14/05/2025
Mahal kong mga kababayan ng Mataasnakahoy,
Ako po ay taos-pusong nagpapasalamat sa inyong lahat na nagbigay ng suporta at tiwala sa aking pagtakbo bilang Vice Mayor. Ang 5,527 na boto na ating nakalap ay higit pa sa isang numero—ito po ay patunay na marami sa inyo ang naniniwala sa ating mga adbokasiya at sa direksyong nais nating tahakin para sa ating bayan.
Bagamat hindi tayo nagtagumpay sa halalan, ang ating laban ay naging isang matibay na pahayag ng pagkakaisa, paninindigan, at pagmamahal sa Mataasnakahoy. Ang inyong pagtitiwala ay isang biyayang hindi matutumbasan ng kahit anong posisyon.
Ngayong tapos na ang halalan at may napiling bagong Vice Mayor ang ating bayan, hinihiling ko sa bawat isa sa 5,527 na nagbigay ng suporta sa akin na ibigay rin ang kanilang tiwala at pakikiisa sa bagong liderato. Ang tunay na tagumpay ay nasa ating kakayahang magkaisa, makinig, at magtulungan para sa ikabubuti ng lahat.
Hindi dito nagtatapos ang aking paglilingkod. Bilang isang doktor at isang mamamayan, mananatili po akong kasama ninyo sa bawat hakbang tungo sa isang mas maunlad na Mataasnakahoy.
Maraming salamat po sa pagmamahal at suporta. Hindi man ako pinalad, ako po ay lubos na pinagpala—dahil kasama ko kayo.
Nagmamahal,
Doc. Mark Ilagan Villalobos
