05/07/2026
AKSESIBILIDAD AT KABUHAYAN, HUWAG IPAGKAIT SA DAGUPEÑO!: PANANAWAGAN KAY MAYOR BELEN FERNANDEZ NA IRECONSIDER ANG TOTAL BAN SA PISONET SA DAGUPAN
Mariing nananawagan ang Kabataan Partylist sa lokal na pamahalaan ng Dagupan, sa pamumuno ni Mayor Belen Fernandez, na muling suriin at ireconsider ang pagpapatupad ng City Ordinance No. 2383-2026 na nag-uutos ng total closure ng mga pisonet establishments sa ating lungsod.
Bagamat kaisa ang aming hanay sa layuning protektahan ang kapakanan at moralidad ng mga kabataan laban sa adiksyon sa sugal o hindi angkop na online content, ang biglaang pagpapasara sa mga pisonet nang walang malinaw na alternatibo ay isang hakbang na pumapatay sa kabuhayan ng mga maliliit na pamilya at nagkakait ng karapatan sa edukasyon ng mga maralitang mag-aaral.
Dapat nating makita ang pisonet hindi lamang bilang lunduyan ng laro, kundi bilang isa ring kagamitan sa pag-aaral. Sa panahon ngayon na digital na ang mga takdang-aralin, pagsasaliksik, at mga enrollment processes, hindi lahat ng pamilyang Dagupeño ay may kakayahang bumili ng sariling laptop o magpakabit ng mamahaling Wi-Fi sa bahay. Ang pisonet ang pinakamura at pinaka-accessible na takbuhan ng mga ordinaryong estudyante upang makatapos ng kanilang mga academic requirements. Ang pag-alis nito nang walang kapalit na libreng internet hubs sa bawat barangay ay direktang parusa sa mga mahihirap na mag-aaral.
Higit sa lahat, ang mga pisonet na ito ay pinatatakbo ng mga munting negosyante—mga nanay, tatay, at lokal na pamilyang Dagupeño na umaasa sa barya-baryang kita upang may maitustos sa pang-araw-araw na pagkain, pambayad sa kuryente, at pang-matrikula rin ng kanilang mga anak. Sa gitna ng nagtataasang presyo ng bilihin, ang "Notice of Closure" ay parang pagpataw na rin ng parusa sa mga pamilyang marangal na naghahanapbuhay.
Naniniwala ang Kabataan Partylist na ang solusyon ay hindi "PAGBABAWAL" (Prohibition) kundi "REGULASYON" (Regulation).
Hinihimok natin ang City Council at ang Office of the Mayor na maupo muli sa isang diyalogo kasama ang mga mag-aaral, magulang, at mga pisonet operators upang bumuo ng mga makataong alituntunin, tulad ng:
1. Strict Operating Hours: Pagbabawal sa mga estudyante na gumamit ng pisonet sa oras ng klase.
2. Content Filtering: Pag-obliga sa mga may-ari na mag-install ng website blockers para sa mga pornographic at gambling sites.
3. Responsible Parenting at Makamasang Curfew, Hindi Total Ban: Kilalanin na sa tindi ng kahirapan, maraming pamilyang Dagupeño ang walang sariling telebisyon, internet, o computer sa bahay, kaya’t ang pisonet ang nagsisilbing pangunahing bintana ng mga tao sa impormasyon at edukasyon. Sa halip na ipasara ang negosyo, isulong ang Responsible Parenting kung saan ang mga magulang at operators ay magkatuwang sa pagpapatupad ng makatwirang curfew sa paggamit.
Mayor Belen, protektahan natin ang kabataan, ngunit huwag sa paraang lalo silang ilulubog sa kahirapan at kawalan ng akses sa teknolohiya. Ang tunay na pagkalinga sa kinabukasan ng kabataan ay ang paggabay sa kanila, habang sinisiguro na walang pamilyang nagugutom at walang estudyanteng naiiwan.
KABUHAYAN AT EDUKASYON, IPAGLABAN!
REGULASYON, HINDI TOTAL BAN!
