21/04/2026
Maayong adlaw sa tanan! 🌿
*PAHIBALO PARA SA TANAN NGA POMULUYO SANG PUROK MATINATAPON*
Subong nga nagataas ang kaso sang Dengue diri sa aton barangay kag ilabi na gid sa aton mismo nga purok, panahon na nga magbinuligay kita tanan para tapnaon ini. Indi ta na paghulaton nga may isa pa sa aton pamilya, silingan, ukon kabataan ang matandog sang sini nga masakit.
*Gani, GINA-AGDA ANG TANAN* nga mag-upod sa aton *COMMUNITY CLEAN-UP DRIVE / Dagyaw para sa Paglimpyo* sa aton *Community Garden kag mga bakante nga lote* sa aton lugar.
*📅 San-o:* Buas, Abril 22, 2026 (Miyerkules)
*⏰ Anu nga oras:* Alas 6:00 sang aga
*📍 Diin:* Tipunanay sa aton Community Garden
Ini nga aktibidad kabahin sang _simultaneous clean-up drive_ sa tanan nga purok bilang pagpakita sang aton pagbinuligay kag kooperasyon para mapadayon ang kalimpyo kag kahilway sang aton palibot. Ang aton tuyo simple lang: *dulaon ang mga pwede ma-istaran sang lamok* — mga nagatindog nga tubig sa lata, gulong, kabhang sang lubi, botelya, kag iban pa nga gakalat nga basura.
Gamay lang nga oras ang kinahanglan ta, pero daku gid ang mabulig sini sa ikaayong lawas sang aton kumunidad. Ang isa ka oras mo nga pagpaninlo makaluwas sang kabuhi. Indi lang ini para sa barangay, kundi para gid sa aton mga panimalay, sa aton mga kabataan, sa aton kaugalingon.
*Dalaon:* Silhig, sangkag, sako, kag imo matinlo nga tuyo sa pagbulig.
Ang paglimpyo indi lang obra sang opisyal ukon sang BHW. *Responsibilidad ini sang tanan.* Kon limpyo ang palibot, layo ang masakit. Kon may pagbinuligay, may paglaum nga madula ta ang Dengue sa aton purok.
Ginalauman gid namon ang inyo presensya kag aktibo nga partisipasyon. Ipakita ta nga ang Purok Matinatapon indi lang matinatapon sa ngalan, kundi matinatapon man sa pag-ugyon kag pagbinuligay.
Madamo gid nga salamat sa inyo kooperasyon kag pagpalangga sa aton komunidad. Para sa isa ka mas limpyo, mas himsog, kag mas mapag-on nga purok — *Kitaay kita tanan buas sa aga!*
