agricultural stakeholders upang mapalawak ang access ng mga lokal na magsasaka sa lokal at pandaigdigang merkado.

28/08/2026

𝐌𝐈𝐌𝐀𝐑𝐎𝐏𝐀, 𝐁𝐢𝐧𝐚𝐛𝐚𝐥𝐚𝐧𝐠𝐤𝐚𝐬 𝐚𝐧𝐠 𝐁𝐚𝐠𝐨𝐧𝐠 𝐃𝐢𝐫𝐞𝐤𝐬𝐲𝐨𝐧 𝐩𝐚𝐫𝐚 𝐬𝐚 𝐈𝐧𝐝𝐮𝐬𝐭𝐫𝐢𝐲𝐚 𝐧𝐠 𝐒𝐢𝐛𝐮𝐲𝐚𝐬

Habang patuloy na lumalakas ang produksyon ng sibuyas sa MIMAROPA, nagsama-sama ang mga magsasaka, pamahalaan, pribadong sektor, akademya, at iba pang stakeholder upang balangkasin ang susunod na direksyon ng industriya sa isinagawang Updating of the MIMAROPA Onion Industry Roadmap para sa taong 2026–2030 sa San Jose, Occidental Mindoro, mula Agosto 25 hanggang 27, 2026.

Pinangunahan ng Department of Agriculture (DA)-MIMAROPA High Value Crops Development Program (HVCDP) sa pakikipagtulungan ng Philippine Rural Development Project (PRDP) ang aktibidad na dinaluhan ng mga magsasaka at farmer organizations, input providers, national government agencies, provincial at municipal local government units sa rehiyon, mga kinatawan ng State Universities and Colleges (SUCs), cold storage owners, at traders.

Layunin ng pag-update ng roadmap na suriin ang kasalukuyang kalagayan ng onion industry, tukuyin ang mga hamon sa buong value chain, at bumuo ng mga estratehiya upang mapalakas ang industriya sa mga susunod na taon.

27/08/2026

𝐏𝐀𝐆𝐏𝐀𝐏𝐀𝐋𝐀𝐊𝐀𝐒 𝐍𝐆 𝐊𝐀𝐀𝐋𝐀𝐌𝐀𝐍, 𝐏𝐀𝐆𝐏𝐀𝐏𝐀𝐇𝐔𝐒𝐀𝐘 𝐍𝐆 𝐏𝐀𝐍𝐆𝐀𝐍𝐆𝐀𝐒𝐈𝐖𝐀 𝐍𝐆 𝐀𝐍𝐈

Hindi nagtatapos sa pag-aani ang pangangalaga sa isang produkto. Ang wastong postharvest handling ay mahalaga upang mapanatili ang kalidad, kasariwaan, at marketability ng ani at mabawasan ang pagkalugi.

Noong Agosto 25–26, 2026, isinagawa ang 𝐓𝐫𝐚𝐢𝐧𝐢𝐧𝐠 𝐨𝐧 𝐏𝐨𝐬𝐭𝐡𝐚𝐫𝐯𝐞𝐬𝐭 𝐇𝐚𝐧𝐝𝐥𝐢𝐧𝐠 𝐨𝐟 𝐇𝐢𝐠𝐡 𝐕𝐚𝐥𝐮𝐞 𝐂𝐨𝐦𝐦𝐞𝐫𝐜𝐢𝐚𝐥 𝐂𝐫𝐨𝐩𝐬 sa Provincial Demonstration Farm, Merit, Victoria, Oriental Mindoro. Bahagi ito ng Province-led Agriculture and Fisheries Extension System (PAFES) at ng High Value Commercial Crops (HVCC) Production Program ng Provincial Agriculturist’s Office (PAgO) sa pangunguna ni Provincial Agriculturist Christine M. Pine.

Lumahok sa dalawang araw na pagsasanay ang 35 HVCC growers mula sa iba't ibang samahan ng mga magsasaka sa lalawigan. Nakatuon ang training sa wastong postharvest handling ng mga pangunahing high-value crops tulad ng saging, kalamansi, at lowland vegetables.

Naging resource speakers sina Engr. Ryan Anthony O. Lualhati, Ms. Daphne Cassandra Hilario-Gonzales, at Ms. Grace Anne P. Alcantara-Espinosa mula sa Postharvest Horticulture Training and Research Center (PHTRC), University of the Philippines Los Baños (UPLB).

Tinalakay sa pagsasanay ang mga wastong pamamaraan sa packing house operations, storage, transportasyon, at distribution, gayundin ang iba't ibang PHTRC technologies na maaaring gamitin upang mapanatili ang kalidad ng ani at mabawasan ang postharvest losses.

Sa pamamagitan ng pagsasanay na ito, nabibigyan ang ating mga magsasaka ng dagdag na kaalaman at praktikal na gabay upang mas mapangalagaan ang kanilang produkto mula harvest hanggang market.

🌱 Mas maayos na postharvest practices, mas kaunting pagkalugi, at mas mataas na halaga ng ani.

Patuloy na isinusulong ng Pamahalaang Panlalawigan ng Oriental Mindoro, sa pamamagitan ng PAgO, ang mga programang nagpapalakas sa kakayahan ng mga magsasaka at nagpapahusay sa kalidad at marketability ng mga produktong agrikultural ng lalawigan.

25/08/2026

𝗠𝗮𝘀 𝗹𝗶𝗸𝗮𝘀-𝗸𝗮𝘆𝗮𝗻𝗴 𝗸𝗮𝘂𝗻𝗹𝗮𝗿𝗮𝗻 𝗻𝗴 𝗺𝗴𝗮 𝗯𝗮𝘆𝗯𝗮𝘆𝗶𝗻 𝘀𝗮 𝗹𝗮𝗹𝗮𝘄𝗶𝗴𝗮𝗻, 𝗽𝗮𝘁𝘂𝗹𝗼𝘆 𝗻𝗮 𝗽𝗶𝗻𝗮𝗹𝗮𝗹𝗮𝗸𝗮𝘀

25 Agosto 2026, Lungsod ng Calapan - Higit pang pinalalakas ang mga hakbang tungo sa mas likas-kayang kaunlaran ng mga baybayin at sektor ng pangisdaan sa lalawigan.

Kaugnay nito, nagpatuloy ang ikatlo at huling serye ng Integrated Coastal Resource Management (ICRM) Planning Workshop sa mga bayan at lungsod sa lalawigan.

Nagsimula ngayong araw ang tatlong araw na pagsasanay sa pagbabalangkas ng Integrated Coastal Resource Management Plan (ICRMP) para sa mga bayan ng Puerto Galera, San Teodoro, Naujan, at Lungsod ng Calapan.

Magsisilbing gabay ng Pamahalaang Nasyunal at Pamahalaang Lokal ang ICRMP sa pagbuo ng mga polisiya tungo sa higit pang pagpapaunlad at pangangalaga ng mga baybayin sa lalawigan at sa mga likas na yamang matatagpuan dito.

Gayundin, mas mapalalakas ang mas likas-kayang kabuhayan sa sektor ng pangisdaan para sa mga komunidad na umaasa sa yamang dagat bilang kanilang pangunahing pinagkakakitaan.

Inisyatiba ang nasabing gawain ng Conservation International Philippines, sa ilalim ng Transformative Actions for Climate and Ecological Protection and Development (TRANSCEND) Project.
Katuwang dito ang Pamahalaang Panlalawigan ng Oriental Mindoro, sa pamamagitan ng Provincial Agriculturist’s Office (PAgO) na pinamumunuan ni Provincial Agriculturist Christine Pine.

Dinaluhan ito ng mga kinatawan mula sa Municipal LGUs ng mga nasabing bayan at lungsod, mga kinatawan mula sa iba't ibang opisina ng Pamahalaang Panlalawigan at National Government Agencies.

20/08/2026

🤝🌾 𝗣𝗔𝗙𝗘𝗦 𝗠𝗢𝗔 𝗦𝗶𝗴𝗻𝗶𝗻𝗴, 𝗣𝗶𝗻𝗮𝗹𝗮𝗸𝗮𝘀 𝗮𝗻𝗴 𝗣𝗮𝗴𝗸𝗮𝗸𝗮𝗶𝘀𝗮 𝗽𝗮𝗿𝗮 𝘀𝗮 𝗔𝗴𝗿𝗶𝗸𝘂𝗹𝘁𝘂𝗿𝗮 𝗮𝘁 𝗣𝗮𝗻𝗴𝗶𝘀𝗱𝗮𝗮𝗻 𝘀𝗮 𝗢𝗿𝗶𝗲𝗻𝘁𝗮𝗹 𝗠𝗶𝗻𝗱𝗼𝗿𝗼

Mas pinagtibay ang pagtutulungan ng mga ahensya ng pamahalaan at iba pang stakeholders para sa mas koordinado at mas responsive na serbisyo sa sektor ng agrikultura at pangisdaan ng Oriental Mindoro.

Noong Agosto 19, 2026, matagumpay na isinagawa ang PAFES MOA Signing Ceremony sa Oriental Mindoro bilang bahagi ng pagpapatupad ng Province-led Agriculture and Fisheries Extension System (PAFES) ng Department of Agriculture.

Isinagawa ito sa facilitation ng DA-MIMAROPA, sa pangunguna ni IDU Chief Ms. Hazel Gardoce, katuwang ang Pamahalaang Panlalawigan ng Oriental Mindoro sa pamamagitan ng Provincial Agriculturist’s Office (PAgO).

Nakiisa rin sa seremonya ang mga kinatawan mula sa DTI, NIA, PCA, ATI, BFAR, NFA, Philippine Agriculture and Fisheries Council (PAFC), at Oriental Mindoro Water Users Federation, bilang pagpapakita ng kanilang suporta sa pagpapatupad ng PAFES.

Bilang bahagi ng aktibidad, ipinresenta ng PAgO ang Collaborative Provincial Agriculture and Fisheries Extension Program (CPAFEP), na magsisilbing gabay sa koordinasyon at pagtutulungan ng mga katuwang na ahensya at stakeholders para sa pagpapaunlad ng 12 pangunahing agricultural commodities ng lalawigan.

Sa pamamagitan ng mas maayos na koordinasyon at sama-samang pagkilos, layunin ng CPAFEP na mapalakas ang produksyon, kita, at kakayahang makaangkop ng mga magsasaka at mangingisda sa mga hamon ng panahon at klima.

🌱 Mas nagkakaisang serbisyo. Mas koordinadong aksyon. Mas matatag na agrikultura at pangisdaan para sa Oriental Mindoro.