Narvacan Naisangsangayan

20/08/2026

𝐂𝐨𝐦𝐦𝐮𝐧𝐢𝐭𝐲 𝐁𝐥𝐨𝐨𝐝 𝐃𝐨𝐧𝐚𝐭𝐢𝐨𝐧 𝐃𝐫𝐢𝐯𝐞,
naiwayat iti Barangay 𝐃𝐢𝐧𝐚𝐥𝐚𝐨𝐚𝐧

Balligi a naiwayat ti Community Blood Donation Drive iti Barangay Dinalaoan, babaen ti panangyuna ti Narvacan Rural Health Unit, ken iti tulong ti Provincial Health Office, Ilocos Sur Provincial Hospital–Gabriela, ken ti Department of Health.

Iti naiwayat a blood donation drive, aganay a 41 𝙗𝙡𝙤𝙤𝙙 𝙪𝙣𝙞𝙩𝙨 ti nakolekta a naidonar kadagiti nagboluntariong ken naayat a nagidonar.

Napateg ti agtultuloy a panagidonar iti danum dagiti umili gapu ta makatulong daytoy kadagiti agkasapulan a mayalisonan iti dara, a makatulong iti panangsalbar iti biag.

Nagbalin a naurnos ti programa babaen ti tulong ken suporta dagiti opisial iti Barangay Dinalaoan ken ti gobierno lokal ti Narvacan, iti panangidaulo ni Mayora Dra Edna Cabalo Sanidad.

Mainaig itoy, agyaman ti RHU Narvacan iti panangidaulo ni Dr. Angelo Gurion, iti agtultuloy a pannakikaykaysa dagiti umili itoy a tignay nangruna kadagiti boluntario a blood donor. Agyamanda pay iti Philippine Coast Guard - Santa iti aktibo a pannakikaykaysa ken suportada iti programa.

19/08/2026

223 Narvacanean Senior citizens,
impaayan ti NCSC iti insentibo

Aganay 223 a lallakay ken babbaket nga agtawen iti 80, 85, 90, ken 95 ti immawat ti sag-P10,000 kas insentibo manipud iti National Commission of Senior Citizens (NCSC) Regional Office 1.

Naited ti cash gift itay agsapa ti Agosto 19, 2026 idiay Narvacan Covered Court babaen dagiti staff ti NCSC Regional Office, kadua da Municipal Administrtor Atty. Jamyrah Sanidad, MSWDO Pauline Cabunoc, OSCA President Veneranda Dasalla, ken dagiti Senior Citizens Presidents kadagiti barbarangay.

Segun ken MSWDO Cabunoc, dagiti benepisiario ket dagiti nagkasangay ken nagtawen iti 80, 85, 90 ken 95 idi 2024, 2025 ken Enero agingga Hunio 2026.

Mainaig itoy, nagyaman dagiti benepesiario iti gobierno iti insentibo nga inawatda, Kinunada a dakkel a tulong kadakuada ti nadakamat a gatad ta panggatangda iti agas, gatas ken dadduma pay a kasapulanda. (Maribel Sabalo Malabag)

19/08/2026

Wheelchairs, naited iti 2 a Narvacanean PWD

Personal nga inyawat ni Mayora Edna Cabalo Sanidad dagiti dua a brand new a wheelchairs iti dua a Narvacanean persons with disabilities (PWD) idi Agosto 18, 2026.

Naited dagiti wheelchairs kas tulong ti LGU Narvacan kadagiti PWDs ken nataengan a saanen a makaaliwaksay pay gapu iti sagsagabaaenda.

Kabarbaro ken personalized dagiti wheelchair a direkta a nayorder iti manufacturer ken addaan iti pagprenuan iti pagiggaman tapno malaksid iti lock iti pilid dagitoy.

Nalagda dagiti wheelchair ta mabalin nga aramaten dagiti nadadagsen a kas iti agdagsen iti 100 kilos agpangato.

19/08/2026

2 Narvacan Centenarians,
umawat iti sag-P100,000 a cash gift

Dua a Narvacanean centenarians ti umawat iti sag-P100,000 ita nga aldaw, Agosto 19, 2026. Personal nga idanon da Mayora Dra Edna Cabalo Sanidad ti benepisio dagiti dua, a kaduaen dagiti dadduma pay nga opisial ti LGU Narvacan, OSCA Narvacan ken DSWD ken MSWDO nga idauluan da Veneranda Dasalla ken Pauline Cabunoc.

Maited ti P100,000 a benepisio iti asino man a Filipino nga umabot iti 100 a tawen kas sagudayen ti Under the Expanded Centenarians Act (Republic Act No. 11982) ken Letter of Felicitation kas pormal congratulatory letter manipud ken ni Presidente Ferdinand Marcos Jr.

Dagiti Narvacan centenarians: Da Gregorio Canto ti Quinarayan, Narvacan, ken ni Rufina Cabreros Canieso ti San Pedro, Narvacan.
Malaksid kadagiti dua a centenarian, umawat met iti sag-P10,000 dagiti Narvacanean nga agtawen iti 80, 85, 90, ken 95 kas inreport ti MSWDO.

Kinuna ni Veneranda Dasalla nga aganay a 223 amin dagiti benepisiario itoy a tawen nnga umawat iti P10,000.

18/08/2026

DAY 4 ti Panagbakuna

Iti agtultuloy a pannakaiwayat ti Measles-Rubella Supplemental Immunization Activity (MR SIA) 2026, tinurong dagiti kameng ti RHU Narvacan vaccination team kadagiti sumaganad a barangay: Ambulogan, Dasay, Sta. Lucia, Sucoc, at Sulvec.

Ikagumaan dagiti kameng ti Narvacan RHU ken DOH a danonen tapno allukoyenda dagiti nagannak a mangpabakuna kadagiti annakda kontra iti Kamuras ken Rubella (Tigdas Hangin).

Ti umay a lawas, ituloy a danonen ti vaccination team dagiti dadduma pay a barangay tapno masiguro nga awan ti ubing a Narvacanean a mabati ken saan a mabakunaan. Maisiguro nga amin nga ubing a Narvacanean maipaayan iti proteksion kontra iti Kamuras ken Rubella.

Tunggal bakuna,nayon a proteksion. Napateg ti tunggal biag! ❤️

18/08/2026

Mangrugi no August 24, daytoy ti suroten iti panagtrabaho:

17/08/2026

17/08/2026

14 nga empleado ti LGU Narvacan, naipermanente

Inaprobarann ti Civil Service Commission ti pannakaipromot ken pannakadutok a permanente ti 14 nga empleado ti LGU Narvacan epektibo iti Hulio 1, 2026 kas impakaammo ni Cesar Banez ti Human Resources Department ti LGU Narvacan.

Dinutokan ken naipromot dagiti 14 nga empleado babaen ken ni Mayora Edna Cabalo Sanidad, DMD. Kaaduan kadagiti nadutokan ken naipromot ti nabayagen nga agserserbi iti gobierno lokal.

Dagiti nadutokan ken naipromot ti pakairamanan da Dr. Reynante F. Bernal, Medical Officrer III; John Kehrwin C. Rejano, Medical Technologist I; Christian Jakeson C. Cabebe, Nurse II; Denzel V. Damasco, Santation Inspector II; Jeaniva T. Aquino, Admin Officer II; Melody Jade C. Concordia, Youth Development Officer II; Febe C. Bueno, Admin Assistant l; Judith Maria C. Paeste, Admin Aide l; Caila Mae D. Soria, Admin Aide ll; Kristine Zaide B. Dubb, Admin Aide, l; Sheila Marie S. Habagat, Admin Aide lV; Jacqie Q. Alconis, Engineering Aide; Mikhaella Danielle R. Cabudoy, Admin Aide IV; ken Paul G. Nidoy, Draftsman.

Iti pannakaipromot ken pannakaipermanente dagiti 14 nga empleado ti LGU Narvacan ti mangipanamnama a nasaysayud pay ti pannakaipaay ti serbisio kadagiti umili.

17/08/2026

NNCHS students a nagrimat iti Science Olympiad
idiay Thailand, pinadayawan ti LGU Narvacan

Binigbig ti gobierno lokal ti Narvacan, iti panangidaulo ni Mayora Edna Cabalo Sanidad, DMD, kaduana da Bise Mayor Margarito Tejada, Municipal Administrator Atty. Jamyrah Sanidad, ken dagiti miembro ti konseho munisipal dagiti tallo nga estudiante iti Narvacan National Central High School a nagrimat iti Science Olympiad idiay Bangkok, Thailand.

Inyawid dagiti tallo nga estudiante ti pammadayaw para iti pagadalanda nga NNCHS ken ili a Narvacan babaen iti medalia ken sertipiko ti pammigbig nga awitda.

Naipresenta dagiti agad-adal, kaduada dagiti coach, iti naiwayat a traditiona flag ceremony iti munisipio ti Narvacan itay agsapa ti Agosto 17, 2026 iti panangsaksi dagiti dadduma pay nga opisial ken empleado ti gobierno lokal ti Narvacan.

Dagiti tallo nga agad-adal, da Carl Ronquillo, Bronze Awardee; Arabella Quio-isen ken Marc Andres Cabreros, agpada nga Achiever, ti nakisalip iti internasional nga olimpiada iti Matematika, iti Siam International Math and Science Olympiad, a naangay idi Agosto 7-10, 2026.

Kinadua dagiti tallo dagiti coach-da, da Merna Cabbat, Liza Marie Fagela, ken Efren Cabotage.

Mabigbig ti NNCHS a kas” Home of Champions” gapu iti kinaadun dagiti nagab-abakanda a pasalip pang-akademiko ditoy ken iti ballasiw taaw, daytoy a kaudian a nagun-od dagiti tallo nga estudiante a balligi ti agserbi nga inspirasion kadagiti agtutubo saan la nga iti pagadalanda no di iti intero a Narvacan. (Maribel Sabalo Malabag)

13/08/2026

Narvacan TODA Livelihood Program Validation, inrusat ti DOLE

Kas tulong ti Department of Labor and Employment (DOLE) kadagiti traysikelan iti Narvacan, Ilocos Sur, mangilatang iti pundo a maaramat iti pannakairusat ti livelihood program a para kadagiti kameng ti Narvacan Tricycle Operators Drivers Association (TODA).

Naiwayat ti rofiling ken validation kadagiti miembro ti Narvacan TODA itay agsapa ti Agosto 13, 2026 kas panagsagana iti maipasdek a livelihood program para kadakuada babaen ti DOLE ken iti inisiatibo ni Cong. Kristine Singson Meehan a maipadalan met iti LGU Narvacan, iti panangidaulo ni Mayora Edna Cabalo Sanidad, DMD ken ti Narvacan PESO Office nga idauluan ni Luisa Regua.

Naisayangkat ti validation babaen dagiti staff ti Narvacan PESO iti panangiwanwan dagiti staff ni Congresswoman Singson.

Segun ken Mr. Jennifer Bucaneg, Livelihood Development Specialist iti DOLE Provincial Office, no malpas ti validation maipasa ti Project Proposal ti grupo iti DOLE Regional Office. Urayento laengen ti resulta kalpsanna.

Napagnunumuan a no ania ti mapagkaykaysaan ti Narvacan TODA a livelihood program isu ti pakausaran ti pundo a maited. Segun iti President ti TODA, mausar a pangkapital para iti maipasdek nga spare parts store a gumatanganto dagiti kameng iti kasapulanda a pilid, interior, spracket, pang-change oil, bearing ken dadduma pay a piesa a kasapulanda tapno saanda unay a mapanginaan.

Kuna dagiti kameng ti Narvacan TODA a dakkelto a makatulong kadakuada ti nasao a livelihood program apaman a maipasdek daytoy. Naammuan pay a mangbukelda iti kooperatiba a mangimanehar iti planoda a maipasek a motorcycle spare part store. (Maribel Sabalo Malabag)