What are the opening hours?

Monday 8am - 5pm Tuesday 8am - 5pm Wednesday 8am - 5pm Thursday 8am - 5pm Friday 8am - 5pm

https://www.facebook.com/705002639361861/

Libona Municipal Government, Poblacion, Libona (2026)

07/08/2026

𝗣𝗥𝗢𝗩𝗜𝗡𝗖𝗜𝗔𝗟 𝗚𝗣𝗞 𝗘𝗩𝗔𝗟𝗨𝗔𝗧𝗜𝗢𝗡 𝗧𝗘𝗔𝗠 𝗠𝗜𝗗𝗨𝗔𝗪 𝗦𝗔 𝗟𝗜𝗕𝗢𝗡𝗔

Mainiton nga gidawat sa Lungsod sa Libona ang Provincial Evaluation Team alang sa Galing sa Pangangalaga ng Kalikasan (GPK) Evaluation niadtong Agosto 3 tuig 2026.

Ang pag-abiabi sa mga tagasusi gipangunahan sa Municipal Environment and Natural Resources Office (MENRO) ubos sa pagpanguna ni Officer-In-Charge Feloteo D. Lofranco Jr., EnP. Tumong sa maong evaluation ang pagsusi kung unsa ka epektibo ang pagpatuman sa lokal nga panggamhanan sa mga programa ug inisyatiba nga nagpalig-on sa pagpanalipod sa kalikupan ug pagpauswag sa malungtarong pagdumala sa kinaiyahan.

Upat ka dagkong sukdanan ang gisusi sa Provincial Evaluation Team, lakip na ang Solid Waste Management, Clean and Green Environment, Water and Energy Conservation, ug Environmental Education and Community Participation. Isip kabahin sa proseso, gilibot usab sa mga tagasusi ang pipila ka mga barangay aron personal nga tan-awon ug mapamatud-an ang kahimtang base sa mga giya ug pamantayan sa GPK.

Samtang, nagpasalamat sila Municipal Vice Mayor Noel Tawing B. Woo ug Municipal Councilor and Committee Chairperson on Environmental and Development Hon. Feliciano C. Gabito, Jr. sa Probinsyal nga Panggamhanan sa paghatag niini nga oportunidad aron masusi ang kasamtangang kahimtang sa mga programa sa kalikupan sa lungsod. Matud pa nila, dako pa ang mga hagit ug kakulangon nga angay atubangon sa matag barangay, apan pinaagi sa hiniusang paningkamot sa opisina ni Municipal Mayor Aurelio B. Lopez, sa mga miyembro sa Sangguniang Bayan, mga empleyado sa munisipyo, ug sa tanang katawhan sa Libona, mas mapalig-on pa ang mga programa alang sa pagpanalipod sa kinaiyahan ug makab-ot ang mas taas nga kalidad sa serbisyo alang sa komunidad.

07/08/2026

𝗟𝗔𝗡𝗧𝗔𝗪𝗔 | Mao kini ang mga nahitabo sa pagsaulog sa Linggo ng Kabataan 2026 sugod Hulyo 30 hangtod Agosto 1 tuig 2026.

Mapasalamaton si Mayor Aurelio B. Lopez ug Vice Mayor Noel “Tawing” Woo uban ang mga miyembro sa Sangguniang Bayan sa tanang barangay nga misalmot sa maong kalihukan. Nagpakita kini sa dakong kusog ug panaghiusa alang sa padayon nga pag-asenso sa Libona.

07/08/2026

𝗜𝗞𝗔𝗗𝗨𝗛𝗔𝗡𝗚 𝗣𝗔𝗡𝗔𝗚𝗧𝗜𝗣𝗢𝗞 𝗦𝗔 𝗞𝗔𝗟𝗜𝗣𝗜 𝗪𝗢𝗠𝗘𝗡 𝗠𝗔𝗟𝗔𝗠𝗣𝗨𝗦𝗢𝗡𝗚 𝗚𝗜𝗣𝗔𝗛𝗜𝗚𝗔𝗬𝗢𝗡 𝗦𝗔 𝗟𝗜𝗕𝗢𝗡𝗔

Natigayon niadtong Huwebes, Agosto 6 tuig 2026, ang ikaduhang panagtipok sa Kababaihan sa Libona Pinaghiusa (KALIPI-WOMEN) sulod sa Municipal Conference Hall.

Ang maong kalihokan gipangunahan ni KALIPI-WOMEN Focal Person Karla Jane J. Capuyan uban ni Analiza Siga, ubos sa Municipal Social Welfare and Development Office (MSWDO) sa pagpanguna ni Ellen S. Olegario, RSW, MSSW.

Atol sa panagtipok, gihisgutan ang mga giplanong kalihokan sa organisasyon alang sa nabilin nga mga bulan sa 2026, lakip ang pagpalig-on sa partisipasyon sa mga miyembro sa nagkadaiyang programa sa komunidad.

Ang KALIPI-WOMEN usa ka organisasyon sa kababayen-an nga gipaluyohan sa Department of Social Welfare and Development (DSWD) nga nagtumong sa pagpalig-on sa partisipasyon sa kababayen-an sa pag-asenso sa komunidad, pagpataas sa kahibalo sa ilang mga katungod, panglawas, ug kaayohan sa pamilya.

Padayon nga gipaluyohan sa Lokal nga Panggamhanan sa Libona ubos sa pagpanguna ni Municipal Mayor Aurelio B. Lopez, uban sa suporta sa Sangguniang Bayan nga gipangulohan ni Vice Mayor Noel Tawing B. Woo, ang mga programa ug inisyatibo nga naghatag og higayon sa mga kababayen-an nga mahimong aktibong kaabag sa padayon nga pag-asenso sa lungsod.

05/08/2026

𝗜𝗡 𝗣𝗛𝗢𝗧𝗢𝗦 | Sa pagpanguna ni Senior Cooperative Development Specialist Engr. Pearl Ju Ne Combong ubos sa opisina ni Municipal Mayor Hon. Aurelio B. Lopez, natigayon ang Training on Streamlined Operations alang sa mga kooperatiba aron mapauswag ang hapsay nga pagdumala ug husto nga pag-organisa sa ilang mga dokumento.

Gipahigayon ang maong kalihokan sa Municipal Conference Hall adlawng Miyerkules, Agosto 5 tuig 2026, diin gitambongan kini sa mga representante gikan sa nagkalain-laing kooperatiba sa lungsod.

Isip guest speaker, naghatag og mahinungdanong kasayuran si Region X Cooperative Development Specialist II, Mr. Gian Erco W. Cayanong. Iyang gipasabot ang Capacity Building Module alang sa mga kooperatiba, lakip ang legal nga pundasyon sa kooperatiba ubos sa Republic Act No. 11364 ug Republic Act No. 9520 o ang Philippine Cooperative Code of 2008.

Gihisgutan usab sa maong sesyon ang Inspection Lifecycle, lakip ang mga nag-unang tahas sa matag key player ug ang Accountability Matrix, isip giya aron mapalig-on ang maayong pagdumala, transparency, accountability, ug pagsunod sa mga balaod ug polisiya sa matag kooperatiba.

Gilauman nga pinaagi sa maong pagbansay, mas mapalapad pa ang kahibalo ug kapasidad sa mga kooperatiba sa lungsod sa husto nga pagdumala sa ilang organisasyon, pagmintinar sa tukmang dokumentasyon, ug pagsunod sa mga pamalaod nga nagdumala sa kooperatiba.

Kabahin kini sa padayong paningkamot sa opisina ni Municipal Mayor Hon. Aurelio B. Lopez, kauban ang mga miyembro sa Sangguniang Bayan ubos sa pagpangulo ni Vice Mayor Noel “Tawing” B. Woo sa pagpalig-on sa sektor sa kooperatiba isip usa sa mga kaabag sa pagdasig sa lokal nga ekonomiya ug sa paghatag og dugang oportunidad alang sa pag-asenso sa katawhan sa lungsod.

04/08/2026

𝗣𝗨𝗕𝗟𝗜𝗖 𝗔𝗗𝗩𝗜𝗦𝗢𝗥𝗬

Adunay ipahigayon nga hatud serbisyo ang Local Civil Registry sa Libona ug Philippine Statistics Authority sa 𝗕𝗮𝗿𝗮𝗻𝗴𝗮𝘆 𝗚𝗮𝗻𝗴𝗼 ugmang adlawa, 𝗔𝗴𝗼𝘀𝘁𝗼 𝟱 𝘁𝘂𝗶𝗴 𝟮𝟬𝟮𝟲 sa Barangay Hall.

Ania ang mga serbisyo nga ihatag o makuha:

𝟭. 𝗕𝗶𝗿𝘁𝗵 𝗖𝗲𝗿𝘁𝗶𝗳𝗶𝗰𝗮𝘁𝗲
𝟮. 𝗗𝗲𝗮𝘁𝗵 𝗖𝗲𝗿𝘁𝗶𝗳𝗶𝗰𝗮𝘁𝗲
𝟯. 𝗠𝗮𝗿𝗿𝗶𝗮𝗴𝗲 𝗖𝗲𝗿𝘁𝗶𝗳𝗶𝗰𝗮𝘁𝗲
𝟰. 𝗖𝗘𝗡𝗢𝗠𝗔𝗥

Mamahimong mobisita sa nasangpit nga lugar sugod alas-otso (8:00AM) sa buntag paingon sa alas-singko (5:00PM). Palihog dala sa mga valid IDS.

04/08/2026

𝗜𝗡 𝗣𝗛𝗢𝗧𝗢𝗦 | Malampusong nasugdan adlawng Martes, Agosto 4 tuig 2026, ang unang adlaw sa Rapid Damage Assessment and Needs Analysis (RDANA) Training nga gipahigayon sa New Municipal Conference Hall.

Mitambong sa maong pagbansay ang mga Barangay Kapitan, mga BDRRMO In-Charge sa matag barangay, mga miyembro sa RDANA Team sa Lokal nga Pangagamhanan, ug mga representante gikan sa nagkalain-laing sektor sa lungsod.

Ang pagbansay gihimo ubos sa supervision sa Office of the Civil Defense (OCD) Regional Office X nga gipangulohan ni Regional Director Antonio Sugarol. Nagserbisyo isip mga resource speakers sila LDRRMO II Ib R. Rosaroso sa LGU Lantapan ug Disease Surveillance Coordinator Kervy S. Ipanang, RN, nga mipakigbahin sa ilang kahibalo ug kasinatian bahin sa husto nga pagpatuman sa Rapid Damage Assessment and Needs Analysis atol ug human sa mga kalamidad.

Gipangulohan ang kalihokan sa Municipal Disaster Risk Reduction and Management Office (MDRRMO) pinaagi sa Officer-in-Charge Mr. Nepthalie Montoya, RN. Sa iyang mensahe, iyang gipasalamatan ang mga tigbansay sa paghatag sa ilang panahon ug kahibalo ngadto sa lungsod sa Libona, ingon man ang tanang partisipante nga boluntaryong mitambong aron mapauswag ang ilang kapasidad sa pag-atubang sa mga kalamidad.

Matud pa niya, dako ang papel sa matag barangay sa epektibong pagtubag sa mga emerhensya tungod kay dili makaya sa lokal nga pangagamhanan lamang ang tanang buluhaton sa panahon sa kalamidad. Busa, ang pagpalig-on sa kahibalo ug kahandam sa mga barangay maoy usa sa labing importante nga lakang aron mapanalipdan ang kinabuhi ug kabtangan sa katawhan.

Uban sa mga Sangguniang Bayan Members nga gipangulohan ni Vice Mayor Noel "Tawing" B. Woo, padayon nga ginahatagan og prayoridad ni Municipal Mayor Aurelio B. Lopez ang mga programa nga nagpalig-on sa disaster preparedness ug disaster response sa tibuok lungsod sa Libona.

04/08/2026

𝗟𝗜𝗕𝗢𝗡𝗔 𝗠𝗜𝗦𝗔𝗨𝗟𝗢𝗚 𝗦𝗔 𝗞𝗨𝗟𝗠𝗜𝗡𝗔𝗦𝗬𝗢𝗡 𝗦𝗔 𝗡𝗔𝗧𝗜𝗢𝗡𝗔𝗟 𝗗𝗜𝗦𝗔𝗦𝗧𝗘𝗥 𝗥𝗘𝗦𝗜𝗟𝗜𝗘𝗡𝗖𝗘 𝗠𝗢𝗡𝗧𝗛 𝟮𝟬𝟮𝟲

Gisugdan pinaagi sa usa ka Rescue Demonstration kauban ang Bureau of Fire Protection (BFP), Philippine National Police (PNP), Municipal Health Office (MHO), Municipal Roads and Traffic Administration (MRTA), ug Municipal Disaster Risk Reduction and Management Office (MDRRMO) ang kulminasyon sa National Disaster Resilience Month 2026 nga adunay tema nga "Naghahanda at Kumilos Tungo sa Panatag at Bagong Pilipinas." sa MDRRMO Compound, Hulyo 30 tuig 2026.

Atol sa maong kalihokan, gipakita sa nagkalain-laing ahensya ang husto nga pamaagi sa pagpatay sa kalayo, paghatag og paunang lunas, pagpatuman sa Cardiopulmonary Resuscitation (CPR), ug uban pang pamaagi sa emerhensiyang pagresponde aron mapalig-on ang kahibalo ug kahandam sa komunidad batok sa nagkalain-laing katalagman.

Gipakita usab ang mga ekipo ug kagamitan nga gigamit sa mga responder sa panahon sa mga aksidente, kalamidad, ug uban pang emerhensiya isip kabahin sa pagpasabot sa importansya sa andam ug episyenteng pagresponde.

Dugang pa, gihatagan og Certificate of Appreciation ang matag barangay isip pag-ila sa ilang padayon ug walay kapuyong suporta sa mga programa sa disaster preparedness ug resilience. Gihatagan usab sila og mga rescue kits aron mas mapalig-on pa ang ilang kapasidad sa pag-atubang sa mga emerhensiya sa tagsa-tagsa ka barangay.

Gipangunahan ang maong kalihokan sa Municipal Disaster Risk Reduction and Management Office (MDRRMO) ubos sa pagpangulo ni OIC Nepthalie Montoya, RN, nga mipasalamat kang Municipal Mayor Aurelio B. Lopez ug sa Sangguniang Bayan Members nga gipangulohan ni Vice Mayor Noel "Tawing" B. Woo alang sa ilang padayon nga suporta sa mga programa nga nagpalig-on sa kaandam sa lungsod batok sa mga katalagman.

Mitambong usab sa maong kalihokan si Municipal Mayor Aurelio B. Lopez kauban si Cong. Jose Manuel F. Alba, Konsehal Rex Tacandong, mga representante sa nagkalain-laing national government agencies, ug mga opisyal ug kawani sa lokal nga pangagamhanan sa Lungsod sa Libona, nga nagpakita sa hiniusang paningkamot alang sa usa ka luwas, andam, ug lig-on nga komunidad.

03/08/2026

𝗜𝗡 𝗣𝗛𝗢𝗧𝗢𝗦 | Gipahumotan sa nagkalain-laing lamian ug masustansyang mga putahe ang sulod sa Municipal Gymnasium sa Lungsod sa Libona, adlawng Miyerkules, Hulyo 29 tuig 2026, isip kabahin sa malampusong Culmination Activity sa Nutrition Month 2026 nga may temang "Nutrisyon at Kalikasan, Ating Pangalagaan."

Gitambongan ang programa sa mga Punong Barangay ug barangay officials, Barangay Health Workers (BHWs), Barangay Nutrition Scholars (BNS), mga mabdos nga inahan, ug uban pang mga bisita gikan sa nagkalain-laing barangay sa lungsod. Mitambong usab ang mga representante gikan sa Provincial Nutrition Office nga gipangulohan ni Ms. Rebecca R. Hibaya, RND.

Usa sa mga gipasiugda nga kalihokan mao ang Healthy Cooking Contest, diin gipakita sa mga partisipante ang ilang kahibalo sa pag-andam og mga pagkaong sustansyado ug angay sa matag panimalay. Gawas niini, gipahigayon usab ang Agro and Product Display diin gipasundayag sa matag barangay ang ilang mga preskong utanon, prutas, ug mga lokal nga produktong hinimo sa kamot sama sa house rugs ug uban pang kabinuhatan nga nagpakita sa kaabtik ug pagkamaabiabihon sa komunidad.

Kabahin usab sa maong programa ang pagpanghatag sa Mothers Kit gikan sa Department of Health Regional Office X alang sa mga mabdos nga inahan isip pag-andam sa ilang pagpanganak. Ang matag kit adunay mga batakang panginahanglan sama sa alcohol, tuwalya, sabon, toothbrush ug uban pang gamit. Gihatagan usab sila og gatas ug itlog aron makatabang sa hustong nutrisyon sa inahan ug sa ilang gisabak.

Usa sa labing mahinungdanong bahin sa programa mao ang pagpirma sa Memorandum of Agreement (MOA) tali sa Lokal nga Pangagamhanan sa Libona ug Del Monte Foundation, Inc., nga gipresentar ni Executive Director Ma. Bella Victoria G. Quimbo. Ang maong panagsabot nagtumong sa pagpalig-on sa programa alang sa mga batang adunay malnutrisyon pinaagi sa supplemental feeding.

Gipasidunggan usab ang mga barangay nutrition workers ug uban pang mga kaabag pinaagi sa paghatag og mga sertipiko isip pag-ila sa ilang walay hunong nga serbisyo ug dedikasyon sa pagpatuman sa mga programa sa nutrisyon sulod sa tibuok tuig.

Nakapahimuot usab sa mga nanambong ang mga pasundayag sa sayaw nga gihatud sa mga bata ug ginikanan gikan sa Municipal Child Development Center, nga nagdugang og kasadya sa maong selebrasyon.

Isip dinapit nga bisita, gidayeg ni Municipal Mayor Aurelio B. Lopez ang aktibong partisipasyon sa tanang sektor ug gipasiugda nga ang maayong nutrisyon maoy pundasyon sa usa ka himsog ug asensado nga komunidad. Iyang gipahinumdoman ang tanan nga ang pag-atiman sa panglawas dili lamang responsibilidad sa pipila ka mga opisina, kondili katungdanan sa matag usa.

Ang maong Culmination Activity gipangandam sa Municipal Nutrition Action Office (MNAO) ubos sa pagpanguna ni Municipal Nutrition Action Officer Ms. Hannah Alyanna Becoy, RN. Nagpasalamat siya kang Municipal Mayor Aurelio B. Lopez, Vice Mayor Noel "Tawing" B. Woo, ug sa mga miyembro sa Sangguniang Bayan alang sa ilang makanunayon nga suporta sa mga programa sa nutrisyon ug sa kaayohan sa katawhan.

Nagpasalamat usab siya sa tanang ahensya sa gobyerno, mga partner nga institusyon, barangay officials, volunteers, ug mga partisipante nga nagtinabangay aron mahimong malampuson ang mga kalihokan sa Nutrition Month. Dugang pa niya, ang paghatag og bili sa hustong nutrisyon dili angay kutob lamang sa bulan sa Hulyo, apan kinahanglan nga mahimong kabahin sa adlaw-adlaw nga panginabuhi sa matag pamilya.

Ang Nutrition Month Culmination usa ka tinuig nga programa nga naghiusa sa lokal nga pangagamhanan, mga barangay, ug nagkalain-laing mga ahensya aron mapalig-on ang kahibalo sa publiko bahin sa hustong nutrisyon, panglawas, ug pag-atiman sa kalikupan alang sa mas himsog nga kaugmaon sa matag komunidad sa lungsod.

03/08/2026

𝗜𝗡 𝗣𝗛𝗢𝗧𝗢𝗦 | Mikabat sa 1,845 ka benepisyaryong mag-uuma sa lungsod sa Libona ang nakadawat og kapin ₱2,000 matag usa pinaagi sa Presidential Assistance for Farmers and Fisherfolk (PAPFF) atol sa programa nga gipahigayon sa Municipal Conference Hall niadtong Biyernes, Hulyo 31 tuig 2026.

Ang pagpanghatag sa maong ayuda gidumala sa Department of Agriculture Regional Field Office X, ubos sa pagpangulo ni Regional Executive Director Jose Apollo Y. Pacamalan, kauban si Patrick F. Pedarse, Division Chief sa Administrative and Finance Division. Ang kalihokan gi-facilitate sa Municipal Agriculture Office sa Libona ubos sa pagpangulo ni Engr. James Berlin H. Escaner.

Sumala sa Municipal Agriculture Office, ang lista sa mga benepisyaryo gibase sa 2025 system-generated list sa Registry System for Basic Sectors in Agriculture (RSBSA), diin ang kwalipikadong mga mag-uuma mao kadtong adunay mga tanom nga palay ug mais sa maong panahon.

Ang maong programa kabahin sa padayon nga paningkamot sa nasyonal ug lokal nga kagamhanan sa paghatag og suporta sa mga mag-uuma aron mapalig-on ang ilang panginabuhian ug mapadayon ang produksyon sa agrikultura sa komunidad.

Libona Municipal Government

07/08/2026

07/08/2026

07/08/2026

05/08/2026

04/08/2026

04/08/2026

04/08/2026

03/08/2026

03/08/2026

Address

Opening Hours

Website

Alerts

Shortcuts

Share

Category

Listing takedown request

Monday	8am - 5pm
Tuesday	8am - 5pm
Wednesday	8am - 5pm
Thursday	8am - 5pm
Friday	8am - 5pm