09/04/2026
RTC PILI, PINAGTIBAY ANG NAUNANG DESISYON SA EXPROPRIATION; MGA MOSYON, IBINASURA!
Pinaboran ng Regional Trial Court (RTC) Branch 33 sa Pili ang pamahalaang panlalawigan ng Camarines Sur sa kasong expropriation laban sa ilang magsasaka, matapos nitong ibasura ang mga mosyon na inihain ng mga respondent upang pigilan ang pagkuha ng lupa.
Sa kautusang may petsang Abril 7, 2026, tinanggihan ng korte ang ex parte urgent motion para sa Temporary Restraining Order (TRO) at writ of preliminary injunction na inihain ng mga nasasakdal. Ayon sa korte, walang sapat na batayan upang pigilan ang implementasyon ng naunang kautusan hinggil sa pagkuha ng nasabing mga lupain.
Ipinunto ng hukuman na ang sinasabing pinsala ng mga magsasaka ay pangunahing “economic” lamang at maaaring mabayaran sa pamamagitan ng just compensation, na siyang sentrong usapin sa mga kasong expropriation. Dagdag pa rito, hindi umano napatunayan ang “irreparable injury” na kinakailangan upang maglabas ng injunction.
Binigyang-diin din ng korte na sumunod ang lokal na pamahalaan sa mga legal na rekisitos sa pagkuha ng ari-arian, kabilang ang kinakailangang deposito at ang proseso ay dumaan sa tama at legal na pamamaraan alinsunod sa batas.
Nilinaw rin ng korte na ang ginagawang pagbabakod ng pamahalaan sa mga lupang sakop ng kaso ay hindi maituturing na paglabag sa naunang kautusan, at hindi rin ito awtomatikong nangangahulugan ng demolisyon ng mga istruktura.
Bukod dito, ibinasura rin ng korte ang motion for reconsideration ng ilang mga magsasaka, dahil umano sa kawalan ng bagong argumento o ebidensya. Gayundin, itinuring na may kakulangan sa pormal na rekisito ang mosyon para sa indirect contempt kaya ito rin ay hindi pinaboran.
Sa nasabing kautusan, muling iginiit ng korte ang naunang direktiba na nagbibigay ng tatlumpung (30) araw sa mga apektadong residente upang alisin ang kanilang mga istruktura sa mga lupang sakop ng expropriation.
Ayon sa korte, sa sandaling matugunan ng pamahalaan ang mga legal na rekisito sa expropriation, may karapatan itong angkinin ang mga lupain para sa pampublikong gamit.
