22/10/2022
Bag-o nga Sistema ha panerbisyuhan, una nga gintutukan ha Siyudad han Calbayog
CALBAYOG CITY, Samar (Oktubre 22, 2022) -- "We came to you with a promise of Change, ngan sa sulod san kahilaba nga panahon that you were yearning for change, ine na an panahon that we will institute that change"
Ine an nagin bungad nga pulong ni Calbayog City Mayor Raymund Uy ha iya "report" ha katawhan han Ciudad han Calbayog durante pa han iya pagmarka han ika-100 diaz niya nga pagkapot han renda han pangobyernuhan ha nasabi nga Ciudad.
Ginpadangat ni Mayor Uy an iya Sumat ha Bungto, dungan han Ika 74 ka tuig nga anibersaryo han pagigin Siyudad han Calbayog dida mismo ha inaagi nga Domingo nga Adlaw.
Kundi nagpahimatngon hi Mayor Uy nga iton pagbabag-o nga hingyap han mga molupyo in usa nga proseso, kun diin magki-kinahanlan hin kooperasyon han kada sektor -- nga ginlalauman naman han bag-o nga alkalde nga ipapaangbit ha iya han mga natutuinan.
Ha nagin Sumat ha Bungto ni Mayor Uy, iginparayaw hine nga an iya una ka Gatos ka Adlaw ha Cityhall han hine nga Siyudad, an pagtikang han pagbabag-o an nagin sentro han iya mga nabuhat.
Ha mga una nga Adlaw, gintag-usausa hine an pagbisita han mga Opisina han Cityhall agud makita an mga panginahanlan ngan an "working environment" han mga empleyado.
Ngani gin-aro ni Mayor Uy an kooperasyon han mga empleyado han Cityhall nga bumulig apisar hiton magkaduru-dilain nga mga panuuhan ha Politika.
Ha sumat ni Mayor Uy, usa an City Health Office han mga gintutukan nga magka-ada hin mas hilu-ag nga espasyo ha panrabahuan, agud mas damo pa nga mga tawo an ma-akomodar hine ha pagdangat han serbisyo Panlawas.
Nahibaruan manta tikang kan Mayor Uy nga pira nga mga RHU Branches han siyudad an iginbutang na ha mga Permanente nga mga estraktura ngan iginpahirani ha mga kumunidad basi magin konbenyente an serbisyo Panlawas, ha katawhan sugad man ha mga empleyado hine.
"The Main Health Center 1 staff and services have transferred to its permanent building located in Brgy. Bagacay, near the Calbayog Transport Terminal. Haros napulo ka tuig ini sira nga nakigamit san espasyo sa ilarom san barangay hall san Brgy. Balud", sumat pa ni Mayor Uy.
Labot han mga estraktura, ayad na ngan nakakag-serbisyo na balik an Mini-Bus Dental and Mobile Clinic han CHO, nga natambay hin maiha nga panahon, sugad man an mga ruba nga Ambulansiya, ngani aada na ha 5 nga Ambulansiya iton nagagamit na yana han Siyudad.
Gin-reorganisar gihap han Siyudad han Calbayog an aspeto han Turismo, ngan igindukot ine ha kampanya ha Turismo han Spark Samar.
Ngani igin-bulag ni Mayor Uy an Opisina han Turismo ha anay City Tourism and Information Office.
"Sanglit para maka-focus kita san aton turismo, aton ginduha an opisina san City Tourism and Information Office ngadto sa City Tourism Office ngan City Public Information Office.", sering ni Mayor Uy.
Durante hine, iginplastar yana an Malajog Trail, o kumbinasyon hin mga detinasyon ha Turismo han siyudad, ngan gin organisar an Calbayog Accomodations Association ha tumong nga maprotehiran an mga bisita o mga turista ha Siyudad.
Nagpaseguro hi Mayor Uy nga magpapadayon an suporta han siyudad ha mga Kapulisan sugad man han Iba nga mga Otoridad nga nangunguna ha pagmantinar han Paz y Orden.
Gindumara an implementasyon han Retooled Community Service Program ngadto han mga Lugar nga apektado han insurhensiya.
Matok pa han nasabi nga Mayor, nga ha sulod han Cien Diaz, mas nakikita niya nga epektibo an kampanya han mg Otoridad ngan kapulisan kun dire hira ginpapangunahan ha ira kada tagsa mga operasyon.
Iginparayaw manta hine nga naabrihan na an Opisina han National Bureau of Investigation o NBI ha Siyudad han Calbayog.
Nakatalaan naman nga magrebisar an Siyudad ha Sistema han pagkilala han sakto kunta nga mga benipisyaryo han mga Housing Programs hine.
Dida han iya Sumat ha Bungto, ginbuyagyag ni Mayor Uy nga mayda hira nabukaykay nga mga reserbasyon hin mga benipisyaryo ha magkaduru-dilain nga mga Housing Programs han siyudad, apisar nga dire pa ine human, ngan waray pa an kunta mga giya ha pag-pili hin sakto nga mga benipisyaryo.
"We will check on the said reservation list, and we will see to it that only those qualified of our Housing Programs will get to that list", pahayag ni Mayor Uy.
Ginlaygay manta ni Mayor Uy an hilaba pa nga Listahan han mga nabuhat han iya administrasyon ha sulod la hin Cien Diaz ha aspeto han ekonomiya, buhis, social services, waste management ngan environment, infrastructure, sports development, kaupod an mga programa nga direkta nahipapa-ilarum ha Office of the City Mayor.
Kundi apisar han mga na-akompkisar hine, nagpahimatngon hi Mayor Uy nga nangangandaman liwat an Siyudad ha magigin epekto han dako nga pag-iban han National Tax Allotment (NTA) nga nakakarawat han siyudad.
Iginsumat ni Mayor Uy nga sobra 300 Milyones ka pesos an natapyas ha NTA han siyudad para hiton tidaraon nga Fiscal Year 2023, tungod han himubo nga Tax Collection han Gobyerno-Nasyunal.
Tungod hine, gintagan duon han Alkalde an pagpadukwag han lokal nga "revenue generation initiatives" basi maka ap-ap ha epekto han himubo nga NTA -- nga kasumpay hine, gintagan hine hin komendasyon an City Assessor's Office nga nakahimo pagkulekta hin hitaas nga kantidad kumpara han nakalabay nga Tuig.
"But despite the challenges, labi san kada Adlaw ko nga panalinguha nga mahatag an gin-aaro san mga Tawo, nakakahugot ako sin inspirasyon sadto nga mga Pribado nga Grupo ngan mga Tawo nga boluntaryo nagpapadangat san ira Bulig sa aton desire nga pagbabag-o for a better Calbayog City", pahayag ni Mayor Uy.
Gintagan duon hine nga an bolunterismo nga nakita niya tikang ha Pribado nga sektor ha sulod han Cien Diaz han iya administrasyon, in dako nga basehan nga mas pa nga maniguro para ha pag-uswag han siyudad.
"We came to you with the promise of change. Change has come. Damo nga salamat. Happy Charter Day! God Bless!", an urhi nga pahayag ni Mayor Uy. # # #
