02/09/2026
PABATID SA PUBLIKO | Setyembre 2, 2026
AIR QUALITY SITUATION AT MGA PAG-IINGAT KAUGNAY NG HAZE
Batay sa advisory ng Department of Environment and Natural Resources – Environmental Management Bureau (DENR-EMB), naobserbahan ang haze o paglalabo ng hangin sa ilang lugar sa Pilipinas, na iniuugnay sa usok at transboundary haze mula sa mga patuloy na sunog sa Indonesia.
Ang usok mula sa mga sunog ay maaaring nadala patungo sa Pilipinas ng umiiral na mga hangin, na maaaring makaapekto sa kalidad ng hangin sa ilang lugar.
Kaugnay nito, pinapayuhan ang publiko na magsagawa ng mga sumusunod na pag-iingat:
🔹 Bawasan ang matagal na pananatili o mga gawain sa labas, lalo na sa mga lugar na kapansin-pansing apektado ng haze.
🔹 Ang mga sensitibong grupo, kabilang ang mga bata, matatanda, at mga indibidwal na may respiratory o cardiovascular conditions, ay pinapayuhang limitahan ang exposure sa labas at magsagawa ng kinakailangang pag-iingat.
🔹 Kung kinakailangang lumabas sa mga lugar na may kapansin-pansing haze, magsuot ng well-fitting N95 mask o katumbas na mask upang makatulong na mabawasan ang paglanghap ng mga particle sa hangin.
🔹 Manatili sa loob ng bahay hangga't maaari. Panatilihing nakasara ang mga pinto at bintana, at kung kinakailangan, gumamit ng mamasa-masang tela upang takpan ang mga siwang o puwang na maaaring pasukan ng usok o maruming hangin.
🔹 Manatiling updated sa mga opisyal na ulat at abiso mula sa DENR-EMB, DOST-PAGASA, at iba pang kinauukulang ahensya hinggil sa sitwasyon ng air quality.
Paalala: Unahin ang kalusugan at kaligtasan. Kung makaranas ng hirap sa paghinga o iba pang matinding sintomas, agad na humingi ng naaangkop na tulong medikal.
Manatiling ligtas, maingat, at mapagmatyag.
