Juban Municipal Information Office

01/09/2026

UPDATE: NATIONAL ID REGISTRATION SET TOMORROW AT LGU JUBAN

Ipinapaabot sa mga residente ng Juban na ang naunang itinakdang National ID Registration sa Setyembre 3 ay ililipat at isasagawa na bukas, Setyembre 2, 2026 (Miyerkules), sa Municipal Civil Registrar (MCR) Lobby ng Lokal na Pamahalaan ng Juban.

Magsasagawa ang Philippine Statistics Authority (PSA) – Sorsogon Provincial Statistical Office ng PhilSys Registration para sa mga residenteng hindi pa nakapagpaparehistro sa National ID.

Inaanyayahan ang mga nais magparehistro na magpunta bukas at dalhin ang kinakailangang orihinal na dokumento para sa maayos na proseso.

01/09/2026

LGU JUBAN EXPANDS BARANGAY-BASED PUBLIC SERVICES IN BURABURAN

Upang mailapit sa mga residente ang mahahalagang serbisyo ng pamahalaang bayan, nagsagawa ang Lokal na Pamahalaan ng Juban ng Barangayanihan sa Barangay Buraburan ngayong araw ng Martes, Sept.1, 2026, kung saan sabay-sabay na inihatid sa komunidad ang serbisyong medikal, panlipunan, agrikultural, legal, at iba pang transaksiyong pampamahalaan.

Isinagawa ang aktibidad bilang bahagi ng barangay outreach program ng munisipyo sa ilalim ng pamumuno ni Mayor Rogel “Botox” Fulleros. Nagsimula ganap na alas-8:00 ng umaga ang sabay-sabay na paghahatid ng mga serbisyo upang mas mapadali ang access ng mga residenteng nahihirapang magtungo sa munisipyo.

Kabilang sa mga serbisyong inilaan ang libreng medical consultation, dental, pamamahagi ng gamot at bitamina, social welfare assistance, at agricultural technical services. Namahagi rin ng mga binhi at pataba bilang suporta sa backyard farming at iba pang gawaing pangkabuhayan ng mga residente.

Nagbigay naman ang Municipal Environment and Natural Resources Office ng impormasyon hinggil sa wastong waste segregation at pagpapatupad ng umiiral na ordinansa sa pamamahala ng basura. Layunin nitong palawakin ang kaalaman ng mga residente sa tamang pagtatapon at paghihiwalay ng basura sa antas ng komunidad.

Kasabay nito, ipinamahagi ng Municipal Treasurer’s Office ang mga aprubadong business permit ng mga residente ng Barangay Buraburan. Sa pamamagitan ng barangay-based distribution, nabawasan ang pangangailangang bumiyahe pa ng mga benepisyaryo patungo sa munisipyo upang kunin ang kanilang mga dokumento.

Naglaan din ng assistance ang Municipal Assessor’s Office para sa mga usaping may kaugnayan sa assessment ng real properties at paglilipat ng titulo para sa mga CLOA holder. Nagbigay ang tanggapan ng gabay tungkol sa mga kinakailangang dokumento at kaukulang proseso. Naging bahagi rin ng aktibidad ang pagproseso at pag-renew ng Provincial ID para sa mga kwalipikadong residente.
Nagbigay naman ng employment-related assistance ang PESO at Job Training Center, habang naghatid ang Municipal Civil Registrar’s Office ng civil registry services kabilang ang assistance sa civil documents at records processing.

Para naman sa mga residente na may mga usaping nangangailangan ng legal na gabay, nagbigay ng libreng legal assistance si Municipal Administrator Atty. Relina Arellano.
Kasabay nito, naghatid din ng karagdagang serbisyo sa komunidad ang Philippine Army sa pamamagitan ng libreng gupit at libreng masahe. Nagkaroon din ng libreng manicure, pedicure, at hair coloring para sa mga residente bilang bahagi ng mga serbisyong inilaan sa nasabing aktibidad.

Sa pamamagitan ng Barangayanihan, patuloy na pinalalawak ng LGU Juban ang barangay-level service delivery upang mabawasan ang oras, gastusin, at hirap ng mga residenteng nangangailangan ng transaksiyong pampamahalaan. Bahagi ito ng pagsusulong ng mas accessible at responsive na lokal na pamamahala kung saan ang mga pangunahing serbisyo ay inilalapit mismo sa mga komunidad.

01/09/2026

MUNICIPAL NUTRITION COUNCIL 3RD QUARTER MEETING UNDERWAY IN JUBAN

Kasalukuyang isinasagawa ngayong Martes, Setyembre 1, 2026 sa Executive Conference Hall, Juban, Sorsogon ang 3rd Quarter Municipal Nutrition Council (MNC) Meeting upang pag-usapan ang mga mahahalagang hakbang para sa pagpapalakas ng mga programang pangnutrisyon sa bayan ng Juban.

Pinangungunahan ni Ma’am Gail Elpos bilang Presiding Officer ang pagpupulong kasama ang mga miyembro ng Municipal Nutrition Council.

Kabilang sa mga pangunahing agenda ng pagpupulong ang Presentation and Approval of the Local Nutrition Action Plan (LNAP) at Annual Investment Plan (AIP), reorganization ng Municipal Nutrition Council (MNC), at presentation and update ng Means of Verification (MOVs) para sa internal validation.

Isinasagawa ang pagpupulong bilang bahagi ng patuloy na koordinasyon ng Lokal na Pamahalaan upang mas mapahusay ang pagpaplano, pagpapatupad, at monitoring ng mga programang pangnutrisyon na nakatuon sa pangangailangan ng komunidad.

Ang aktibidad na ito ay bahagi ng pagsusulong ng liderato ni Mayor Rogel “Botox” Fulleros ng mga programang nagbibigay-pansin sa mahahalagang serbisyo ng pamahalaan, kabilang ang nutrisyon at kalusugan ng mga Jubangnon.

Patuloy na pinagtitibay ng Municipal Nutrition Council ang ugnayan ng mga tanggapan at frontliners upang matiyak ang mas maayos na pagtugon sa mga usaping pangnutrisyon sa bayan ng Juban.

01/09/2026

LGU JUBAN EMPLOYEES OBSERVE TUESDAY FLAG-RAISING CEREMONY AFTER NATIONAL HEROES DAY HOLIDAY

Matapos ang paggunita sa National Heroes Day kahapon, Agosto 31, nakiisa ang mga empleyado ng Lokal na Pamahalaan ng Juban sa isinagawang flag-raising ceremony ngayong Martes, Setyembre 1, 2026, bilang pagpapatuloy ng regular na pagbibigay-galang sa watawat ng Pilipinas at mga pambansang sagisag.

Bagama’t karaniwang isinasagawa tuwing Lunes ng umaga ang flag-raising ceremony, isinagawa ito ngayong Martes dahil walang regular na pasok sa mga tanggapan ng pamahalaan nitong Lunes bilang paggunita sa National Heroes Day, isang pambansang holiday. Sa pagbabalik ng operasyon ng pamahalaang bayan, sama-samang dumalo ang mga kawani upang ipagpatuloy ang seremonyang bahagi ng kanilang tungkulin bilang mga lingkod-bayan.

Ang pagsasagawa ng flag ceremony ay alinsunod sa Section 18 ng Republic Act No. 8491 o Flag and Heraldic Code of the Philippines, na nag-aatas sa lahat ng tanggapan ng pamahalaan at mga institusyong pang-edukasyon na magsagawa ng flag-raising ceremony tuwing Lunes ng umaga at flag-lowering ceremony tuwing Biyernes ng hapon.

Higit pa sa pagiging isang nakagawiang aktibidad, nagsisilbi itong paalala sa mga kawani ng pamahalaan tungkol sa kahalagahan ng pagiging makabayan, disiplina, at respeto sa mga simbolo ng bansa. Ito rin ay pagkakataon upang muling sariwain ang mga sakripisyo ng mga bayaning nag-alay ng kanilang buhay para sa kalayaan at kinabukasan ng sambayanan.

Sa ilalim ng pamumuno ni Mayor Rogel “Botox” Fulleros, patuloy na binibigyang-halaga ng Lokal na Pamahalaan ng Juban ang mga gawaing nagpapalakas sa kultura ng disiplina, pagkakaisa, at propesyonalismo sa serbisyo publiko.

Sa sama-samang pagharap sa watawat, muling pinagtitibay ng mga kawani ng LGU Juban ang kanilang pangako na maglingkod nang may katapatan, pananagutan, at malasakit para sa bawat Jubangnon.

01/09/2026

PSA TO CONDUCT NATIONAL ID REGISTRATION AT LGU JUBAN/MCR LOBBY ON SEPTEMBER 3

Ang Philippine Statistics Authority (PSA) – Sorsogon Provincial Statistical Office ay magsasagawa ng PhilSys Registration (National ID Registration) ngayong Setyembre 3, 2026 (Huwebes) sa Municipal Civil Registrar (MCR) Lobby ng Lokal na Pamahalaan ng Juban.

Ang aktibidad ay bahagi ng patuloy na pagpapatupad ng Republic Act No. 11055 o Philippine Identification System (PhilSys) Act, na naglalayong mabigyan ang bawat Pilipino ng opisyal at valid na patunay ng pagkakakilanlan.

Inaanyayahan ang mga residente ng Juban na hindi pa nakapagpaparehistro sa National ID na samantalahin ang pagkakataong ito at magtungo sa itinakdang venue dala ang kinakailangang dokumento.

Mga kinakailangang dokumento:

Para sa edad 0–4 taong gulang:
👉Original copy ng Birth Certificate
👉National ID ng magulang o guardian (card, paper form, o Digital ID)

Para sa edad 5 taong gulang pataas:
👉Original copy ng Birth Certificate
o
👉Anumang government-issued ID

Pinapaalalahanan ang mga residente na tiyaking tama at orihinal ang mga dokumentong ihaharap para sa maayos at mabilis na proseso ng pagpaparehistro.

Bibigyang prayoridad ang senior citizens at Persons with Disabilities (PWDs). Para naman sa mga bedridden na residente, maaaring makipag-ugnayan sa BASCA Officials o Assigned PhilSys Personnel upang mabigyan ng kinakailangang assistance.

Para sa iba pang iskedyul ng Barangay Mobile at Fixed Registration sa buong buwan ng Setyembre 2026, tingnan ang nakalakip na schedule.

👇👇👇👇
👇👇👇👇

31/08/2026

31/08/2026

BEYOND HEROISM: THE LEGACY OF SERVICE AND LEADERSHIP FOR JUBAN

Sa bawat paggunita ng Araw ng mga Bayani, hindi lamang natin inaalala ang mga pangalan na nakasulat sa ating kasaysayan. Higit sa lahat, binibigyang-pugay natin ang diwa ng kabayanihan na patuloy na nagbibigay inspirasyon sa bawat Pilipinong naglilingkod at nagsisikap para sa ikabubuti ng kapwa.

Hindi natatapos ang kabayanihan sa mga pangalan na nakaukit sa kasaysayan. Patuloy itong nabubuhay sa mga taong humaharap sa hamon ng panahon, tumutupad sa kanilang tungkulin, at naglalaan ng sarili upang makapagbigay ng mas magandang kinabukasan sa iba.

Mula sa mga bayaning nag-alay ng buhay para sa kalayaan ng bansa hanggang sa mga makabagong bayani na araw-araw na nagsisilbi sa kanilang pamilya at komunidad, ipinapaalala nila na ang pagmamahal sa bayan ay hindi lamang ipinapahayag. Ito ay isinasabuhay sa pamamagitan ng pagkilos, pananagutan, at malasakit.

Sa ganitong diwa dapat tingnan ang tunay na kahulugan ng pamumuno.

Dahil ang pagiging lider ay hindi lamang tungkol sa paghawak ng posisyon. Ito ay isang pananagutang nangangailangan ng paninindigan, malasakit, at malinaw na pananaw kung paano mapapabuti ang buhay ng mga taong ipinagkatiwala sa kanyang pangangalaga.

Ito ang pananaw na isinusulong ni Mayor Botox-Rogel Fulleros sa kanyang paglilingkod sa Juban.

Sa kanyang pamumuno, ang pamahalaan ay hindi lamang dapat naririnig sa panahon ng pangangailangan. Dapat itong nakikita at nararamdaman sa mga serbisyong umaabot sa mamamayan, sa mga programang nagbibigay ng oportunidad, at sa mga hakbang na naglalayong maglatag ng mas matatag na kinabukasan para sa bayan.

Sapagkat ang isang lider ay hindi lamang dapat tumugon sa mga hamon ng kasalukuyan. Mahalaga ring isipin kung anong uri ng Juban ang maiiwan para sa susunod na henerasyon.

Ang kabayanihan sa panahon ngayon ay hindi na lamang nakikita sa mga malalaking pangyayari na nakasulat sa kasaysayan. Nakikita rin ito sa araw-araw na pagtupad sa tungkulin, sa paggawa ng mahihirap na desisyon para sa ikabubuti ng nakararami, at sa pagpili ng serbisyo kahit hindi laging madali ang landas.

Dahil ang tunay na paglilingkod ay hindi lamang tungkol sa pagkilala o papuri. Ito ay tungkol sa pagbabago ng buhay ng mga taong umaasa sa isang pamahalaang may malasakit at direksyon.

Ang mga bayani ng nakaraan ay nag-iwan ng kalayaang tinatamasa natin ngayon. Ang mga lider ng kasalukuyan naman ay may tungkuling mag-iwan ng pundasyong magsisilbing gabay ng mga susunod na henerasyon.

Sa Araw ng mga Bayani, binibigyang-pugay ng Lokal na Pamahalaan ng Juban ang lahat ng Pilipinong patuloy na nagsisilbi at nagbibigay ng halimbawa ng katapatan, sakripisyo, at pagmamahal sa bayan.

Sa Juban, ang diwa ng kabayanihan ay nagpapatuloy sa pamamagitan ng pamumunong nakatuon sa serbisyo, pagkakaisa, at pagbuo ng mas magandang kinabukasan para sa bawat Jubangnon.

Dahil ang isang posisyon ay maaaring matapos, ngunit ang mabuting pamumuno at tunay na serbisyo ay maaaring maging pamana na mananatili. 🇵🇭

30/08/2026

Sa loob man ng Juban Gymnasium ay punong-puno at siksikan, Hindi problema yan?

PANOORIN!

Kagabi sa ginanap na Final Games ng Basketball 🏀 at Volleyball 🏐 ng Mayor's Cup 2026 - Season 4, siksikan at wala ng maupuan ang mga manonood sa dami ng tao. Pero di naging problema sa iba ito, dahil kahit sa labas ng Gym, sa Juban Rizal Park ay LIVE na LIVE nilang napapanood ang mga laro. Ito ay dahil sa malaking LED wall na inilagay ng LGU Juban dahil sa kagustuhan ni Mayor Botox-Rogel Fulleros na mas maging masaya at may dagdag na mapagli-libangan ang mga Jubangnon sa kanilang pamamasyal.

29/08/2026

BEHIND EVERY GAME, THERE ARE PEOPLE WHO CHOOSE TO SHOW UP

Sa bawat matagumpay na laro, may mga taong hindi laging nasa gitna ng court, hindi laging nakikita sa litrato, at hindi laging nababanggit sa awarding. Pero sila ang tahimik na dahilan kung bakit maayos na naisasagawa ang bawat laban.

Sa pagtatapos ng Mayor’s Cup 2026, taos-pusong pasasalamat ang iniaalay sa lahat ng naging bahagi ng torneo mula unang araw hanggang championship.

Unang-una, kay Mayor Botox-Rogel Fulleros para sa buong suporta sa programang pang-isports na patuloy na nagbibigay ng pagkakataon sa mga kabataang Jubangnon na mahasa, makilala, at mas mapalawak ang kanilang kakayahan. Sa ganitong suporta, hindi lang palaro ang nabubuo. Nahuhubog din ang disiplina, kumpiyansa, at pangarap ng mga kabataang may kakayahang magdala ng karangalan sa Juban sa mas malalaking kompetisyon.

Kasama rin sa aming pasasalamat ang kanyang butihing maybahay, Ma’am Mae Pura Fulleros sa patuloy na suporta at presensyang nagbibigay-lakas sa mga programang para sa kabataan at sa komunidad. Ang ganitong suporta sa likod ng isang programa ay mahalagang bahagi rin ng pagpapatuloy ng mga gawaing tunay na may saysay para sa mga Jubangnon.

Malaking pasasalamat din kay Councilor Ryan Grefaldeo De Jesus , Chair ng Committee on Sports, na nagsilbing overall in-charge ng palaro at personal na nagsupervise mula Day 1 hanggang championship. Sa likod ng bawat schedule, bawat adjustment, bawat concern, at bawat importanteng desisyon, nandoon ang kanyang oras, tiyaga, at commitment para siguraduhing maayos ang daloy ng torneo.

Hindi rin magiging ganito katatag ang Mayor’s Cup kung wala ang buong suporta at kooperasyon ng mga Barangay Captains at barangay officials ng 25 barangays ng Juban. Mula sa paghahanda ng kani-kanilang teams, pakikipag-ugnayan sa organizers, hanggang sa pagsuporta sa kanilang mga manlalaro sa bawat laro, naging mahalagang bahagi ang bawat barangay sa tagumpay ng liga. Ang pagkakaisa ng 25 barangays ang isa sa pinakamalinaw na patunay na mas malayo ang nararating kapag sama-sama ang buong bayan.

Sa BNO at JMIO Technical Team, salamat sa pagtutok sa live sounds, technical setup, announcements, at iba pang kinakailangang suporta sa bawat laro. Maaaring hindi laging napapansin ang trabaho sa likod ng speakers, microphones, wires, at technical booth, pero malaking bahagi kayo ng energy at maayos na takbo ng bawat event.

Sa lahat ng empleyadong naka-duty sa iba’t ibang task, saludo kami sa inyo. May mga araw na kulang sa tulog, may mga gabing halata na ang eyebags, pero hindi naging dahilan ang pagod para pabayaan ang responsibilidad. Nandoon pa rin ang serbisyo, pakikisama, at malasakit hanggang matapos ang gawain.

Sa ating utility personnel, maraming salamat sa tuloy-tuloy na pagpapanatili ng kalinisan at kaayusan ng venue. Tahimik man ang inyong trabaho, ramdam ang halaga nito sa bawat larong ginaganap sa isang maayos at malinis na lugar.

At sa MDRRMO, salamat sa walang sawang pagbabantay at pagiging handa sa bawat laro. Ang presensya ninyo ay nagbibigay ng dagdag na seguridad at kapanatagan sa mga manlalaro, officials, at spectators.

Marami pang kamay ang kumilos, maraming oras ang ibinigay, at maraming pagod ang hindi na kailangang ikuwento. Pero lahat ng iyon ay naging bahagi ng tagumpay ng Mayor’s Cup 2026.

Ang isang matagumpay na torneo ay hindi lamang gawa ng mga manlalaro sa court. Nabubuo ito dahil may mga taong handang magtrabaho sa likod, may mga lider na buong pusong sumusuporta, may mga barangay na nagkakaisa, at may mga empleyadong pinipiling tumupad sa tungkulin kahit pagod na.

Sa lahat ng naging bahagi ng Mayor’s Cup 2026, maraming salamat. Ang bawat laro ay naging posible dahil may mga taong piniling tumayo, tumulong, at magsilbi.