17/07/2026
𝐋𝐓𝐎 𝐑𝐞𝐠𝐢𝐨𝐧 𝟐, 𝐍𝐚𝐠-𝐢𝐬𝐲𝐮 𝐧𝐠 𝐒𝐡𝐨𝐰 𝐂𝐚𝐮𝐬𝐞 𝐎𝐫𝐝𝐞𝐫𝐬 𝐬𝐚 𝐦𝐠𝐚 𝐝𝐫𝐢𝐯𝐞𝐫 𝐚𝐭 𝐫𝐞𝐡𝐢𝐬𝐭𝐫𝐚𝐝o𝐧𝐠 𝐦𝐚𝐲-𝐚𝐫𝐢 𝐧𝐠 𝐦𝐠𝐚 𝐉𝐞𝐞𝐩 𝐧𝐚 𝐬𝐚𝐧𝐠𝐤𝐨𝐭 𝐬𝐚 𝐤𝐚𝐫𝐞𝐫𝐚𝐡𝐚𝐧 𝐬𝐚 𝐈𝐬𝐚𝐛𝐞𝐥𝐚
Naglabas ng Show Cause Order (SCO) ang Land Transportation Office (LTO) Region 2 laban sa mga may-ari at driver ng mga pampasaherong jeep na umano'y sangkot sa isang insidente ng karera na naganap sa kahabaan ng National Highway sa San Manuel, Naguilian, Isabela noong Hulyo 16, 2026.
Batay sa kumalat na video sa social media, makikita ang dalawang pampasaherong jeep na tila nag-uunahan o nagkakarera habang may sakay na mga pasahero. Makikita din sa video na estudyante ang nakasakay sa bubong ng mga sasakyan, na nagdulot ng matinding panganib sa kanilang kaligtasan at sa iba pang gumagamit ng kalsada.
Bilang tugon sa insidente, nagsagawa ng agarang aksyon ang LTO Region 2 sa pamamagitan ng pag-issue ng Show Cause Order upang ipatawag ang mga sangkot na driver at rehistradong may-ari ng mga sasakyan. Pansamantala namang sinuspinde ang rehistro ng mga sangkot na sasakyan pati na rin ang mga lisensya ng mga driver.
Layunin ng opisina na alamin ang buong pangyayari at matukoy ang mga posibleng paglabag sa mga umiiral na batas at regulasyon sa transportasyon. Makikipag ugnayan din ang opisina sa Land Transportation Franchising and Regulatory Board (LTFRB) patungkol naman sa prangkisa ng mga sasakyan.
Patuloy na paalala ng LTO Region 2 sa lahat ng mga driver at operator ng pampublikong sasakyan na unahin ang kaligtasan ng mga pasahero at mahigpit na sumunod sa mga batas-trapiko. Hindi kukunsintihin ng ahensya ang anumang uri ng iresponsableng pagmamaneho na maaaring maglagay sa panganib ng buhay ng publiko.
