15/04/2025
CPNP INIUTOS ANG MAHIGPIT NA SEGURIDAD PARA SA SEMANA SANTA, TINIYAK ANG PAGBANTAY SA KARAHASAN KAUGNAY NG ELEKSIYON
Ipinahayag ng Hepe ng Philippine National Police (PNP), Police General Rommel Francisco D. Marbil, ang mga pangunahing gabay sa operasyon sa isang Command Conference na ginanap ngayong araw, Abril 14, 2025, sa PNP Main Conference Room, Camp BGen Rafael T. Crame. Dumalo sa naturang conference ang mga miyembro ng Command Group at Directorial Staff, habang ang mga Direktor ng National Support Units (NSU), mga Regional Directors, Command Groups at Staff, mga District Directors, Provincial Directors, Chiefs of Police, at iba pang key officers ay umatend sa pamamagitan ng virtual platform.
Sa kanyang mensahe, binigyang-diin ni Chief PNP ang pagpapalakas ng police visibility at mga proaktibong hakbang para sa kaligtasan ng publiko sa darating na Semana Santa.
"Siguraduhin natin ang kaligtasan ng ating mga kababayan. Ipakita natin ang presensya ng kapulisan sa mga checkpoint at chokepoint," utos ni PGen Marbil. Binanggit niya ang pangangailangan na masusing subaybayan at pigilan ang mga karaniwang krimen tulad ng pagnanakaw at akyat-bahay, lalo na sa mga panahong maraming pamilya ang naglalakbay para magbakasyon.
Inutusan din ni PGen Marbil ang lahat ng yunit ng PNP na ipagpatuloy ang pagpapatupad ng gun ban at paigtingin ang koordinasyon sa mga opisyal ng barangay, mga tanod, at mga security guards sa mga subdivision at mga komersyal na establisimyento upang maiwasan ang mga potensyal na banta.
Dagdag pa, pinaalalahanan ni Chief PNP ng mga commander na panatilihin ang transparency sa pag-uulat ng mga krimen, at nagsabi:
“Ipakita natin ang totoong datos ng krimen. Kung may pagtaas, mahalaga na aminin natin ito para mas maunawaan natin ang sitwasyon, makapagresponde ng maayos, at makahanap ng mga epektibong solusyon, ito ang tunay na kahulugan ng serbisyo publiko," dagdag niya.
Tungkol naman sa isyu ng pangangampanya sa halalan, binanggit ni Chief PNP na ang holy week ay maaaring magbigay ng pagkakataon para sa pangangampanya dahil maraming tao ang umuuwi sa kanilang mga bayan. Nagbigay siya ng babala na maaaring magdulot ito ng pagtaas ng mga aktibidad politikal at nanawagan ng pagiging alerto.
Sa pagpaptuloy naman ng election period, binigyang-diin ni Chief PNP ang pangangailangan ng pagiging mapagmatyag sa mga lugar na may iniulat na karahasan.
Ipinag-utos din ng Chief PNP ang patuloy na paggamit ng mga body-worn cameras o alternatibong mga recording device sa mga checkpoint at chokepoint upang matiyak ang accountability at seguridad bago at habang isinasagawa ang mga aktibidad sa halalan.
Sa huli, pinaalalahanan ni PGen Marbil ang lahat ng mga tauhan na manatiling apolitical, na binanggit ang mga kamakailang insidente ng mga PNP personnel na umano'y kasali sa mga partisan na aktibidad.
"Huwag kayong magpagamit sa mga politiko. Manatili tayong apolitical. Nagsisilbi tayo sa mga Pilipino—hindi sa mga interes ng mga politiko," mariing sinabi ni PGen Marbil.
Tiniyak ng PNP sa publiko ang kanilang buong suporta sa pagpapanatili ng kapayapaan at kaayusan, lalo na sa panahon ng Semana Santa at sa panahon ng halalan, sa pamamagitan ng pinaigting na presensya ng kapulisan, stratehiya sa operasyon, at pagiging propesyonal.
