06/08/2026
BARIL NASABAT SA GUN BUY-BUST OPERATION, ILEGAL NA DROGA NAREKOBER DIN
Naaresto ang isang lalaki dahil sa umano’y pagbebenta ng ilegal na baril sa ilalim ng buy-bust operation sa Polangui, Albay nitong Miyerkoles ng gabi, Agosto 5, 2026.
Nakumpiska ng mga operatiba ng Polangui Municipal Police Station sa direktang superbisyon ni PLTCOL EDGAR E AZOTEA, Chief of Police katuwang ang Albay PIU, 505th MC-RMFB5, at 1st Albay PMFC, ang isang (1) cal. 38 revolver na may kargang 2 bala at apat pang bala sa kaparehong kalibre ng baril kapalit ng buy-bust money.
Narekober din ng mga awtoridad ang walong (8) heat-sealed transparent plastic sachets ng hinihinalang shabu na may timbang na 0.40 gramo bawat isa. Umaabot sa 3.20 gramo na may standard drug price of Php 21,760.00 ang nakuhang droga mula sa suspek na kinilala sa alyas na “Jun”, nasa hustong gulang at residente ng nasabing bayan.
Ang imbentaryo at pagmamarka ng mga nakuhang ebidensya ay isinagawa sa harap ng suspek at ng mga mandatory witnesses mula sa media at halal na opisyal ng barangay. Ang buong operasyon ay inerekord gamit ang BWC.
Agad na ipinaliwanag sa suspek ang dahilan ng kanyang pagkakahuli at ang kanyang mga karapatan alinsunod sa ating Saligang Batas. Tuluyang dinala sa Polangui MPS ang suspek at ang mga nakuhang ebidensya para sa nararapat na disposiyon.
Haharapin ni “Jun” ang mga kaso sa ilegal na pagmamay-ari ng baril sa ilalim ng Republic Act 10591 at paglabag ng Republic Act 9165 o ang Comprehensive Dangerous Drugs Act.
Ang matagumpay na operasyon ay bahagi ng masidhing kampanya ng Albay Kasurog Cops laban sa ilegal na droga na bahagi ng adbokasiyang Serbisyong NOEL. “Nagpapasalamat po kami sa ating mga kababayan sa patuloy na pakiki-pagtulungan sa aming mga kapulisan upang masawata ang problemang ito,” pahayag ni PCOL NOEL DONATO NUÑEZ, Provincial Director ng Albay PNP.
Serbisyong NOEL
NARARAPAT, ORGANISADO, EPEKTIBO AT LAGING MAAASAHAN
