28/04/2025
πππ πππππ ππππππππ ππππ πππππππππ ππ ππππππ ππππ πππππππ ππππππππ
Sa dihang nag desisyon ako nga modagan ug magsumite sa akong kandidatura para sa Kongresista sa 3rd District sa Leyte, nasayod ako nga kini dili sayon nga panaw. Gikan pa sa sinugdanan, giandam na nako ang akong kaugalingon sa mga hagit ug kalisdanan. Apan bisan pa niini, andam ako nga moantos, kay nagtuo ako nga kini nga paningkamot takus ug angayan nga pakigbatokan. Kini dili alang sa personal nga interes ug kaugalingong kaayohan. Kini usa ka paningkamot nga labaw pa sa akong kaugalingon, ug labaw pa sa akong pamilya. Kini alang sa usa ka halangdon nga katuyoan ug alang sa kaayohan sa katawhan sa 3rd District sa Leyte, ilabi na kadtong mga kabus ug mga labing nanginahanglan.
Sa pagsugod sa akong kandidatura, nasinati dayon nako ang kalisdanan ug pagsulay. Sama sa akong gisulti, kini expected na. Ang mga tawo nga hakog sa gahum ug bahandi, mga tinubdan sa kagubot ug walay pulos nga pagpamatay, ug kadtong dili gusto sa tinuod nga kausaban ug kalambuan sa katawhan, siguradong mogamit sa ilang gahum aron batukon ang akong halangdon nga tinguha para sa atong Distrito. Nasinati nako ang kangitngit sa kinabuhi tungod sa ilang pagpanglutos. Pero taliwala niini, wala ko mosurender sa atong tumong para sa katawhan sa 3rd District sa Leyte.
Siguro makapangutana ang uban, ngano ipadayon pa man ang pakigbisog? Ngano magpadayon pa sa pag-antos tungod sa pagpanglutos sa uban? Sa kamatuoran, wala man ko'y panginahanglan sa posisyon. Ang akong pamilya ug mga hinigugma sa kinabuhi maayo ang kahimtang, ug wala'y rason nga mosulod sa kalibutan sa politika ug masangkot sa kasakit nga dala sa mga politiko nga hakog sa gahum ug supak sa tinuod nga kausaban. Tinuod, pwede unta nga molikay nalang ko og mabuhi nga malinawon uban sa akong pamilya. Apan dili nako mahimo nga motalikod sa pakigbisog alang sa usa ka halangdon nga katuyoan. Sama sa akong giingon, kini dili para sa akong kaugalingon ug pamilya, apan para kini sa katawhan sa 3rd District sa Leyte ug sa atong hiniusa nga tinguha alang sa kalinaw ug tinuod nga kausaban ug kalambuan. Kon mosurender ako karon, mas magpadayon pa hinuon ang mga politiko nga supak sa atong baruganan.
Aron mapugngan nila ang atong damgo ug tinguha para sa 3rd District sa Leyte, ilang gitinguha nga ipapriso ko. Apan walay makapugong sa gahum sa usa ka tinud-anay ug putli nga tinguha nga mag-alagad sa katawhan ug makab-ot ang tinuod nga kalambuan. Ang kamatuoran nga kining mga pagsulay nga akong giatubang alang sa usa ka mas halangdon nga katuyuan mao ang nagahatag kanako og kusog ug kaisog nga magpadayon sa pakigbisog. Padayon sila nga maningkamot nga ipapriso ako, apan dili gyud ko matay-og ug dili ko mosurender alang niining pakigbisog para sa kaayohan sa kadaghanan. Ang suporta nga akong nadawat gikan sa katawhan sa 3rd District saLeyte nagahatag kanako og dugang nga kusog ug inspirasyon aron ipadayon ang akong nasugdan ug dalhon kini hangtod sa tinuod nga kalampusan.
Sigurado ko nga magmadaugon kita sa katapusan! Ang kangitngit sa pagpanglutos molabay ra, ug masinati nato ang kahayag sa kagawasan. Magapadayon kita sa pakigbisog alang sa kalinaw ug kahapsay, ug tinuod nga kausaban ug kalambuan sa 3rd District sa Leyte. Maghiusa kita sa pagkab-ot niini. Ang akong kadaugan mamahimong kagawasan sa tibuok Distrito. Magpadayon kita, uban ang paglaom, kaisog, ug walay puas nga determinasyon!
