11/03/2026
LGU Calauan Nagsagawa ng Joint Inspection sa mga Negosyo sa Brgy. Masiit
Marso 11, 2026 – Ngayong araw, nagsagawa ang Pamahalaang Bayan ng Calauan, Laguna ng Joint Inspection sa mga negosyo sa Barangay Masiit at Barangay Silangan upang tiyakin na ang lahat ng establisyemento ay sumusunod sa mga umiiral na ordinansa at regulasyon hinggil sa pagkuha ng Business Permit at iba pang kinakailangang clearance.
Ang inspeksyon ay isinagawa ng Joint Inspection Team na binubuo ng mga kinatawan mula sa Business Permits and Licensing Office (BPLO), Municipal Health Office (MHO), Municipal Disaster Risk Reduction and Management Office (MDRRMO), Municipal Environment and Natural Resources Office (MENRO), Municipal Planning and Development Office (MPDC), at iba pang kaugnay na tanggapan ng pamahalaang bayan.
Sa isinagawang inspeksyon, may mga negosyong may kumpleto at valid na business permit, habang may ilan namang operating nang walang kaukulang permit mula sa munisipyo.
Ang mga negosyong walang business permit ay binigyan ng Notice of Violation at inaatasang mag-apply at magproseso ng kanilang permit sa loob ng tatlong (3) araw mula sa pagtanggap ng abiso upang maiwasan ang paglabag sa regulasyon.
Kung hindi makakasunod sa itinakdang panahon, ang nasabing negosyo ay maaaring pansamantalang ipasara alinsunod sa mga umiiral na batas at ordinansa ng bayan.
Pinaaalalahanan ng LGU Calauan ang lahat ng negosyante na tiyaking may wastong permit at sumusunod sa mga regulasyon ng pamahalaan upang mapanatili ang kaayusan, kaligtasan ng publiko, at patas na kalakalan sa ating bayan.
Ang Pamahalaang Bayan ng Calauan ay patuloy na sumusuporta sa mga lehitimong negosyo habang mahigpit na ipinatutupad ang mga alituntunin para sa kapakanan ng lahat.
