03/09/2026
BE WISE. BE SAFE. WE SAVE. !!
Napakasaya at makabuluhan ang naging pagtitipon natin kahapon sa Casiguran Gymnasium kasama ang ating mga kabataan at kanilang mga magulang mula sa ibat ibang paaralan sa sekondarya sa ating bayan.
Taos-puso akong nagpapasalamat kay Governor Boboy Hamor sa pagdadala sa Casiguran ng “Be Wise, Be Safe, We Save” initiative sa ilalim ng Katrangkiluhan Program. Napakahalaga ng ganitong programa dahil hindi lamang ito tungkol sa pagbibigay ng kaalaman, kundi tungkol sa paggabay sa ating mga kabataan na gumawa ng tama, maging responsable, disiplinado, at higit sa lahat, matutong rumespeto at magmalasakit sa kapwa.
Bilang punong bayan, isa sa mga bagay na talagang nais kong bigyang-pansin ay ang bullying. Sana matutunan nating maging mabuti sa isa’t isa. Walang lugar ang pang-aapi sa ating mga paaralan at komunidad. Sa simpleng respeto, kabutihan at malasakit, malaki na ang maitutulong natin sa buhay ng iba.
At sa ating mga kabataan, lagi kong sinasabi: “Kayo lang naman ang papalit sa amin.” Kayo ang magiging susunod na mga lider, g**o, doktor, abogado, kawani at mga taong maglilingkod sa ating bayan. Kaya habang maaga, piliin ninyo ang tama, pangalagaan ang inyong sarili at pahalagahan ang inyong kinabukasan.
Maraming salamat sa ating mga School Heads, teachers, parents, DepEd, Public Attorney’s Office, Sangguniang Bayan sa pangunguna ni Vice Mayor Dennis Escudero, Sangguniang Panlalawigan sa pangunguna ni Vice Governor Jun Jun Escudero, mga Provincial Department Heads, Lgu Department heads at sa lahat ng naging bahagi ng makabuluhang programang ito.
Para sa ating mga kabataan, patuloy kaming nandito upang gumabay, sumuporta at maglingkod.
Sulong Sidlak Casiguran
