25/06/2026
LTO, NAGHATID NG TULONG SA MGA BIKTIMA NG LINDOL SA
SARANGANI SA PAMAMAGITAN NG 'OPLAN TABANG MINDANAO'
Matagumpay na isinagawa ng Land Transportation Office (LTO) ang "Oplan Tabang Mindanao," isang magkasamang misyon para sa relief operations na naglalayong tulungan ang mga pamilya at indibidual na apektado ng nakaraang 7.8 magnitude na lindol sa mga munisipalidad ng Malapatan, Glan, at Maasim sa lalawigan ng Sarangani.
Pinangunahan nina LTO Assistant Secretary Markus V. Lacanilao at LTO Region XII Regional Director Melharrieh C. Tomawis ang nasabing operasyon, na dinaluhan at nilahukan ng mga opisyal at empleyado mula sa LTO Central Office at LTO Region XII. Sa pagtutulungan ng bawat yunit, mas mabilis na naipamahagi ang mga relief food packs sa mga residenteng labis na nangangailangan ng tulong at ayuda sa mga nasabing lugar.
Binigyang-diin sa isinagawang relief operations na ang mga ipinamahaging food packs ay nagmula pa mismo sa LTO Central Office, kung saan personal na nagbayanihan at nag repacked ang mga kawani nito upang matiyak na makakarating ang tulong sa mga kababayan sa Mindanao. Ang proyektong ito ay nagpapakita ng pagkakaisa, dedikasyon, at kahandaan ng buong pamilya ng LTO na maglingkod sa komunidad sa panahon ng kalamidad.
###
